Read Mousgoum Wiyi na midini gadai 30 Bible Online

Wiyi na midini gadai 30 - Mousgoum bible

Wiyi na midini gadai 30

¹Won hlai na wazagai hanɗa paŋ a za li siki, tusa gaini ɓiki na mu mulaŋ wuzaki, na ɓa edi arbaɗi pinzibaɗi ɗai n’Epiɗ-ɗai Alaw na wiiki a kiki woni paŋ par, ki hiini midini wazagai n’a za ɗa,

²na ɓa ki wiyisi li sini Epiɗ-ɗai Alaw na wiiki, na ɓa ki ɵini mini gaiɗi agulki paŋ, gaini suŋfaɗi agulki paŋ lai, tiki gaiɗi aliki kal kal maini na mu na muɗaŋ siki girna na nɵa ɗa.

³Nɵa Epiɗ-ɗai Alaw na wiiki aga a wiyiki warni eziki n’avut, aga a hiina haw buriki, aga a tipikisi aha edi arbaɗi ɗai n’a ɵiriki edi arbaɗi par.

⁴Koo na ɓa e kiki edi mini koŋɗi yai tekeɗeɗi, Epiɗ-ɗai Alaw na wiiki aga a hala a piyikisi edi woni par.

⁵Epiɗ-ɗai Alaw na wiiki aga a wiyikisi midini afti n’a naka wiiɗi tamaiki, aga a siki simni na ɵeɗ, a bindiki viya ki sûwiɗi tamaiki ɗa.

⁶Epiɗ-ɗai Alaw na wiiki aga a bunda agulki hilu gaiɗi agulɗi aliki n’asakal sek ɗa lai, kapai ki diri Epiɗ-ɗai Alaw na wiiki gaiɗi agulki paŋ, gaini suŋfaɗi agulki kapai ki simni karki.

⁷Epiɗ-ɗai Alaw na wiiki aga a hina tusa hanɗa paŋ midiɗi gawki, midiɗi nagai n’e bili gaw siki gaiɗi nagai n’e ziki gir.

⁸Nɵa tiki aga ki wiyisi, aga ki ɵini mini EPIƊ-ƊAI, aga ki zi pini gadaini paŋ na mu na siŋki girna na ɗa.

⁹Epiɗ-ɗai Alaw na wiiki aga a ɓikiki gaini der viya, aga a riya sda na ki ziŋ tiki paŋ amai, aga ki wii ali viya, farani faraiki aga a sisɗa viya, aftiki aga a za seyem viya, buri ɓa firyini EPIƊ-ƊAI aga a va amai aŋ ziki pɗem kal kal maini a zaŋ siɗi tamaiki nɵa lai.

¹⁰Won hlai na ki wiyisi li aŋ ɵini mini Epiɗ-ɗai Alaw na wiiki, aŋ zi pini gdaini gaini gadaini zi ɗû, n’aŋ gaini ɗû warni maktuŋ na wiini gadai zi ɗû hanɗa, Won hlai na ki wiyisi li sini Epiɗ-ɗai Alaw na wiiki gaiɗi agulki paŋ, gaini suŋfaɗi agulki paŋ lai.

¹¹Buri ɓa gadai na mu na siŋki girna hanɗa, a gadai n’a suwa gdaŋki kai ɗa kai, a na ki kiɗi midini kai ɗa kai.

¹²A gadai n’a na war hlai n’amai kai kapai ki miɗi kai ɓa: ɗif n’aga a niya amai war hlai n’amai buriyi aŋ piyiŋyisi kapai a miɗiŋyi kapai tiyi mi zi pini lai ɗa asiya ɗa, a na ɵa kai.

¹³Aŋsi anene kata duɓani yem-ra n’abai ɗa par kapai ki miɗi kai ɓa: ɗif n’aga a hala anene kata duɓani yem-ra n’abai ɗa par aŋ piyiŋyisi kapai a miɗiŋyi kapai tiyi mi zi pini lai asiya ɗa, a na ɵa kai.

¹⁴Seŋ na wiini Alaw hanɗa a na gobi gaiki, aŋ war miki, aŋ warɗi agulki lai kapai ki zi pini.

¹⁵Tili, girna mu na mula suŋfa gaini pɗem war gal ktai, tusa gaini gir war gal ktai lai wuzaki,

¹⁶Na mu miɗiŋki girna na ɗa ɓa, ki diri Epiɗ-ɗai Alaw na wiiki, ki zi pini dirini, ki yimi gadaini gaini gadaini zi ɗû gaini gadaini zi ɗiyi lai, kapai ki simni karki, ki sisi viya lai, kapai Epiɗ-ɗai Alaw na wiiki midini afti n’aga ki hili ki tikiŋ aŋ wiiki ɗa.

¹⁷Amma na ɓa agulki a bunda li edi sini par, na ɓa ki ɵini mini kir kai ɗa, na ɓa ki hini siki lai aŋ hûrgi azumai wuzani alawai na zamai aŋ zi ɵeŋɗi lai ɗa,

¹⁸Ta mu jiŋiki girna par ɓa: aga ki vidi edi marwai, aga ki fini midini afti n’aga ki hili ki tikiŋ anene par duɓani Yurdaŋ ɗa viya kai.

¹⁹Girna ɗa hlai n’amai gaiɗi yai e ɗi zaida arbamu, mu mula suŋfa gaini mri, ɓiki gaini tusa lai aŋ wuzaki. Viri suŋfa ɗa kapai ki simni karki tiki gaini pinzibaki paŋ,

²⁰Ki diri Epiɗ-ɗai Alaw na wiiki, ki ɵini mini, ki zi bonuki gaini, buri ɓa suŋfaki ɗa a ni, simniki na mogo midini afti ɗa a ni, nɵa aga ki simni midini afti n’EPIƊ-ƊAI a ha wala mini buri a siŋni wiini Abraham, Isak gaini Yakob na tamaiki ɗa.