Read Mousgoum Wiyi na midini gadai 31 Bible Online

Wiyi na midini gadai 31 - Mousgoum bible

Wiyi na midini gadai 31

¹Asakal Musus a hala a miɗiɗi wiiɗi aliɗi Izrayel.

²A miɗiɗi: girna buzaŋa miya gaini caaɓa, mu kiɗa mu za wala ktai kir kai, EPIƊ-ƊAI a muɗaŋa ya ɓa: aga ku vuga Yurdaŋ hanɗa amai kai,

³Aga a ɵa wuzaki ɗa a Epiɗ-ɗai Alaw na wiiki gaini midini, aga a vidiɗi pinziba ɗa edi wuzaki ɗa a ni, tiki aga ki tiki aftiɗi ɗa, aga a za aŋ abaiki ɗa a Yosva maini n’EPIƊ-ƊAI a muɗaŋ ɗa nɵa

⁴EPIƊ-ƊAI aga a za sini pinziba hanɗa maini n’a zaŋ sini Sihon gaini Og paakaio na wiiɗi Amoritekai gaini aftiɗi ɗa nɵa, a vidiɗi edi.

⁵EPIƊ-ƊAI aga a siɗi war tiki, tiki aga ki zi siɗi kal kal maini na mu na gidiki na ɵa.

⁶Ki ɗiyi gdaŋ, ki yimiti agulki, ki hûni wuzaɗi kai, ki ziriyi wuzaɗi kaalai, buri Epiɗ-ɗai Alaw na wiiki aŋ gaiki su, aga a hiniki kai, aga a bunda arni edi siki par kai.

⁷Asakal par Musus a yikasi Yosva, wuzani arɗi aliɗi Izrayel paŋ a miɗini: ɗiya gdaŋ, yimiti agulku, aga ku kiɗi ɗai hanɗa aha midini afti n’EPIƊ-ƊAI a ha wala mini wiiɗi tamaiɗi buri a siŋɗi ku tuku, aga ku ɓirwiŋɗi aŋ bulum ku tuku lai.

⁸EPIƊ-ƊAI gaini midini dama aga a ɵa wuzaku, ni dama aga a za gaiku, aga a hinuku kai, aga a bunda arni edi suku par kai, ku huna kai, ku hina wala a muluku hunai puku kai.

⁹Musus a ɗo gadai zi ɗû na wiini Alaw, a saŋ war tiɗi paakai zi ɓaka n’alini Levi n’e libi Zunduk zi bonu na wiini EPIƊ-ƊAI, gaiɗi n’abakai n’arbaɗi ɗai na Izrayel ɗa paŋ.

¹⁰Musus a miɗiɗi maini nɵa: Buza a za li muguzak paŋ, war buza na wiini hinini tumuŋ, war fet na wiini gumu ɗa,

¹¹Won hlai n’aliɗi Izrayel e hilisi li wuzani Epiɗ-ɗai Alaw na wiiki, war hlai n’a varaŋ ɗa aga ki ŋi gadai zi ɗû hanɗa wuzaɗi aliɗi Izrayel paŋ, kapai e ɵiniŋ gaini ɵimani.

¹²Ki tipiɗisi ɗai paŋ, na maɵagai, na falakai, aliyagoi, na zi zak n’e ɗa war fuŋki n’abakai lai, kapai e ɵini e hitri, kapai e sini hormo wiini Epiɗ-ɗai Alaw na wiiki, kapai e fiɗi was aŋ zi pini seŋ paŋ n’aŋ warni gadai zi ɗû hanɗa.

¹³Kapai aliɗi n’e siɗi gadai hanɗa kai ɗa e ɵiniŋ, e hitri aŋ sini hormo wiini Epiɗ-ɗai Alaw na wiiki Won hlai n’aga ki simni midini afti n’aga ki tikiŋ aŋ wiiki war mefeŋ n’aga ki ziŋ midini afti n’aga ki tikiŋ aŋ wiiki anene par duɓani Yurdan ta ɗa.

¹⁴EPIƊ-ƊAI a miɗini wiini Musus: mefeŋ na wiini mriku aŋasi gobi ta, ku yikasi Yosva gaiku, ki hilisi ki ɗiyi wuza amlai war Gumu na e nivi gaini EPIƊ-ƊAI woni, aga mu sini gadaiŋa. Musus gaini Yosva e hili amlai war gumuna e nivi gaini EPIƊ-ƊAI woni, e ɗiyi wuzani ca.

¹⁵EPIƊ-ƊAI a siŋka sini arɗi amlai warni Gumu ɗa war ɗugul z'agiyiŋ, ɗugul z'agiyiŋ a ɗiyasi war mini hlai n’e niyi amlai woni par.

