Read Mousgoum Yohana 10 Bible Online

Yohana 10 - Mousgoum bible

Yohana 10

¹Jre, jre, mu miɗiki: Ɗif n’a niya amlai warni farani adumai mini magala par kai, amma a prasi midini hlai ɗa, ɗif hanɗa a ɗif zi mihill, a gorɓolo.

²Amma ni n’a niya amlai war mini magala par a ɗif zi giɗimi na wiini adumai.

³Ɗif zi giɗimi a mala mini hlai edi burini, adumaini a ɵina wulani, a yika adumaini gaini yiki, a mulaŋsi anene lai.

⁴Won hlai n’a mulaŋsi li anene paŋ ɗa, a ɵa wuzani, adumai a hala pini lai, buri ɓa a sɗa wulani ya.

⁵A kiɗa a hala pini ɗif n’a sɗaŋ kai ɗa kai, aga a pra edi wuzani buri a sɗa wulaɗi ɗai na morkokoi kai.

⁶Yesu a miɗiɗi warni seŋ zi siŋka maini hanɗa, amma nagai e ɵini ezini seŋ n’a miɗiŋɗi edi kai.

⁷Yesu a miɗiɗi pra: Jre, jre, Ta mu magala na wiini adumai,

⁸nagai n’e hilisi wuza ɗa paŋ e ɗi mahalakai gaiɗi gorɓolokai, amma adumai a ɵina piɗi kai.

⁹Ta ɗa mu mini magala, ɗif n’a niya li amlai sa par ɗaw ɗa aga a nava kûri, aga a niya amlai, a niya anene a nava hlai zi kuzum lai.

¹⁰Ɗif zi mihill ɗa a halasi buri a hala, buri a fuɗa, buri a tuura wazagai edi, amma ta mu halasi ɗa aŋ siɗi suŋfa kapai a za siɗi abai ta.

¹¹Ta ɗa mu ɗif zi giɗimi na pɗem, ɗif zi giɗimi na pɗem a sa sini edi burini adumaini.

¹²Ɗif zi gɗam n’a za sda burini farai, ni a ɗif zi giɗimi na gaini futini kai, na adumai ɗa a wiini kaalai, won hlai n’a tala li belemke a na halasi ɗa, a pra edi, a hina adumai ɗa ɵar, belemke a yima adumai ɗa, a ɵaraŋ edi lai.

¹³Ni a za sda burini vrak, hiinini a na midini adumai ɗa kai.

¹⁴Ta mu ɗif zi giɗimi na pɗem, mu sɗa adumaiŋa, adumaiŋa a sɗaŋa lai.

¹⁵Maini n’Api a sɗaŋa, ta lai mu sɗa Api lai nɵa, mu sa suŋfaŋa edi burini adumaiŋa.

¹⁶Adumaiŋa zamai a na, n’a na amlai warni fara hanɗa kai, ni lai a dewele ɓa mu payaŋsi, aga a ɵina wula, aga a bunda aŋ fara ktai, ɗifni zi giɗimi ktai lai.

¹⁷Api a daraŋa buri ɓa mu sa suŋfaŋa edi ta, kapai mu waya pini aŋ tikaŋ asakal par.

¹⁸Ɗif a kiɗa aŋ tikaŋ ta par kai, mu saŋ edi pini diriŋa, spakɗa a na buri mu saŋ edi, spakɗa a na buri mu tikaɗsi lai, hanɗa a gadai na mu navaŋ sini Apa par ɗa.

¹⁹Ɓraw a za arbaɗi Yudeyakai pini seŋ hanɗa,

²⁰viya arbaɗi e miɗi: Ksalai aŋ midini, a ɗif zi dûûli, ki ziɓiri seŋni buri maɗa?

²¹Zamai e miɗi: Hanɗa a miɗi na wiini ɗif na kɵai aŋ midini ɗa kai koo. Ksalai a mala arbi ɗif na melveŋ edi ɗe!

²²Fet na wiini milini mini tempel a za war Yeruzalem, a za na ɗa amsai.

²³Yesu a paya amlai warni tempel pini balak na wiini Salmun.

²⁴Yudeyakai e hiriŋ azumai e miɗini: Miɗiyi haw ɗa, tuku ku Kristu ɗi?, Aga ku hiniyi war siɗi kai ɵa haa kas wara ɗa?

²⁵Yesu a waya seŋ a miɗiɗi: Mu miɗiŋki ya, amma tiki ki diri ki yimi kai, wala n’a za zaida ɗa a sɗa na ta mu zaŋ war yikini Api ɗa.

²⁶Amma na ɓa tiki ki yimi kai ɗa, a za na ɗa buri ɓa ki ɗi adumaiŋa kai.

²⁷Adumaiŋa a ɵina wula, ta mu sɗaŋ, a hala pa lai.

²⁸Ta mu sini suŋfa n’a vada kai, aga a ɓa edi kai zaŋ, ɗif a kiɗa a hûltiɗi edi war ta par kai.

²⁹Wala na Api a saŋŋa ɗa abai a suwa paŋ, ɗif a kiɗa a hultaɗ tini Api par kai.

³⁰Ta gaini Apa mi ɗi wala ktai.

³¹Yudeyakai e mili kriyit buri e fiɗiŋ edi.

³²Yesu a miɗiɗi mu siɗkiki wazagai na pɗamai na sini Apa par viya, na ki fiɗiɗa edi burini ɗa a na wata ɗa?

³³Yudeyakai e wiyi seŋ e miɗini: mi fuɗuku edi gaini kriyit burini sda na pɗem ɗa kai, amma burini tirki na ku tirka Alaw ɗa, tuku ku ɗif, amma ku za suku aŋ Alaw.

³⁴Yesu a wiyiɗi seŋ a muɗa: Aŋ gaini ɗû war gadai zi ɗû na wiiki ɓa, mu muɗa ya ɓa tiki ki ɗi alawai nɵa kai ɗi?

³⁵Nɵa e yikiki aŋ alawai na ɗa, e ɗi nagai na seŋni Alaw a muɗa siɗi ɗa, ɗû hanɗa a kiɗa a haza edi kai.

³⁶Tiki ki miɗi wiini ni n’Api a varaŋ edi, n’a ɵinaŋsi warɗi yai lai ɓa: Ku na tirka Alaw, buri mu muɗa ɓa m’Ahini Alaw ɗa!

³⁷Na ɓa mu za na ɗa a sda na wiini Apa kai ɗa, ki yimi wiiki pa kai.

³⁸Na ɓa mu na zaŋ ɗa, koo ki yimi pa kai tekeɗeɗi ɗa, ki yimi pini sda hanɗa, ki yimiŋ miɗiki pɗem ɓa, Api aŋ wara ta, ta m’aŋ warni Api lai.

³⁹E piyiŋ aŋ yimiŋ pra, amma e kiɗi aŋ yimiŋ kai.

⁴⁰A waya anene kata duɓani ra Yurdan par won hlai na Yohana a sa baptisme woni avut, a sumna warni lai.

⁴¹Ɗai viya e hilisi sini e miɗi: Yohana a za wala ktai zi siŋki kai, amma wala na Yohana a muɗaŋ midini ɗif hanɗa paŋ ɗa a jre.

⁴²War hlai ni ɗai viya e yimi warni.