Read Mousgoum Yohana 11 Bible Online

Yohana 11 - Mousgoum bible

Yohana 11

¹Ɗif ktai a nafu veglek, yikini Lasarus, a na Betaniya war fuŋ na wiiɗi Mariya gaiɗi Marta na tawalɗi par.

²Te Mariya na te ma yitir sini Yesu, te girdini ezini gaini ayir na midiɗi lai ɗa, a nafu veglek ɗa a Lasarus na tawalɗi.

³Tawalakaini na falakai na sulu e ɵini ɗif sini Yesu aŋ miɗini ɓa: Marmaiku ɗa a na veglek.

⁴Won hlai n’a ɵina hanɗa a muɗa: Veglek hanɗa a veglek zi mri kai, amma a na buriɗi abai na wiini Alaw, kapai war veglek hanɗa par ɗa, Ahini Alaw a nava kol.

⁵Yesu a diriti Marta gaiɗi tawalɗi gaini Lasarus lai.

⁶Nɵa won hlai n’a ɵina ɓa Lasarus a na veglek ɗa, a fana woni hlai ni mefeŋ sulu pra.

⁷Asakal par a miɗiɗi wiiɗi ɗai zi hitri: Wuyumu war Yudia.

⁸Ɗai zi hitri e wiyi seŋ e miɗi: Rabbi, gobi na tar, Yudeyakai e piyi aŋ fuɗuku edi gaini kriyit, tiyana ku waya ka woni pra!

⁹Yesu a waya seŋ a miɗiɗi: Yuvai ɗa, ler warɗi doogo pi sulu kai ɗi? Na ɓa ɗif a paya girvudi ɗa ezini a daba sini wala kai, buri ɓa a n’a tala gaglai na wiiɗi yai hanɗa.

¹⁰Amma na ɓa ɗif a paya war duvuk ezini a daba sini wala, buri ɓa gaglai aŋ warni kai.

¹¹Asakal n’a muɗa hanɗa ya, a muɗa pra: Lasarus na marmaimu ɗa a kala weseŋ kal, amma aga mu hala mu ɵiyaŋ amai war weseɗni par.

¹²Ɗai zi hitri e wiyi e miɗini: Epiɗ-ɗai, na ɓa a kala ɗa a weseŋ ɗa aga a zuula.

¹³Yesu a muɗa na ɗa midini mrini, amma nagai e hiini ni a muɗa midini weseŋ kadai.

¹⁴Nɵa Yesu a miɗiɗi edi gaglai ɓa Lasarus a mra su.

¹⁵Buriki tiki ɗa, mu firiya buri mu nafu kai kapai tiki ki yimi, gaini hanɗa paŋ ɗa, hulumu sini.

¹⁶Tumas n’e yikiŋ ɓa, teyek, a miɗiɗi wiiɗi ɗai zi hitri na zamai ɗa ɓa: Tulumu lai, hulumu kapai mu murumu gaini.

¹⁷Won hlai n’a co ɗa, a nava Lasarus a fana warni waŋ mefeŋ puɗu.

¹⁸Betaniya ɗa te nafu gobi gaiɗi Yeruzalem, a za kilo metir hu ɗi.

¹⁹Yudeyakai e hilisi siɗi Marta gaiɗi Mariya aŋ siɗi arai zi pi burini mrini tawalɗi.

²⁰Won hlai na Marta te ɵina ɓa Yesu a na halasi te hala mini, mariya te hina ka aha dam.

²¹Marta te miɗini wiini Yesu, Epiɗ-ɗai, ku nafu won na ɗa, tawala a siɗa aŋ mra kai.

²²Amma tiyana kaw, mu sɗa ɓa wala paŋ na ku zilba Alaw li midini ɗa, aga Alaw a suŋku.

²³Yesu a miɗiɗi: tawalku aga a ɵiyasi amai. Marta te miɗini: Mu sɗa ya aga a ɵiyasi w ar ɵiyi n’amai na war mefeŋ na asakal.

²⁴

²⁵Yesu a miɗiɗi: Ta mu ɵiyi n’amai gaini suŋfa lai, ɗif n’a yima wara ɓa koo ɓa a mra tekeɗeɗi aga a sumna karni.

²⁶Asiya ɗi paŋ n’a na karni, n’a yima wara lai, ni aga a mra kai zaŋ, ku yima hanɗa ɗi?

²⁷Te miɗini: Nkam, Epiɗ-ɗai, tuku ku Kristu, Ahini ni n’aga a halasi warɗi yai ɗamu yima ɓa tuku ko Kristu Ahini Alaw, ni n’aga a halasi midiɗi yai.

²⁸Asakal na te muɗa hanɗa ya, te hala wiiɗi. Asakal par te yikiti Mariya na tawalɗi te miɗiɗi gaini wulaɗi azumai ɗaw: Api zi hitri a cosi ya.

²⁹Won hlai na te ɵina hanɗa, te faka amai witaw aŋ hala sini.

³⁰Buri ɓa Yesu a niya aha warni fuŋ ɗa kai hai, a nafu won hlai na Marta te nava gaini woni ɗa.

³¹Yudeyakai n’e ɗifu aha gaiɗi Mariya aŋ siɗi arai zi pi, won hlai n’e tiliti te faka amai witaw, e tikisi futi piɗi, e hiini ɓa te hala edi mini waŋ aŋ tuwi.