¹⁶EPIƊ-ƊAI a miɗini wiini Musus: aga ku mra ku hala gaiɗi tamaiku, amma ɗai hanɗa aga e rivi pini alawai na zamai, alawai na midini afti na nagai aga e hili woni ɗa. Aga e hiniŋa edi, aga e ɗûkli bonu na mu zaŋ gaiɗi ɗa.

¹⁷War mefeŋni ɗa, aga mu za hiy siɗi, aga mu hiniɗi edi, aga mu bunda ara edi siɗi par, gir viya aga a za siɗi. Pini zibaɗi ɗai na zamai ɗa e rivi midini gooba, gir viya aga a za siɗi, aga e zilbi siɗi lai ɓa: gir hanɗa a za sumu nɵa buri Epiɗ-ɗai Alaw na wiimu a na arbamu kai ɗa kai ɗi!

¹⁸War mefeŋni ɗa, aga mu liwiiɗi ɗuwal kai ɗaai burini meefeŋ n’e ziŋ, e hiniŋa edi, e bindi arɗi siɗi alawai na zamai ɗa.

¹⁹Tiyana ɗa, tuku Musus gaini Yosva ki ɗûyama hanɗa, tuku Musus ku hitriŋɗi wiiɗi aliɗi Izrayel ku yimiŋɗi midiɗi gaini futini, Yama ni ɗa aga a hina arba gaiɗi aliɗi Izrayel ɗa aŋ wala zi zaida.

²⁰Buri ɓa aga mu kiɗi ɗai hanɗa aha midini afti na fiyaw gaini emelni ami a ka warni, na mu miɗiɗi gaini, mu ha wala ma wiiɗi tamaiɗi lai ɓa aga mu siŋɗi. Aga e simi, aga e simi haa e vi, e liki siɗi lai, asakal aga e bindi pini alawai na zamai e zi ɵeŋni lai, aga e miisiŋa, e ɗûkli bonu na mu zaŋ gaiɗi lai.

²¹Won hlai na pinzibani gir n’abakai aga a cosi midiɗi, yama hanɗa aga a za aŋ zaida n’a pa seŋ midiɗi buri ɓa, aliɗi gaiɗi tiyakaiɗi maa midiɗi aga a wula gaini yama hanɗa kai, buri ɓa girna par mu sɗa hiini n’aŋ warɗi ɗa wuzani hlai na mu kiɗi maa aha midini afti na mu miɗiɗi gaini, mu ha wala ma lai buri aga mu siŋɗi.

²²War mefeŋni ɗa, Musus a ɗo yama hanɗa, a hitriŋɗi wiiɗi aliɗi Izrayel lai.

²³Asakal EPIƊ-ƊAI a miɗini wiini Yosva n’ahini Nun maini nɵa: ku a gdaŋ, ku yimiti agulku lai, buri ɓa aga ku kiɗi aliɗi Izrayel aha midini afti na mu miɗiki gaini na mu ha wala ma lai, ku tuku, Ta aga mu za gaiku.

²⁴Won hlai na Musus a vada gaini ɗû na wiini seŋ n’aŋ war gadai zi ɗû na wiini Alaw war maktuɓ paŋ ɗa,

²⁵a sa miɗi wiiɗi Levitekai n’e libi Zunduk zi bonu na wiini EPIƊ-ƊAI maini nɵa:

²⁶Ki tiki maktuɓ na wiini gadai zi ɗû hanɗa, ki tikiŋ ɵimani Zunduk zi bonu na wiini Epiɗ-ɗai Alaw na wiiki ta, aga a za aŋ wala zi zaida buriki.

²⁷Buri mu sɗa ɓa ki ɗi ɗai na hiraŋai na miɗiki gdaŋ, na ɓa tiyana na mu na kara arbaki hai ɗa ki fiki amai sini EPIƊ-ƊAI ɗa, na ɓa mu mra li aga ki ziŋ a suwa pra.

²⁸Tiyana ɗa, tipiɗisi ɗai n’abakai n’arbaɗi ɗai na war pinzibaki paŋ gaiɗi sekretaraiki lai, tipisi sa, aga mu muɗa seŋ hanɗa wuzani arɗi, aga mu ɗiya hlai n’amai gaiɗi yai aŋ zaidaŋa.

²⁹Buri mu sɗa ɓa, asakalni mriŋa par aga ki tiki futi zamai, aga ki hiniti futi na mu siŋkitiki ɗa edi, asakal hanɗa par gir aga a gizi miɗiki, buri ɓa ki ɓilkini agulni EPIƊ-ƊAI gaini sdaki na maafanai na ki ziŋ gaini tiki n’a sini firiyi kai ɗa.

³⁰Asakal par Musus a muɗa seŋ n’aŋ warni yama hanɗa paŋ edi wuzani diŋgi na wiiɗi aliɗi Izrayel ɗa paŋ gaini wulani amai haa a ɵaŋ edi.