Read Mousgoum Wiyi na midini gadai 5 Bible Online

Wiyi na midini gadai 5 - Mousgoum bible

Wiyi na midini gadai 5

¹Musus a tipiɗi aliɗi Izrayel paŋ a miɗiɗi: Aliɗi Izrayel, ɵini gadai zi ɗû gaini gadai zi ɗiyi na mu na muɗaŋ ɵimaki girna ɗa, ki yimiŋ miɗiki, ki zi pini lai. Gadai gaini hitrakai n’aga mu siŋki girna, aga ki hitiriŋ, aga ki simni karki aŋ zi pini lai.

²Epiɗ-ɗai Alaw na wiimu a za bonu gaimu a Horeb.

³EPIƊ-ƊAI a za bonu haŋɗa gaiɗi tamaimu ktai kai, amma a za hanɗa gaimu tumu paŋ na muɗumu karmu girna ɗa lai.

⁴EPIƊ-ƊAI a muɗa gaiki amai midini huwuŋ arni afu par wuzaki,

⁵war sarti ni ɗa mu nafu arbaki gaini EPIƊ-ƊAI aŋ miɗiki seŋ na wiini EPIƊ-ƊA buri ɓa afu ɗa a miliki hunai piki, ki kiɗi aŋ niyi amai midiɗi huwuŋ kai. A muɗa:

⁶Muta mu Epiɗ-ɗai Alaw na wiiku, na mu milikisi edi warɗi Egipte par, war bege par muta.

⁷Ki yimi Alaw zamai kai, sai muta.

⁸Ki rgi wazagai na ki yimiŋ aŋ Alawki kai, n’a ziŋga wazagai na war fuŋ n’Alaw zaw n’azumai midiɗi yai zaw n’arni yem n’azumai pini afti kaalai,

⁹aga ki hûrgi azumai wuzani alawai hanɗa kai, ki zi ɵeŋni kaalai, buri ɓa Epiɗ-ɗai Alaw na wiiki muta, m’Alaw na mu ɗiya midini seŋni n’a muɗaŋ, n’a pɵa tuwur na wiiɗi tamai midiɗi aliɗi haa sini vuna n’ag'aŋ hu zaw n’ag'aŋ puɗu na wiiɗi nagai n’e bili gaw sa,

¹⁰amma n’a za pɗem sini vuna wuzani sek dubu siɗi nagai n’e diriŋa, n’e yimi gadaiŋa lai.

¹¹Ki yiki yikini Epiɗ-ɗai Alaw na wiiki aŋ blaŋ kai, ɗif n’a yika yikiŋa aŋ blaŋ ɗa seŋ aŋ midini.

¹²Mefeŋ zi si n’amla ɗa, ki yimiŋ aŋ sɗik maini n’Epiɗ-ɗai Alaw na wiiki a miɗiki midini nɵa.

¹³Ki zi sda war mefeŋ na ɵaara ɗa, ki vidi sdaki paŋ warni,

¹⁴Amma mefeŋ n’ag'aŋ muguzak ɗa a Sabbat na wiini Epiɗ-ɗai Alaw na wiiki. Aga ki zi sda ktai warni kai, tiki kaalai, aliki na maɵagai kaalai, na falakai kaalai, bagakaiki na maɵagai kaalai na falakai kaalai, ɵaakaiki kaalai, ablehökaiki kaalai, wazagaiki n’ezini puɗu puɗi kaalai, morkokoi n’e ɗa ahaki kaalai, kapai bagakaiki na maɵagai gaiɗi na falakai siɗi a mula maiki ɵa lai.

¹⁵Ki hini midini a kɵa ɓa ki ɗisi ka aha war Egipte aŋ bagakai, EPIƊ-ƊAI a plikisi edi warni par gaini spak n’abai gara. Epiɗ-ɗai Alaw na wiiki a miɗiki ɓa, ki sini hormo wiini mefeŋ zi Sabbat na ɗa burini hanɗa.