³²Won hlai na Mariya te cosi war hlai na Yesu aŋ woni ɗa, won hlai na te talaŋ te bla siɗi azumai ezini te miɗini: Epiɗ-ɗai, ku nafu woni na ɗa, tawala a sɗa aŋ mra kai.

³³Won hlai na Yesu a tiliti te na tuwa, a tiliɗi Yudeyakai n’e hilisi gaiɗi e ɗa e tûûwi lai ɗa, hangalni a turla, a nuuma war sezeni, a kwima lai.

³⁴A muɗa: Ki tikiŋ wata ɗa? E wiyi seŋ e miɗini: Halasi kapai ku talaŋ.

³⁵Yesu a kɵa edi aŋ tuwi.

³⁶Nɵa Yudeyakai e miɗi: A marmaini fakat sike.

³⁷Amma zamai arbaɗi par e miɗi: Ni n’a mala arni ɗif na melveŋ edi ɗa, a kiɗa a ɗala mri na wiini ɗif hanɗa kai ɗe!

³⁸Yesu a nuuma a pra, a hala edi mini waŋ, a waŋ na siɗi huwuŋ, ahini fuŋ mini gaini dûgû duk.

³⁹Yesu a muɗa: Likititi fukuni na mini ɗa edi. Marta na tawalni ni n’a mra ɗa te miɗini: Epiɗ-ɗai, aŋ ta ɗa a na luguza, buri mu ɗumu na ɗa war mefeŋ n’ag'aŋ puɗu.

⁴⁰Yesu a miɗiɗi: Mu muɗuku ɓa: Ku yima li ɗa aga ku tiliti abai na wiini Alaw kai ɗi.

⁴¹Nɵa e likititi fukuni ɗa edi, Yesu a bunda arni amai a muɗa: Apa mu zuku tese buri na ɓa ku ɵina ma.

⁴²Ta ɗa mu sɗa ɓa ku na ɵina ma kureɗ, amma mu muɗa na ɗa buriɗi firiɗi ɗai n’e ɗa woni na ɗa kapai e yimi ɓa ku ɵinaŋasi ku tuku.

⁴³Asakal n’a muɗa hanɗa ya, a ɗuula a muɗa: Lasarus, niyasi edi.

⁴⁴Ɗif zi mri a niyasi edi, tini gaini rgi gaini sogom, sapa gaini rgi arni ɓak lai, Yesu a miɗiɗi: Piliŋ edi, hiniŋ a hala.

⁴⁵Yudeyakai viya n’e hilisi ahaɗi Mariya, won hlai n’e tili sda na Yesu a zaŋ ɗa e yimi pini.

⁴⁶Amma zamai arbaɗi e hili e miɗiɗi wiiɗi Farisekai gaini wala na Yesu a zaŋ ɗa.

⁴⁷Nɵa paakai n’abakai zi ɓaka gaiɗi Farisekai e yiki diŋgi na wiiɗi ɗai zi kiti seŋ e miɗi: Kapai mu zumu maɵa ɗa? Ɗif hanɗa, a n’a za wazagai zi siŋki viya koo.

⁴⁸Na ɓa mu hunuŋmu li aŋ za maini hanɗa nɵa ɗa, ɗai paŋ aga e yimi pini, Romekai lai aga e hilisi e tûûri hlaimu edi lai, e wûri tempelmu edi, e tûûri aftimu edi lai.

⁴⁹Amma Kaifas, ktai n’arbaɗi par a nafu aŋ pai zi ɓaka n’abai war buza ni ɗa, a miɗiɗi: Tiki ki siɗi wala ktai kai.

⁵⁰Tiki ki siɗi ɓa, a pɗem buriki ɓa ɗif ktai a mra buriɗi ɗai, kapai ɗaiki na gaini abaiɗi paŋ ɗa e bi edi kai.

⁵¹Amma a muɗa seŋ hanɗa gaini midini dama kai, amma won hlai n’a na aŋ pai n’abai zi ɓaka war buza ni ɗa, a muɗa ɗa a seŋ na wuze ɓa Yesu aga a mra burini pinzibaɗi Yudeyakai.

⁵²A na buriɗi pinzibaɗi Yudeyakai ktai kai, amma a na buri a tipiɗisi alini Alaw n’e ɗa gaini ɵiri edi.

⁵³War mefeŋ ni par e rgi miɗi buri e fiɗiŋ edi.

⁵⁴Nɵa Yesu a bunda a paya arbaɗi Yudeyakai edi papɗak kir kai, amma a halaɗi woni par a hala midini afti n’a na gobi edi mini basga na kaɗataŋ, war fuŋ n’abai ktai na e yikiŋ ɓa Efrayim, a sumna woni gaiɗi ɗaini zi hitri.

⁵⁵Fet na wiini Paska na wiiɗi Yudeyakai te nafu gobi, ɗai viya na midini afti zamai par e hilisi a Yeruzalem wuzaɗi fet hanɗa buri e zi siɗi edi aŋ hilu.

⁵⁶E piyi Yesu, e miɗi arbaɗi marɗi amlai warni tempel ɓa: Ki hiini ɓa aga a halasi amai miɗi fet kai sam ɗe?

⁵⁷kapai na ɗa, paakai n’abakai zi ɓaka gaiɗi Farisekai e si miɗi edi ta ta ɓa, ɗif n’a talaŋ li ɗa, a halasi a miɗiɗi kapai e yimiŋ.