Read Mousgoum Wiyi na midini gadai 32 Bible Online

Wiyi na midini gadai 32 - Mousgoum bible

Wiyi na midini gadai 32

¹Hlai n’amai tika hangalku ma, mu dara mu muɗa seŋ, yai, zuɓura seŋ na ma par ɗa.

²A juva ɓa siɗi na wiya ɗa a ma maini faŋ nɵa, seŋ na ma par ɗa a wa maini maɗai nɵa, maini faŋ n’abai n’a ɵa midini sugoi nɵa, maini yem n’a bla ɵimani evek nɵa.

³Aga mu muɗa edi midini yikini EPIƊ-ƊAI, Izrayel, sini kol wiini Alaw na wiimu.

⁴Ni ɗa a huwuŋ, sdani ɗa meefeŋ warni kai, seŋ n’a ɗiyaŋ paŋ a futini, Alaw na wiimu ɗa a ɗikat, meefeŋ warni kai, A jre, a bunda kai.

⁵Na ɓa e hiniti futi na jre edi mak ɗa, meefeŋ ɗa a ni kai, meefeŋ ɗa e ɗi alini ɗa, a pinziba zi rhai zi viɗi seŋ.

⁶Ɗai na dulakai na yel miɗiki kai hanɗa, a na ɗa a wala n’a juva aŋ zi sini EPIƊ-ƊAI kiɗi? Ni ɗa a epiki kai? A siki suŋfa ɗa a ni kai? A rgiki a ni kai? A ziki aŋ ɗaini a ni kai?

⁷Ki hini miɗiki a kɵa gaini mefeŋ na ɗipar ɗa, mili arki sini buza n’a vugasi sini vuna vuna paŋ, zilbiɗi tamaiki na maɵagai ɗa e virniŋki, zilbiɗi ɗai n’abakai n’arbaɗi ɗai ɗa, aga e miɗiŋki.

⁸Won hlai n’Alaw n’amai a sa afti wiiɗi ɗai aŋ bulum ɗa, Won hlai n’a tika arɗi ɗai edi kiini kiini, a ɓasa hagani aftiɗi ɗai, sini pɵaɗi aliɗi Izrayel.

⁹Buri ɓa na wiini e ɗi aliɗi Izrayel, bulum na wiini ɗa a Yakob.

¹⁰EPIƊ-ƊAI a niviɗisi Izrayel edi war basga na kaɗataŋ a tuwa ɵimani ɗa a barka cem cem, a tika hangalni siɗi, a hitriɗi, a giɗimiɗi maiɗi arni nɵa.

¹¹Maini Muka n’a hitra alini aŋ ɗufla nɵa, a guvula amai midini, a wa graŋni pini aŋ yimaŋ amai, a lbaŋ gaini baadani.

¹²EPIƊ-ƊAI a ɵa wuzaɗi ɗaini kiini ktai, alaw zamai n’edi par gaini kai.

¹³A siɗi hlai zi simni amai midini boŋorai na midini afti, a siɗi aŋ simi ɗa a wazagai n’edi war basga, a siɗi emelni ami n’a kasi war waŋ na sini huwoŋai par miɗi, a siɗi miɗi aŋ fiyaw ɗa a emelni ami n’a kasi sini war waŋ na sini huwuŋ par. Emel n’e girdiŋ siɗi ɗa, a hina luwuŋ Olive a diya midini ali-fuŋ na gdaŋai.

¹⁴A siɗi aŋ simi ɗa a emel na wiini ɵaakai gaini fiyaw na hirnaŋ na wiini adumai gaini haakai, e limi aŋ neŋ ɗa a alini adumai gaini alini adumai na maɵagai, gaini haakai na maɵagai lai. E simi ɗa a algama na gaini futini, e ci ɗa a felni alini luwuŋ zi vin, na gaini tiki amai ɗaw ɗa.

¹⁵Yakob a suma haa a va, a laka ta ta, a bunda gargali gaini vi edi tep tep, a hina Alaw n’a zaŋ ɗa edi ta, a kasi miisi sini huwuŋ na wiini, sini ni n’a koraŋ edi mini gir par ɗa.

¹⁶Aliɗi Izrayel e ɓilkini agulni Alaw gaini sdaɗi na haharai, e bindiŋ mesile Won hlai n’e hûrgi azumai wuzani alawai n’edi par.

¹⁷E zini ɓaka wiini ksalai na maafanai n’a Alaw kai, wiini alawai n’e siɗiŋ kai, na hahakai n’a ɓulasi gobi na, na tamaiki e hûrgi azumai wuzani kai.

