Read Mousgoum Wiyi na midini gadai 9 Bible Online

Wiyi na midini gadai 9 - Mousgoum bible

Wiyi na midini gadai 9

¹Slini pɗem ɗai na Izrayel, girna ki ɗa hiwi Yurdan ɗa amai kapai ki hili ki tiki afti n’abakai a suwa na wiiki, spak a suwa na wiiki lai, na gaini fuŋ n’abakai n’abakai warni, gaini ɵaga sini, mogoni n’amai sek haa sini hlai n’amai ta ta.

²Aga ki rɗi amai midini pinziba n’abai na ɗai na warni mogokai n’e yikiɗi ɓa: Anakitekai, na tiki ki siɗiɗi, na ɗai e miɗi gaiɗi ɓa: n’a kiɗa a ɗiya miɗi asiya ɗi ɗa.

³Girna aga a yima miɗiki ɓa, Epiɗ-ɗai Alaw na wiiki aga a ɵa edi wuzaki maini afu n’a ya wala nɵa, aga a vidiɗi edi kafa, aga a hûsiɗi azumai wuzaki, aga ki birgiɗi edi, ki vidiɗi gaini yafai kai maini n’EPIƊ-ƊAI a miɗiŋki nɵa.

⁴Won hlai n’Epiɗ-ɗai Alaw na wiiki a birgiɗi li edi wuzaki, aga ki miɗi kai ɓa EPIƊ-ƊAI a siyi afti hanɗa buri jre na wiyi, buri EPIƊ-ƊAI a birgiɗi pinziba hanɗa edi wuzaɗi buri meefeŋ na wiyi, ki miɗi ɵa kai.

⁵Na ɓa ki tiki aftiɗi ɗa, a za nɵa buri ɓa ki ɗa jrekai gara ɗa kai, buri ɓa agulki te na ɗikat kaalai, amma Epiɗ-ɗai Alaw na wiiki a zaŋ nɵa buri meefeŋ na wiiɗi pinziba hanɗa. A zaŋ nɵa kapai a va wala n’a haŋ mini wiiɗi tamaiki: Abraham, Isak gaini Yakob lai amai.

⁶Ki yimiŋ miɗiki pɗem ɓa Epiɗ-ɗai Alaw na wiiki a siki afti na pɗem hanɗa ɓa ki tikiŋ aŋ wiiki na ɗa pini jre na wiiki kai, buri ɓa tiki ki ɗi ɗai na hiraŋai gara.

⁷Hini miɗiki a kɵa, hini miɗiki a wula kai ɓa ki ɓilkini agulni Epiɗ-ɗai Alaw na wiiki edi warni basga na kaɗataŋ. Daga ki niyisi aha war Egipte par haa ki cûsi woŋna, tiki ki ɵini mini EPIƊ-ƊAI kai.

⁸A Horeɓ ɗa, tiki ki ɓilkini agulni EPIƊ-ƊAI, EPIƊ-ƊAI a za hiy siki haa a dara a vidiki edi.

⁹Won hlai na mu niya amai midiɗi huwuŋ aŋ milisi alini fuŋ na babɗamai, ali-fuŋ na wiini bonu n’EPIƊ-ƊAI a zaŋ gaiki ɗa, mu fanasi amai midiɗi huwuŋ mefeŋ doogo doogo puɗu, girvudi kai, duvuk kai mu suma wala kaalai, mu sa yem kaalai.

¹⁰EPIƊ-ƊAI a saŋasi ali-fuŋ na babɗamai na sulu na Ni gaini midini dama a ɗo warni gaiɗi ahini tini, a ɗo seŋ n’a miɗiŋkisi amai par midiɗi huwuŋ amlai arni afu par war mefeŋ na wiini diŋgi warni.

¹¹EPIƊ-ƊAI a saŋasi ali-fuŋ na babɗamai, ali-fuŋ na wiini bonu, asakalni mefeŋ na doogo doogo puɗu par.

¹²Nɵa EPIƊ-ƊAI a muɗaŋa: niya azumai witaw, buri ɓa ɗaiki na ku miliɗisi edi war Egipte par ɗa e hiniti futiŋa edi mak, gaini yafai kai e hiniti futi na mu siŋkitiɗi edi mak; e rgi wala z'alaw gaini kawai n’a hiliya.

