Read Mousgoum Yohana 13 Bible Online

Yohana 13 - Mousgoum bible

Yohana 13

¹Wuzaɗi fet na wiini Paska ɗa, won hlai n’a sɗa ya ɓa ler n’aga a vuga warɗi yai hanɗa par sini Epini a ŋasi ya ɗa, Yesun ni n’a diriɗi ɗai na wiini n’e ɗa warɗi yai ɗa, a diriɗi haa sini dibini ta.

²Won hlai n’e ɗa simi simi na koskoi ɗa, kapai na ɗa Mat a wa seŋ war Yudas n’ahini Simun Iskariyot ya kapai a saŋ edi.

³Yesun n’a sɗa ɓa Api a sini wazagai paŋ war tini ɓa a niyasi edi sini Alaw par, a wayafuna sini Alaw lai ɗa,

⁴a faka amai a wa sapa na sini edi, a mula sapa ktai n’e girdi wala gaini a rga wuzani gaini,

⁵Asakal par a ma yem warni tasa ɗa a ma eziɗi ɗaini zi hitri ɗa gaini, a girɗi eziɗi gaini sapa n’a rgaŋ wuzani lai.

⁶Nɵa a cosi sini Sumun Peter, Simun Peter a miɗini: Tuku Epiɗ-ɗai, ku maɗa aza ta.

⁷Yesu a waya seŋ a miɗini: Na ta mu na zaŋ na ɗa, tuku ku sɗaŋ tiyana kai, aga ku sɗaŋ ɗa asakal par.

⁸Peter a midini: Zaw kai, aga ku maɗa aza duk kai zaŋ. Yesu a miɗini: Na ɓa mu muɗku kai ɗa, bonuku gaya kai.

⁹Simun Peter a miɗini: Na ɓa ɵa ɗa, ku maɗa aza kiini kai, amma ta ɗa lai, mada lai paŋ.

¹⁰Yesu a miɗini: Ɗif na sini aŋ gaini mi yok ɗa, a ma ɗa a ezini bas buri sini paŋ gaini mi silak. Amma tiki ɗa, ki ɗa gaini mi silak silak sme, amma gaini hlaiki paŋ kai.

¹¹Buri a sɗa ni n’aga a saŋ edi ya, a muɗa ɓa ki ɗa silak paŋ kai na ɗa burini hanɗa.

¹²Asakal n’a miɗi eziɗi paŋ li, a waya a wa sapani sini li lai ɗa, a waya azumai aŋ suma gaiɗi a miɗiɗi: Ki siɗi wala na mu siŋki na ɗa ya ɗe?

¹³Tiki ki yikiŋa Api-zi-hitri gaini Epiɗ-ɗai, hanɗa ki miɗiŋ woɗi futini lai, buri muta mu na nɵa.

¹⁴Nɵa ɗa, na ɓa ta m’Epin-gezaki, Api-zi-hitri na wiiki lai mu miki eziki ɗa, tiki lai aga ki mi eziɗi marki arbaɗi marki.

¹⁵Buri na mu zaŋ na ɗa, tiki aga ki tili sini kapai tiki lai ki ziŋ maini na ta lai mu zaŋ siki ɗa nɵa.

¹⁶Jre, jre, mu miɗiki: Bege ɗa abai a suwa Epin-gezani kai, apostel ɗa abai a suwa ni n’a ɵinaŋ ɗa kaalai.

¹⁷Na ɓa hanɗa a yima miɗiki ɵa ya ɗa, ɵeɗ aŋ miɗiki, na ɓa ki ziŋ ɗa.

¹⁸Mu muɗa na ɗa gaiki tiki paŋ kai, nagai na mu viriɗi ɗa, ta mu siɗiɗi ya, amma ɗû n’a muɗa ɓa: Ni n’a suma sa par ɗa a bunda li aŋ gawɗa ɗa a va amai.

¹⁹Mu miɗiki, tiyana par wuzani hlai na wala hanɗa a za kai hai kapai won hlai n’a za li ɗa, ki yimi ɓa ta mu na.