¹⁸Huwuŋ n’a wuku ɗa ku hiini midini kai, Ku wula muduku gaini Alaw n’a wuku ɗa vi.

¹⁹EPIƊ-ƊAI a tala sda hanɗa, a tala sini war miisi, buri ɓa alini na maɵagai gaiɗi na falakai e ɓilkini agulni.

²⁰A muɗa: aga mu bunda ara edi siɗi par pla, kapai e ziŋ aŋ ma, aŋ ma kai ɗi ɗa, buri ɓa e ɗi pinziba na ama naɗi aŋ kai, e ɗi ɗai n’e ɗiyi midini seŋɗi kai.

²¹E bindiŋa mesile gaiɗi alawai na e ɗi Alaw kai ɗa, e ɓilkitiŋa agula gaini alawaiɗi na ɗapni kai ɗa, ta aga mu bindiɗi mesilekai gaini pinziba n’e kiɗi e yiki aŋ pinziba kai. Aga mu ɓilkiɗi agulɗi gaini pinziba na yel midiɗi kai,

²²Buri ɓa afuni hiyŋa a do do, a ya haa azumai war hlaiɗi ɗai zi mri, a ya afti gaini seyem na warni paŋ, a ya haa azumai pini huwoŋai n’azumai.

²³Aga mu tapasi gir midiɗi, aga mu vada ɓarawŋa aŋ edi siɗi.

²⁴Won hlai na wiyamai a vada gdaŋɗi li si zi sawai gaini vlak na gdaŋ gara a yima gɗaŋɗi li edi, aga mu ɵina wazagai na buza na sabapai midiɗi aŋ limiɗi, gaini wazagai zi hidili si musnaw lai.

²⁵Anene warɗi futi ɗa, gaw aga te biɗi aliɗi ɗa, aha war dalamɗi ɗa, hunai aga te fuɗa ɗai lai, aga te fuɗa gawla, te fiɗiti ɓulmi lai. Te fuɗa akoɗokoi gaini ɗif na wel ɗa lai.

²⁶Mu hiina ɓa mu vidiɗi edi marwai, mu haza yikiɗi ɗa edi arbaɗi ɗai par.

²⁷Amma mu huna ɗa ɓa gawɗi ɗa aga e ziŋ yewere, aga e wili e hiini ɓa: a vidiɗi edi ɗa a EPIƊ-ƊAI kai, mi zi paŋ na ɗa miɗi tiyi.

²⁸Buri ɓa e ɗi pinziba na sdaɗi ɗa a ɵa edi kai, na yel midiɗi kai.

²⁹E ɗifu ɗai na yalakai ɗa, a na ta a yima midiɗi ya, aga e siɗi wala n’aga a za siɗi dawai sek ɗa.

³⁰Gawɗi ktai a kiɗa a birga ɗai na Izrayel dubu ɗaw ɗa maɵa maɵa ɗa? Gawɗi sulu e birgiɗi ɗai na Izrayel dubu doogo ɗa maɵa maɵa ɗa? Na ɓa huwuŋ zi ŋoyai na wiiɗi ɗa a hiniɗi a hini edi kai ɗa? Na ɓa EPIƊ-ƊAI a siɗi a si edi war tiɗi gawɗi kai ɗa?

³¹Buri ɓa gawmu dama e siɗi edi gaglai ɓa, Huwuŋ zi ŋoyai na wiiɗi a kata gaini luwuŋ zi ŋoyai na wiiɗi Izrayel ɗa kai.

³²Nagai ɗa e sûwiɗi ɗai na Sodoma gaiɗi na Gomora kai, nagai e ɗa kal kal maini luwuŋ zi vin n’a wa ali na ɗawakai n’a kiɗa a fuɗa ɗai nɵa.

³³Viŋ na wiiɗi ɗa, a musnaw na mini wala meefeŋ a musnaw zi fiɗi ɗai na mini maakai tar.

³⁴Hanɗa a wazagai na Ta EPIƊ-ƊAI mu na hiinaŋ warɗdi agula, n’aŋ gaini ŋûyi ta buri mu zaŋ siɗi.

³⁵Aga mu wiyiɗi meefeŋɗi n’e ziŋ sa ɗa midiɗi, aga mu siɗi vrak na pini sdaɗi ɗa; mefeŋ n’aga e kɵi warni ɗa, mefeŋ na wiini girɗi a ŋasi gobi aŋ cosi midiɗi, wala n’a zizina buriɗi ɗa a na halasi a ŋasi gobi.

