Read Mousgoum Wiyi na midini gadai 7 Bible Online

Wiyi na midini gadai 7 - Mousgoum bible

Wiyi na midini gadai 7

¹Won hlai n’Epiɗ-ɗai Alaw na wiiki a kiki li midini afti n’aga ki tikiŋ aŋ wiiki ɗa, Won hlai n’e birgiɗi pinziba n’abakai maiɗi: Hittitekai, Girgazitekai, Amoritekai, Kananiyakai, Perizzitekai, Hivitekai gaiɗi Yebuzitekai lai, pinziba muguzak, na vokɗi viya, na spakɗi a siiwiki lai edi wuzaki par ɗa,

²Won hlai n’Epiɗ-ɗai Alaw na wiiki a siɗi li war tiki, ki rɗi li amai midiɗi ɗa aga ki fiɗiɗi edi marwai, ki zi bonu arbaki gaiɗi pinziba hanɗa kai, ki hiini haw buriɗi kaalai.

³Ki zi bonu gaiɗi war tiki kai, ki siɗi aliki na falakai wiiɗi aliɗi na maɵagai ɗa kai, ki miliɗisi aliɗi na falakai wiiɗi aliki na maɵagai ɗa kaalai,

⁴buri ɓa pinziba n’edi par hanɗa, aga e tiniɗi aliki edi sa par, e hûrgi azumai wuzani alawai na zamai; nɵa EPIƊ-ƊAI aga a faka gaini hiy n’abai siki a vidiki edi tizaw lai.

⁵Amma aga ki zi siɗi pinziba hanɗa maini nɵa: Giwiŋ zi ɓaka na wiiɗi ki hûŋ azumai, alawaiɗi z'ali-fuŋ na wiiɗi ki gɵiŋ edi, luwoŋai z'alaw na wiiɗi ki biliŋ azumai, alawai zi rgi na wiiɗi ki yiŋ edi lai.

⁶Buri ɓa tiki ki ɗi ɗai na gaini viri edi ɗaw wiini Epiɗ-ɗai Alaw na wiiki. Arbaɗi pinziba na midiɗi ɗa yai paŋ EPIƊ-ƊAI a viriki ki ɗi tiki, kapai ki zi aŋ walani na agulni a firiya midini gara.

⁷Na ɓa EPIƊ-ƊAI a diriki, a viriki edi ɗaw lai ɗa, a na buri na ɓa tiki ki ɗi viya ki sûwiɗi pinziba na zamai paŋ gaini abai kai nɵa kai, tiki kai tiɓ maa ki ɗi vok n’agwi na piɗi marki paŋ.

⁸Amma na ɓa EPIƊ-ƊAI a plikisi edi, a wirikisi edi war hlai na ki ɗisi ka woni aŋ bege war tini Faraw pai n’Egipte par gaini spak n’abai gara ɗa, a zaŋ nɵa buri ɓa a diriki, a ɗiya midini wala n’a haŋ mini wiiɗi tamaiki.

⁹Aga ki yimiŋ miɗiki ɓa, Epiɗ-ɗai Alaw na wiiki ɗa a Alaw, a Alaw na jre. A ɗiya midini bonuni n’a zaŋ gaini pɗemni lai haa sini vuna dubu na wiiɗi nagai n’e diriŋ n’e yimi gadaini,

¹⁰Amma nagai n’e bili gaw sini a virgiɗi tizaw, a vidiɗi edi; ni n’a bla gaw sini ɗa a vurgaŋ tizaw tar, a vala arni sini kai.

¹¹Ki yimi gadai gaini gadai zi ɗû gaini gadai zi ɗiyi na mu na siŋki girna ɗa, ki zi pini.

¹²Na ɓa ki tiki hangalki li sini gadai zi ɗiyi hanɗa, ki yimiŋ li, ki zi li pini lai ɗa, Epiɗ-ɗai Alaw na wiiki aga a ɗiya midini bonu n’a zaŋ gaiki gaini pɗem n’a ha wala mini wiiɗi tamaiki, ɓa aga a zaŋ siɗi lai.