²⁰Jre, jre, mu miɗiki: Asiya ɗi paŋ n’a yima ni na mu ɵinaɗɗi ɗa sini, a yimaŋ muta, ni n’a yimaŋ li sini ɗa, a yima ɗa a ni n’a ɵinaŋasi ɗa lai.

²¹Won hlai na Yesu a muɗa ɵa ya ɗa, Sezeni a kwima, a muɗa maini nɵa: Jre, jre mu miɗiki ktai arbaki aga a saŋa edi.

²²Ɗai zi hitri e tili arɗi marɗi, e zilbi siɗi ɓa: A muɗa na ɗa gaini asiya ɗa?

²³Kta arbaɗi ɗai zi hitri ni na Yesu a daraŋ gara a nafu azumai aŋ suma amai ɵimani haɵ tar.

²⁴Simun Peter a zini arni wiini Yohana buri a zilbaŋ haw a muɗa naɗa gaini asiya ɗa?

²⁵Nɵa, ɗif zi hitri hanɗa a hiŋla sini amai didikni Yesu a miɗini: Epiɗ-ɗai ɗif ni ɗa asiya ɗa?

²⁶Yesu a waya seŋ a miɗini: A ni n’aga mu ziba peŋ mu siŋni mini ɗa. Yesu a ziba peŋ ɗa, a tikaŋ a siŋni win Yudas n’ahini Simun Iskariyok.

²⁷Asakalni peŋ ɗa par ɗa, Satan a niya warni. Yesu a miɗini: Na ku zaŋ ɗa, zaŋ witaw.

²⁸Arbaɗi nagai n’e simni azumai aŋ simi ɗa, ktai n’a sɗa buri maɗa Yesu a miɗini seŋ hanɗa aŋ kai.

²⁹Buri ɓa guɓai zi farai te nafu tini Yudas. Zamai e hiini ɓa Yesu a miɗini na ɗa ɓa: Wurasi wazagai na jaamu aŋ sini buriɗi fet ɗa, zaw hala sa wala agwi wiiɗi na murgakai ɗa.

³⁰Nɵa Yudas a tika peŋ ɗa ɗaw, a niyasi anene tar, hlai a nafu duvuk.

³¹Won hlai na Yudas a niya anene dega ɗa, Yesu a muɗa: Tiyana ɗa Ahini-ɗif a nava kol ya, Alaw lai a nava kol burini ni lai.

³²Na ɓa Alaw a nava kol burini ni, Alaw lai aga a sini kol warni sini dama, aga a sini kol tizaw lai.

³³Aliya, m’aŋ gaiki burini hlai n’agwi, tiki aga ki piyiɗa maini na mu miɗiŋɗi wiiɗi Yudeyakai nɵa. Hlai na mu hala woni ɗa tiki ki kiɗiɗi woni kai, mu miɗiki wiiki tiki tiyana nɵa.

³⁴Mu na siki gadai na hehe, a zuva ɓa ki diri arbaɗi marki maini na mu diriki nɵa, tiki lai a zuva ɓa ki diri arbaɗi marki.

³⁵Na ɓa ki ɗa diri arbaɗi marki ɗa, ɗai paŋ aga e siɗi ɓa tiki ki ɗi ɗai zi hitri na wiya.

³⁶Simun Peter a miɗini: Epiɗ-ɗai, aga ku hala ɗa wata ɗa? Yesu a waya seŋ a miɗini: Hlai na mu hala woni ku kiɗa aŋ halaɗi pa tiyana haa dir kai, aga ku tikaɗi futi pa asakal sek.

³⁷Peter a miɗini: Epiɗ-ɗai, mu kiɗa mu halaɗi puku tiyana haa dir kai ɗa buri maɗa?

³⁸Yesu a waya seŋ a miɗini: K'aŋ gaini zizini buri ku sa sunfaku edi buriya! Amma jre, jre mu muɗuku: Haa Yugur a yika ta ɗa, aga ku ɓuɓura muku buriya azi hu ɓa, ku sɗaŋa kai.