³⁶EPIƊ-ƊAI aga a ziti sariya wiiɗi ɗaini war jre, amma aga a hiina haw buriɗi, Won hlai n’aga a tala gdaŋɗi n’a vada edi, Won hlai n’aga a tala ɓa bege aŋ kaalai, kempe kaalai ɗa.

³⁷Nɵa aga a zilbiɗi: alawaiɗi na ki hili ki ŋûyi sini ɗa aŋ wata ɗa?

³⁸Alawai na ki ɗika ki sini emelni wazagai na ki fiɗiŋni aŋ ɓaka ɗa, na ki ɗika ki sini vin zi ɓaka aŋ ci ɗa, e fikisi amai e zini piki kir ka, e bindi aŋ hlaiki zi ŋoyai kir ka.

³⁹Tiyana ɗa, tili, Alaw ɗa muta ktai, alawai zamai aŋ kai sai muta, mu fuɗa ɗif muta, mu hinaŋ karni muta, mu za huruk li ɗa, mu zuulaŋ muta, wala n’aŋ ta pek ɗa, ɗif a kiɗa aŋ hultaŋ edi kai.

⁴⁰Ta t'aŋ kai amai na, gaini sunfaŋa n’a na haa kureɗ zaŋ.

⁴¹Aga mu luɓa mini kaɵkarŋa luma prik prik, a goro mini lai, mu tika pa li gaini sariya ɗa, aga mu waya meefeŋ midini meefeŋ na gawŋa n’e ziŋŋa ɗa, nagai n’e bili gaw sa ɗa aga mu virgiɗi meefeŋɗi lai.

⁴²Ɓarawŋa aga a ciina tini fel, kaɵkarŋa aga a va gaini neŋɗi gawŋa: felɗi nagai n’e fiɗiɗi, gaiɗi nagai n’e yimiɗisi mini hatam, gaini humokɗi gawɗi na yirni gaini tûkûsi.

⁴³Tiki pinziba n’edi par ki ɵiɓi tiki piɗi ɗaini ɗa, buri ɓa aga a vurga felɗi ɗaini ɗa, aga a zilba felɗi war tiɗi gawɗi, aga a haza meefeŋ edi midini aftini par, miɗi ɗaini par lai.

⁴⁴Musus gaini Yosva n’ahini Nun e hilisi e miɗi seŋ n’aŋ war yama hanɗa paŋ ɵimani aliɗi Izrayel wiiɗi aliɗi Izrayel, kapai e ɵiniŋ.

⁴⁵Won hlai na Musus a vada gaini seŋ zi miɗi hanɗa wiiɗi aliɗi Izrayel li,

⁴⁶a miɗiɗi maini nɵa: seŋ na mu na miɗiŋki girna hanɗa, ki hiiniŋ pɗem, aga a za aŋ wala zi zaida buriki, ki hitriŋɗi wiiɗi aliki, ki gidiɗi aŋ yimi seŋ n’aŋ war gadai zi ɗû hanɗa paŋ.

⁴⁷Buri ɓa a seŋ na kadai meere kai, seŋ hanɗa a suŋfaki mal, suŋfaki aga a za mogo midini afti n’aga ki hili ki tikiŋ anene duɓani Yurdan par gaini seŋ hanɗa.

⁴⁸Mefeŋni dama EPIƊ-ƊAI a miɗini wiini Musus:

⁴⁹Niya amai midini hlai zi huwuŋ na Abarim, midini afti na Mowab na te na wuzani fuŋ n’abai na Yeriko par, niya amai midiɗi huwuŋ Nebo, tala afti na Kanaan n’aga mu saŋ aŋ wiiɗi aliɗi Izrayel ɗa.

⁵⁰Aga ku mra amai midiɗi Huwuŋ n’aga ku niya amai midiɗi ɗa, e tupuku gaiɗi tamaiku maini Aro na tawalku a mra amai midiɗi huwuŋ na Hor e tipiŋ gaiɗi tamaiki nɵa.

⁵¹Buri ɓa tuku gaini Aaron ɗa ki zi wala na meefeŋ sa wuzani arɗi aliɗi Izrayel, pini seŋni yem na Meriba war Kades edi war basga na kaɗataŋ na Ciŋ. Mefeŋ ni ɗa tiki ki siŋkiɗi wiiɗi aliɗi Izrayel ɓa, ta m’Alaw na jre ɗa, ki siŋkiŋɗi ɵa kai.

⁵²Buri hanɗa aga ku tala afti na mu siŋɗi wiiɗi aliɗi Izrayel ɗa edi gaigai par zaw, aga ku niya aha warni kai.