¹⁶Ki hormo wiiɗi tamaiki na maɵagai gaiɗi na falakai lai maini n’Epiɗ-ɗai Alaw na wiiki a miɗiŋki nɵa, kapai ki mri gop kai, ki nivi pɗem midini afti n’Epiɗ-ɗai Alaw na wiiki a siŋki ɗa.

¹⁷Ki fiɗi ɗif kai.

¹⁸Ki zi maɵara kai.

¹⁹Ki hili wala kai.

²⁰Ki miɗi zaida z'ales midini maiku kai.

²¹Ki suna siɗi munini maiki kai, sini dalamni kai, sini vuwaini kai, sini begeni na wus ɗa kai, siɗi bagaini kailai, ɵaaini kai, ablehöni kai, ki zi suna sini walani ktai kai.

²²Seŋ hanɗa, EPIƊ-ƊAI a miɗiŋɗi wiini vokki amai midiɗi huwuŋ arbani afu par, arni agiyiŋ gaini ɗugul deɓilik par gaini wûle na gdaŋ gara, a tika wala zamai amlai mini kai, a ɗoŋ midini ali-fuŋ na babɗamai sulu, a saŋŋa ta.

²³Won hlai na ki ɵini wûle n’a na wasi edi arbani gegiŋ ɗa par, arbani afu n’a na ya amai siɗi huwuŋ par, ɗaiki n’abakai na war pinzibaki paŋ, gaiɗi abakaiki n’arbaɗi ɗai lai, e hilisi sa,

²⁴e miɗiŋa ɓa, ki ɗa miɗisi ɓa: tiyana Epiɗ-ɗai Alaw na wiimu a siŋkitiyi abaini gaini spakni, mi ɵini wulani arbani afu par, girna a yima midiyi ya ɓa Alaw a kiɗa aŋ muɗa seŋ gaini ɗif, ɗif ni ɗa a sumna karni lai.

²⁵tiyana ɗa mi fiɗi siyi edi gaini afu n’abai hanɗa buri maɗa? Na ɓa mi ɗa ɵini wulani Epiɗ-ɗai Alaw na wiimu ɵa ɗa aga mi mri.

²⁶Ɗif n’a ɵina ka wulani Alaw na karni a muɗasi arni afu par maimu tumu nɵa a sumna karni lai ɗa asiya ɗa?

²⁷Tiyana ɗa aga ku hala sini Epiɗ-ɗai Alaw na wiimu aŋ ɵinasi seŋ na mini par ku tuku. Tuku aga ku miɗiyi wala n’Epiɗ-ɗai Alaw a na wiyi a muɗuŋkusi ɗa paŋ, tiyi aga mi ɵiniŋ, mi zi pini lai.

²⁸EPIƊ-ƊAI a ɵina seŋ na ki miɗiŋŋa paŋ, EPIƊ-ƊAI a muɗaŋa: mu ɵina seŋ na ɗai hanɗa e muɗuŋku paŋ, e miɗi maini hanɗa ɵa ɗa e zi pɗem.

²⁹A nava ɓa e miɗiŋ na ɗa gaiɗi agulɗi paŋ, ɓa aga e siŋa hormo wiya ta, e yimi gadaiŋa mefeŋ paŋ lai kapai nagai gaiɗi aliɗi paŋ e nivi pɗem haa kureɗ ɗa!

³⁰Hala ku miɗiɗi ɓa, e wiyi a ha war gumuɗi ɗa!

³¹Tuku ɗa ku hina ka gaya na, aga mu suku gadai ɗa paŋ, gadai zi ɗû gaini gadai zi ɗiyi paŋ lai ku hitriŋɗi kapai e zi pini midini afti n’aga mu siŋɗi aŋ wiiɗi ɗa.

³²Musus a miɗiɗi pra: ki fiɗi was aŋ zi pini wala paŋ n’Epiɗ-ɗai Alaw na wiiki a miɗiki gaini, ki bindi nsek kaalai, nzaw kaalai.

³³Ki tikiti kureɗ te futi n’Epiɗ-ɗai Alaw na wiiki a siŋkitiki ɗa, nɵa aga ki simni karki, ki simni ɵeɗ, ki mri goɓ kaalai midini afti n’aga ki tikiŋ aŋ wiiki ɗa.