Read Mousgoum Wiyi na midini gadai 34 Bible Online

Wiyi na midini gadai 34 - Mousgoum bible

Wiyi na midini gadai 34

¹Musus a halaɗi midini hlai na plas na Mowab ɗa par amai midiɗi huwuŋ Nebo, amai merfeŋɗi huwuŋ Pisga na te na wuzaɗi Yeriko tar, EPIƊ-ƊAI a siŋkini afti ɗa paŋ, a Galaad par haa Dan ta,

²a siŋkini afti na wiini Neftali, na wiini Efrayim, gaini na wiini Manase, gaini afti na wiini Yuda paŋ haa agoɗom wulani yem-ra n’abai na Mediteraneya.

³A siŋkini afti na Negev, hlai na plas na wulani Yurdan, hlai na huduk na Yeriko, fuŋ n’abai zi huura, haa Suwar ta.

⁴EPIƊ-ƊAI a miɗini: Hanɗa a afti na mu miɗini wiini Abraham, wiini Isak gaini Yakob lai ɓa aga mu siŋɗi wiini pinzibaɗi, mu hiɗi wala ma burini lai ɗa, tiyana mu sunkunku arku ta, ku talaŋ gaini arku, amma aga ku niya aha warni kai.

⁵Musus na ɵeŋ na wiini EPIƊ-ƊAI a mra woni midini afti na Mowab, maini n’EPIƊ-ƊAI a miɗiŋni nɵa.

⁶EPIƊ-ƊAI a paŋ war huduk, midini afti na Mowab wuzaɗi Bet-Peor tar, haa girna ɗif a tala yeɵni Musus kai.

⁷Musus a mra sek na ɗa buzani miya gaini caaɓa, amma arni ɗa a tala ɵa kriŋ, sini gdaŋ ɵa blaŋ lai.

⁸Aliɗi Izrayel e tûwi Musus war hlai na plas na Mowab haa mefeŋ doogo doogo hu, tuwini gaini grohoni paŋ a vada.

⁹Yosva n’ahini Nun ɗa, a va gaini seze zi yel buri ɓa Musus a tika tini midini. Aliɗi Izrayel e ɵini pini, e zi pini gadai n’EPIƊ-ƊAI a siŋɗi war mini Musus lai.

¹⁰Aha warɗi Izrayel ɗa, ɗif na mini Alaw ktai na gaini EPIƊ-ƊAI e miɗi miɗi marɗi maini Musus nɵa aŋ kai,

¹¹Musus ɗa, EPIƊ-ƊAI a ɵinaŋ aŋ za wazagai zi siŋki gaini zi hiila n’abakai aha warɗi Egipte sini Faraw, siɗi ɗaini n’abakai gaini aftini paŋ lai.

¹²Musus a za wazagai n’abakai zi mili hunai pini ɗif gaini spak n’abai gara wuzani arɗi Izrayel paŋ lai.