Read Mousgoum Yohana 12 Bible Online

Yohana 12 - Mousgoum bible

Yohana 12

¹Mefeŋ ɵaara wuzaɗi fet na wiini vigi n’amai ɗa ɗa, Yesu a halasi a Betaniya war fuŋ na Lasarus n’a ɵiyaŋsi arbaɗi zi mri par a nafu woni.

²War hlai ni, e zizini simi buri ni, Marta te ɓurwa simi wiiɗi ɗai, amma Lasarus a nafu arbaɗi nagai n’e simi gaini.

³Nɵa Mariya te tika Itir n’e yikiŋ ɓa Nar, na wûrini caŋ gara galni litir ɗaw, te miɗni ezini Yesu, te girdaŋ gaini ayir na midiɗi, dilimi te va gaini lugosni Itir ɗa.

⁴Yudas Iskariyot, ktai arbaɗi ɗaini zi hitri n’aga a saŋ edi ɗa, a muɗa maini nɵa:

⁵Itir n’a suma sulai zi arzaŋ miya hu hanɗa, e wûriŋ edi kaai e siŋɗi wiiɗi na murgakai kai ɗa buri maɗa?

⁶A muɗa ɵa na ɗa, buri ɓa a na hiina buriɗi na murgakai gara ɗa a na ɵa kai, amma buri ɓa a ɗif zi mihill, won hlai na guɓai t'aŋ tini na ɗa, a na mula pini farai na warɗi par.

⁷Amma Yesu a muɗa: Hiniti te giɗima hanɗa buri mefeŋ na wiini piŋa.

⁸Buri ɓa ɗai na murgakai e ɗa gaiki kûreɗ-kûreɗ amma ta ɗa mu na gaiki ɵa haa kureɗ kai.

⁹Fara n’abai na wiiɗi Yudeyakai e siɗi ɓa Lasarus aŋ woni. E hilisi burini Yesu ktai kai, amma e tili Lasarus n’a ɵiyaŋsi amai arbaɗi zi mri par lai.

¹⁰Paakai n’abakai zi ɓaka e kiti miɗi buri e fiɗi Lasarus edi lai,

¹¹Buri Yudeyakai viya e tiki piɗi e hiniɗi, e bindi e yimi pini Yesu.

¹²Dawaini, firiɗi ɗai n’abai n’e hilisi mini fet ɗa, e ɵini ɓa Yesu a na halasi a Yeruzalem,

¹³ɗai e mili goyorni huura tiɗi, e niyisi edi mini e ɗûûli e miɗi: Hozana, Kol sini ni n’a na halasi war yikini Epiɗ-ɗai, pai na wiiɗi Izrayel.

¹⁴Yesu a navasi ahini ablehö ktai a sumnasi midini dam, maini n’aŋ gaini ɗû nɵa:

¹⁵Ki hiini kai tiki ɗai na Siyon, paiki a na halasi, midiɗi ahiɗi ablehoi dam.

¹⁶Ɗaini zi hitri e ɵini ezini wala hanɗa edi kai haw, amma won hlai na Yesu a nava kol ya ɗa, nɵa midiɗi a kɵa ɓa: Seŋ hanɗa a ɗo burini, ɓa e zi hanɗa burini lai.

¹⁷Firiɗi ɗai n’e ɗika gaini won hlai n’a yikasi Lasarus edi warni waŋ par, aŋ ɵiyaŋ amai arbaɗi zi mri par ɗa, e zi zaida midini.

¹⁸Firiɗi ɗai e hilisi edi mini na ɗa burini hanɗa, buri e ɵini ɓa a za siŋki hanɗa.

¹⁹Nɵa Farisekai e miɗi arbaɗi marɗi: Tiki haw le, ki kiɗi ki zi wala ktai kai, ɗai ɗa e ɵini paŋ kafa.

²⁰Grekkai na zamai e ɗifu arbaɗi ɗai n’e hili amai aŋ siiwi miɗi fet ɗa,

²¹e tûûrisi sini Filip na Betsaida na war Galeliya par e miɗini: Ɗif n’abai, mi firiyi mi tili Yesu.

²²Filip a halasi a miɗini wiini Andre ta, Andre gaini Filip e hilisi e miɗini wiini Yesu.

²³Yesu a waya seŋ a miɗiɗi: Ler a cosi ya, na woni Ahini-ɗif aga a nava rɗi n’amai.

²⁴Jre, jre, mu miɗiki, na ɓa seyemni wai a kɵa arni afti kaalai, a mra kaalai ɗa a hina ɵa ktai, amma na ɓa a mra li ɗa a wa ali viya.

²⁵Asiya ɗi paŋ n’a godo suŋfani aga a baŋ, asiya ɗi paŋ n’a bula gaw sini suŋfani warɗi yai hanɗa aga a giɗimaŋ haa sini suŋfa n’a vada kai.

²⁶Na ɓa ɗif a dara a za ɵeŋŋa ɗa, a pɗem ɓa a tapasi pa, hlai na m’aŋ woni ɗa, ɵeŋŋa ɗa aga a sumna woni lai. Na ɓa ɗif a dara a za ɵeŋŋa ɗa aga a sini kol ɗa a Api.