¹³Aga a diriki, a ɓikiki, a biŋdiki viya, a ɓikiɗi ali na warki, seyem na midini aftiki, algamaki, viŋki gaini emelki, aga a riya farani ɵaakaiki gaini adumaiki gaini haakaiki lai amai midini afti n’a ha wala mini wiiɗi tamaiki ɓa aga a siŋki.

¹⁴Aga ki nivi ɓiki ki sûwiɗi pinziba na zamai ɗa paŋ, arbaki ɗa muni kai, wus kai, wala n’ezini puɗu na war faraki kai, wala ktai maa aga a muɗaŋ kai.

¹⁵EPIƊ-ƊAI aga a birga veglekai na maafanai edi siki par, aga a hinasi gir n’abakai n’a za siɗi Egipte na ki tiliŋ gaini arki a halasi miɗiki kai, a ɵina gir hanɗa midiɗi nagai n’e diriki kai ɗa.

¹⁶Aga ki vidiɗi pinziba n’Epiɗ-ɗai Alaw na wiiki aga a siɗi war tiki edi gaini hiinini haw kai, aga ki hûrgi azumai wuzani alawai na wiiɗi kaalai, buri aga e biŋdi buriki aŋ azaw.

¹⁷Ablaŋtaŋkai aga ki hiini warɗi agulki ɓa: pinziba hanɗa e sûwi viya gara, e sûwiŋa ta, kapai mu birgiɗi edi midini aftiɗi par maɵa maɵa ɗi ɗa?

¹⁸Ki hûniɗi kai, aga ki hini miɗiki a kɵa gaini wala n’Epiɗ-ɗai Alaw na wiiki a ziŋni wiini Faraw gaini Egipte paŋ lai.

¹⁹Ki hini miɗiki a kɵa gaini gir n’abakai na ki tiliŋ gaini arki, gaini wazagai zi siŋki gaini wazagai zi hiila hanɗa, ki hini miɗiki a kɵa gaini spak n’abai gara n’Epiɗ-ɗai Alaw na wiiki a milikisi edi war Egipte par gaini. Nɵa Epiɗ-ɗai Alaw na wiiki aga a za maini hanɗa ɵa sini pinziba paŋ n’aga ki zi hunai wuzani ɗa.

²⁰Epiɗ-ɗai Alaw na wiiki aga a ɵinasi agonai midiɗi haa nagai n’e hini, n’e ŋûyi wuzaki paŋ a vidiɗi edi kafa.

²¹Ki ziriyi wuzaɗi kai, buri ɓa Epiɗ-ɗai Alaw na wiiki a na arbaki blaŋ, Alaw n’abai na ɗif a ɵa dawaŋ gaini kai.

²²Epiɗ-ɗai Alaw na wiiki aga a birgiɗi pinziba hanɗa edi wuzaki agwiya agwiya. Ki vidiɗi edi tizaw tar kai, ɵa kai ɗa wazagai na buza ɗa aga a sisiɗa viya e ziki.

²³Paŋ ktai, Epiɗ-ɗai Alaw na wiiki aga a siki pinziba hanɗa war tiki, aga a hina hunai n’abai a yimiɗi haa e vidi edi kafa.

²⁴Aga a siɗi paakaiɗi war tiki, aga ki vidi yikiɗi edi midini afti par, ktai n’aga a ɗiya miki aŋ kai haa ki vidiɗi edi kafa.

²⁵Alawai zi rgi na wiiɗi ki yiŋ edi. Ki zi suna sini arzaŋ gaini or n’aŋ sini ɗa kai, ki miliŋ kaalai, kapai a bunda buriki aŋ azaw kai, buri a wala na hi-hir arni Epiɗ-ɗai Alaw na wiiki.

²⁶Ki ki wala na hi-hir maini hanɗa ɵa aha war dalamki kai, kapai e vidiki edi maini wala hanɗa nɵa kai. Tiki aga ki firiyiŋ kai, ki tiliŋ maini wala na hi-hir nɵa, buri ɓa a wala zi tûûri edi.