Read Mousgoum Wiyi na midini gadai 6 Bible Online

Wiyi na midini gadai 6 - Mousgoum bible

Wiyi na midini gadai 6

¹Hanɗa a gadai gaini gadai zi ɗû, gaini gadai zi ɗiyi n’Epiɗ-ɗai Alaw na wiiki a muɗaŋa buri mu hitriŋki midini afti n’aga ki hili aŋ tikiŋ ɗa,

²nɵa tiki gaiɗi aliki gaiɗi tiyakaiki lai aga ki sini hormo wiini Epiɗ-ɗai Alaw na wiiki haa sini dibini suŋfaki. Aga ki zi pini gadai zi ɗû gaini gadai na mu na siŋki hanɗa, kapai ki mrir gop kai.

³Tiki ɗai na Izrayel, Aga ki yimi gadai hanɗa, ki fiɗi was aŋ zi pini lai, nɵa aga ki nivi pɗem, aga ki bindi viya midini afti na fiyaw gaini emelni ami a ka woni maini n’Epiɗ-ɗai Alaw na wiiɗi tamaiki a miɗiŋki nɵa.

⁴Tiki ɗai na Izrayel, ɵini pɗem, Epiɗ-ɗai Alaw na wiimu a EPIƊ-ƊAI na pal.

⁵Aga ki diri Epiɗ-ɗai Alaw na wiiki gaiɗi agulki paŋ, gaini suŋfaɗi agulki paŋ, gaini gdaŋki paŋ lai.

⁶Gadai na mu na siŋki girna hanɗa, ki hiniŋ a diɓiga warɗi agulki,

⁷aga ki hitriŋɗi wiiɗi aliki ha a yima midiɗi, ki hitriŋɗi waŋ hlai na ki ɗi aha ca, waŋ hlai na ki ɗi warɗi futi yaw, waŋ hlai na ki fini azumai sek, waŋ hlai na ki ɵiyisi azumai par lai.

⁸Aga ki rgiŋ wulani tiki, ki rgiŋ amai midini arki lai aŋ wala zi siŋki.

⁹Ki ɗûŋ sini luwuŋ n’e pi porte sini ɗa, sini porte na mini magala na mini fuŋ n’abakai lai.

¹⁰Won hlai n’Epiɗ-ɗai Alaw na wiiki a kiki li aha midini afti n’a ha wala mini wiiɗi tamaiki: Abraham, Isak gaini Yakob lai ɓa aga a siŋki, afti na gaini fuŋ n’abakai na pɗamai lai warni na ki rgiŋ gaini tiki kai,

¹¹na gaini dalam na gaini vi gaini wazagai na pɗamai, na ki miliŋ warni ki ɗi tiki kai, kalaŋai zi yem tiɓ tiɓ na ki ɓiliŋ ki ɗi tiki kai, luwuŋ zi vin gaini luwuŋ Olive na ki piŋ ki ɗi tiki kai, nɵa hlai na ki simiŋ ki vi li ɗa,

¹²ki zi hangal kapai miɗiki a wula gaini EPIƊ-ƊAI n’a milikisi edi midini afti n’Egipte par war hlai na ki ɗi sika warni aŋ bege ɗa kai.

¹³Ki zini hormo ɗa wiini Epiɗ-ɗai Alaw na wiiki, ki ziɗa a ɵeŋni lai, ki hi wala miki ɗa gaini yikini.

¹⁴Ki tiki futi piɗi alawai na zamai ɗa kai, alawai na wiiɗi ɗai n’e gûniki azumai ɗa,

¹⁵buri ɓa Epiɗ-ɗai Alaw na wiiki n’a na arbaki ɗa a Alaw n’a ɗiya midini seŋni n’a muɗaŋ ɗa, ki zi hangal kapai Epiɗ-ɗai Alaw na wiiki a za hiy siki kai, kapai a vidiki edi midini afti par kaalai.

¹⁶Aga ki zi wala n’Epiɗ-ɗai Alaw na wiiki a za hiy burini maini na ki ziŋsi a Masa ɗa nɵa kai.

¹⁷Gadai gaini hitrai gaini gadai zi ɗû na wiini Epiɗ-ɗai Alaw na wiiki n’a siŋki ki yimiŋ pɗem.

¹⁸Ki zi ɗa a wazagai na gaini futini n’a tala arni EPIƊ-ƊAI pɗamai, nɵa aga ki nivi pɗem, kapai ki niyi aha, ki tiki afti na pɗem n’Epiɗ-ɗai Alaw a ha wala mini wiiɗi tamaiki ɓa aga a siŋɗi lai.

¹⁹Aga ki birgiɗi gawki edi siki par gaigai maini n’EPIƊ-ƊAI a muɗaŋ ɗa nɵa.

²⁰Na ɓa dawai sek waŋ hlai n’aliki e zilbiki li ɓa: Epiɗ-ɗai Alaw na wiimu, a siki htrai hanɗa gaini gadai zi ɗû gaini gadai zi ɗiyi lai hanɗa lai buri ma ɗi ɗa?

²¹Aga ki wiyiɗi seŋ ɓa: Tiyi mi ɗisi ka aŋ bagakai na wiini Faraw war Egipte, EPIƊ-ƊAI a piliyisi edi war Egipte par gaini spak n’abai gara.

²²EPIƊ-ƊAI a za wazagai zi siŋki gaini wazagai zi hiila n’abakai na gir gara lai wuzani aryi siɗi Egipte, sini Faraw, siɗi pakataini lai.

²³Amma tiyi ɗa a miliyisi edi woni par a kiyisi aha midini afti n’a miɗiɗi wiiɗi tamaiyi gaini, n’a ha wala mini lai buri a siŋyi.

²⁴EPIƊ-ƊAI a miɗiyi buri mi zi pini gadai hanɗa paŋ, buri mi sini hormo wiini Epiɗ-ɗai Alaw na wiimu lai, kapai mi nivi pɗem mefeŋ paŋ, a hiniyi karyi lai maini na mi ɗa girna na ɗa nɵa.

²⁵Na ɓa mu fuɗumu was aŋ zi pini gadai na wiini Epiɗ-ɗai Alaw na wiimu maini n’a muɗuŋmu nɵa, aga mu zumu aŋ na jrekai.