²⁷Tiyana ɗa, m’aŋ warni kwimi, na mu muɗa zamai ɗa a maŋ Api, kurɗaŋa edi miɗi ler hanɗa par kruɗ, amma mu hala war ler hanɗa na ɗa buri hanɗa.

²⁸Api sa kol wiini yikuku. Nɵa wûle ktai a wasi amai warni fuŋ-n’Alaw par a muɗa: Mu sini kol ya, aga mu sini kol pra.

²⁹Firiɗi ɗai n’e ɗa woni hlai ni n’e ɵini wûle hanɗa e miɗi ɓa hanɗa a wulani Alaw zi ɓarai, na zamai e miɗi: a miɗinisi ɗa a ɗif zi ɵeŋ.

³⁰Yesu a tika seŋ a muɗa: Wule hanɗa a wasi na ɗa buriya kai, amma buriki tiki.

³¹Sariya na wiiɗi yai hanɗa te za na ɗa tiyana, pai na wiiɗi yai hanɗa aga e birgiŋ anene.

³²Ta ɗa, won hlai na mu nava higi n’amai sini luwuŋ li ɗa, aga mu tipiɗisi ɗai paŋ sa.

³³A muɗa hanɗa buri a siŋkiɗi midini mri n’aga a mra gaini ɗa.

³⁴Firiɗi ɗai e wiyi seŋ e miɗini: Tiyi mi ɵini war gadai zi ɗû par ɓa Kristu aga a sumna haa hlai n’a vada kai lai ɗa, kapai tuku ku miɗiyi ɓa: Sai Ahini-ɗif a haga amai ɗa, Ahini-ɗif ni ɗa asiya ɗa?

³⁵Yesu a miɗiɗi: Gaglai a na arbaki buri hlai n’agwi hai, piyi war hlai na gaglai a na ɗa kapai gegeŋ a luɓasi miɗiki kai. Ni n’a paya war gegeŋ ɗa a sɗa hlai n’a hala woni kai.

³⁶Won hlai na gaglai a na arbaki hai, ki yimi pini gaglai kapai ki bindi aŋ alini gaglai. Asakal n’e miɗi seŋ hanɗa ya, Yesu a hala wiini, a ŋoya wuzaɗi cok.

³⁷Gaini wazagai zi siŋki n’a zaŋ wuzani arɗi paŋ tekeɗeɗi e yimi warni kai.

³⁸Kapai seŋ na ɗif na mini Alaw Esaya a muɗaŋ ɗa a va amai won hlai n’a muɗa ɓa: Epiɗ-ɗai, seŋ na e ɵiniŋ miyi par ɗa, n’a yima pini ɗa asiya ɗa? N'EPIƊ-ƊAI a siŋka spakni edi sini ɗa asiya ɗa?

³⁹Na ɓa e kiɗi e yimi kai ɗa, na buri na ɓa Esaya a muɗa pra ɓa:

⁴⁰A ŋulva arɗi tiki, a diŋra agulɗi diɗir lai, kapai e tili gaini arɗi kai, kapai e ɵini ezini edi gaini futini kaalai, kapai e wiyisi duɓaɗi mu zûûliɗi lai kai.

⁴¹Hanɗa a seŋ na Esaya a muɗaŋ ɗa, buri a tiliti abaini, a muɗa midini lai.

⁴²Gaini hanɗa paŋ, koo arbaɗi n’abakai tekeɗeɗi n’e yimi pini viya amma buri Farisekai ɗa e miɗi hanɗa edi gaglai kai kapai e birgiɗisi amlai warni Sinagogne par kai.

⁴³Buri e firiyi kol na ɗai e siŋɗi a suwa na sini Alaw par ɗa.

⁴⁴Yesu a ɗuula a muɗa: Ni n’a yima wara, a yima wara kai, amma warni ni n’a ɵinaŋasi ɗa.

⁴⁵Ni n’a talaŋa, a tala ɗa a ni n’a ɵinaŋasi ɗa.

⁴⁶Ta na mu gaglai ɗa mu halasi warɗi yai buri ɓa asiya ɗi paŋ n’a yima wara ɗa aga a sumna war gegeŋ kai.

⁴⁷Na ɓa ɗif a ɵina seŋŋa li, a yimaŋ kai ɗa, ta mu ɗûkliti sariya midini kai buri mu halasi aŋ ɗûkliti sariya miɗiɗi ɗai na warɗi yai kai, amma aŋ kûrɗi ɗai na warɗi yai ɗa edi.

⁴⁸Ni n’a bulaŋa edi, a yima seŋ na wiya kaalai, wala n’a ɗûkliti sariya midini a na, seŋ na mu muɗaŋ a ni n’aga a ɗûkliti sariya midini war mefeŋ n’asakal ɗa.

⁴⁹Buri ta mu muɗa gaini mada dama kai, Api n’a ɵinaŋasi ɗa, A ni n’a saŋa gadai midini wala n’aga mu muɗaŋ, n’aga mu za zaida midini lai.

⁵⁰Mu sɗa ɓa gadai na wiini ɗa a suŋfa n’a vada kai, nɵa wala na ta mu muɗaŋ ɗa, mu muɗaŋ ɗa maini n’Api a muɗaŋa ɗa nɵa.