¹³EPIƊ-ƊAI a muɗaŋa, mu tiliɗi ɗai hanɗa haa ɗa, e ɗi ɗai na hiraŋai,

¹⁴hiniŋa mu vidiɗi edi, mu haza yikiɗi edi midini afti par, aga mu bunduku tuku aŋ pinziba zi spak, na viya lai a sûwiɗi ɗai hanɗa.

¹⁵Mu niyasi azumai midiɗi huwuŋ par ali-fuŋ na babɗamai na wiini bonu ta yaw, sini huwuŋ paŋ a afu.

¹⁶Mu navaŋ ɓa ki zi tuwur sini Epiɗ-ɗai Alaw na wiiki, ki rgi ahi ɵeŋ gaini kawai zi hiliyi aŋ alaw, gaini yafai kai ki hiniti futi na n’EPIƊ-ƊAI a siŋkitiki ɗa edi mak.

¹⁷Nɵa mu mula ali-fuŋ na babɗamai na sulu, mu pokoŋ azumai, mu haaɗaŋ edi wuzani arki.

¹⁸Mu hurga azumai wuzani EPIƊ-ƊAI maini n’avut, mefeŋ doogo doogo puɗu, duvuk kai, girvudi kaalai mu suma wala kai, mu ca yem kaalai. Mu zaŋ nɵa burini tuwur na ki ziŋ paŋ, buri ki ɓilkini agulni EPIƊ-ƊAI, ki zi wazagai n’a firiya burini kai.

¹⁹Buri hunai a yimaŋa gara wuzani hiy gaini suwar na wiini EPIƊ-ƊAI na agulni a ɓulka siki haa a dara a vidiki edi ɗa, gaini hanɗa paŋ EPIƊ-ƊAI a ɵina tûwiŋa pra.

²⁰EPIƊ-ƊAI a za hiy abai lai sini Aaron, a firiya a fuɗaŋ edi, mu siiwa burini Aaron w ar sarti hanɗa lai.

²¹Mu tika ahi ɵeŋ n’e rgiŋ ɗa, tuwur na ki ziŋ ɗa mu bulaŋ arni afu, asakal par mu haaɗaŋ edi ɓaw ɓaw, mu saraŋ edi kriyit, avudini mu pokoŋ arni yem n’a kasi amai par siɗi huwuŋ ɗa.

²²A Tabera, a Masa gaiɗi Kibrot-Taba lai, tiki ki ɓilkitini agulni EPIƊ-ƊAI.

²³Pra, Won hlai n’EPIƊ-ƊAI a ɵinikisi war Kades-Barneya gaini miɗi na ɓa: ciki afti na mu siŋki ɗa, ki tikiŋ aŋ wiiki lai ɗa, tiki ki zi hiriŋ sini miɗi na wiini Epiɗ-ɗai Alaw na wiiki ki yimiŋ kai.

²⁴Haa sa na mu sɗiki par ki ki ɗa fiki amai sini EPIƊ-ƊAI maini hanɗa nɵa.

²⁵Won hlai n’EPIƊ-ƊAI a firiya a vidiki edi ɗa, mu hurga azumai wuzani EPIƊ-ƊAI mefeŋ doogo doogo puɗu duvuk kai girvudi kaalai mu kala weseŋ kai.

²⁶Mu siiwa EPIƊ-ƊAI maini nɵa: Epiɗ-ɗai Alaw ku tûriɗi ɗaiku edi kai, e ɗi walaku, ku piliɗisi edi war Egipte par gaiɗi abaiku, gaini spakku lai.

²⁷Hina muduku a kɵa gaini Abraham, Isak gaini Yakob lai na ɗaiku, ku mula arku sini hiriŋ na wiiɗi ɗai hanɗa gaini tuwurɗi kai.

²⁸Kapai ɗai na midini afti na ku miliyisi woni par ɗa e miɗi kai ɓa: EPIƊ-ƊAI gdaŋni a kiɗa a kiɗi midini afti n’a miɗiɗi gaini kai, a miliɗi edi na ɗa buri ɓa a firyiɗi kai.

²⁹E ɗi ɗaiku, e ɗi walaku, ku miliɗisi edi gaini gdaŋku gaini spakku n’abai gara.