Read Mousgoum Wiyi na midini gadai 8 Bible Online

Wiyi na midini gadai 8 - Mousgoum bible

Wiyi na midini gadai 8

¹Gadai na mu na siŋki girna na ɗa, ki fiɗi was aŋ zi pini kapai ki simni karki, ki sisiɗi viya, ki tiki afti n’EPIƊ-ƊAI a miɗiɗi wiiɗi tamaiki gaini a ha wala mini lai ɓa aga a siŋɗi ɗa.

²Ki hini miɗiki a kɵa gaini hiliki n’e hiliŋ edi war basga na kaɗataŋ n’Epiɗ-ɗai Alaw na wiiki a tikiŋki miɗiki haa buza doogo doogo puɗu, kapaya ziki gir, a titimiki kapai a sɗa wala n’aŋ warɗi agulki ɗa, kapai a tiliki haw, ki yimi gadaini zaw ki yimiŋ kai ɗi ɗa.

³Nɵa a ziki gir, a hinikti wiyamai te ziki, asiki manna na tiki kaalai, tamaiki kaalai ɗif ktai maa a sɗaŋ kai kapai a yima miɗiki ɓa ɗif a sumna karni gaini ɓuk kiini kai, amm a sumna karni gaini paŋ n’a niyasi edi mini EPIƊ-ƊAI par.

⁴Wa r buza na doogo doogo puɗu hanɗa sapa na siki a ɓasa edi kai, eziki a hitla kaalai.

⁵Ki yimiŋ miɗiki ɓa pɗem ɓa Epiɗ-ɗai Alaw na wiiki a nafu aŋ gidiki maini api n’a gada ahini nɵa.

⁶Ki yimi gadai na wiini Epiɗ-ɗai Alaw na wiiki, ki tiki futi pini, ki sini hormo lai.

⁷Buri Epiɗ-ɗai Alaw na wiiki a kiki na ɗa midini afti na pɗem, afti zi yem zi ki, zi yem zi liwi gaini yem n’azumai pini hlai n’a cirɗasi amai war hudokai gaini huwoŋai lai,

⁸a afti z'algama, zi orge, zi luwuŋ zi vin, zi luwuŋ Fige gaini luwuŋ grenade lai. Afti zi luwuŋ Olive gaini emelni ami,

⁹a afti na wala zi simi na warni e wiriŋ gaini wûri kai, woni wala ktai n’a sûwiiki aŋ kai, a afti n’ali-fuŋ ɗa a kawai, ki yimisi kawai na mekele sini huwoŋaini par lai.

¹⁰Won hlai n’aga ki simi, ki vi lai, ki si kol sini Epiɗ-ɗai Alaw na wiiki burini afti na pɗem n’a siŋki ɗa.

¹¹Ki zi hangal, ki hini miɗiki a wula gaini Epiɗ-ɗai Alaw na wiiki kai, gaini gadaini kai, gaini gadaini zi ɗiyi gaini zi ɗûkai, maini na mu na siŋki girna na ɗa kai.

¹²Won hlai na ki simi ki vi li ɗa, Won hlai na ki rgi dalam na pɗamai li ki simni li warni ɗa,

¹³Won hlai na ɵaakaiki gaini adumaiki a sisiɗa li viya, arzaŋ gaini or a za li siki viya, na wazagaiki paŋ a za li viya ɗa,

¹⁴nɵa, ki zi hangal kapai kûlini-si a niya warki, haa miɗiki a wula gaini Epiɗ-ɗai Alaw na wiiki n’a milikisi edi warɗi Egipte, na ki ɗisi ka woni aŋ bege par.

¹⁵A gûnikisi edi war basga na kaɗataŋ n’abai zi mili hunai pini ɗif, na gaini vi tini wala meefeŋ zi musnaw gaini hurdi lai. Midini afti na hûleŋ na yem warni kai par, EPIƊ-ƊAI a luɓasi yem edi buriki siɗi huwuŋi na gɗeŋi kaŋ par.

¹⁶A ni n’edi war basga na kaɗataŋ ni ɗa, a siki ma na na tamaiki e siɗiŋ ka kai aŋ simi kapai a ziki gir, a titimiki lai, asakal par a ziki pɗem.

¹⁷Aga ki hiini kai ɓa ki zi aŋ ɗai zi farai gaini gdaŋki,

¹⁸Ki hini miɗiki a wula gaini Epiɗ-ɗai Alaw na wiiki kai, buri ɓa a siki gdaŋ aŋ nivi farai hanɗa A ni, kapai a ɗiya midini bonuni n’a zaŋsi gaiɗi tamaiki, a za girna ɵa na ɗa buri hanɗa.

¹⁹Na ɓa miɗiki a wula li gaini Epiɗ-ɗai Alaw na wiiki ɗa, na ɓa ki tiki futi li pini alawai na zamai, na ɓa ki zi ɵeŋɗi, ki hûgi azumai wuzaɗi lai ɗa, mu ziki zaida girna ta, aga ki vidi edi marwai,

²⁰aga ki vidi edi marwai maiɗi pinziba n’EPIƊ-ƊAI a vadaŋ edi wuzaki marwai ɗa nɵa, buri na ɓa ki ɵini pini Epiɗ-ɗai Alaw na wiiki kai.