Read Mousgoum Yohana 14 Bible Online

Yohana 14 - Mousgoum bible

Yohana 14

¹Ki hini hiiniki a turla kai, ki yimi warni Alaw, ki yimi wara lai.

²War dalam na wiini Apa hlai zi simni a na viya, a nafu ɵa kai aga mu miɗiki ɓa mu hala mu zizina hlai buriki ɗi?

³Nɵa na ɓa mu hala mu zizina hlai buriki li, aga mu wayasi, mu miliki gaya, kapai hlai na ta m’aŋ woni ɗa, tiki lai aga ki simni woni.

⁴Hlai na ta mu hala woni ɗe, tiki aga ki siɗiti futi ɗa lai.

⁵Tumas a miɗini: Epiɗ-ɗai, tiyi mi siɗi hlai na ku hala woni kai, aga mi siɗiti futi ɗa maɵa maɵa ɗa?

⁶Yesu a miɗini: Ta ɗa mu futi, mu jre, mu suŋfa lai, ɗif a kiɗa a hala si ni Api ɗa kai, sai sa par.

⁷Na ɓa ki siɗiɗa ya ɗa, ki siɗi Apa ya lai. Tiyana par ki siɗiŋ, ki tiliŋ ya lai.

⁸Filip a miɗini: Epiɗ-ɗai, ku siɗkiyi Api ɗa ta, a kiɗiyi ta.

⁹Yesu a miɗini: Mu na gaiki na ɗa mu fana li, amma tuku Filip ku sɗaŋa kai ɗa maɵa maɵa ɗa? Ni n’a talaŋa, a tala Api li, kapai tuku ku muɗa ɓa, siɗkiyi Api ɗa maɵa maɵa ɗa?

¹⁰Ku sɗa ɓa ta m’aŋ warni Api, Api wara lai kai ɗi? Seŋ na mu na miɗiŋki hanɗa mu muɗaŋ na ɗa gaini mada dama kai, a muɗaŋ na ɗa a Api n’a sumna n’a za sdani lai.

¹¹Yimi ɓa ta m’aŋ warni Api, Api aŋ wara ta lai. Na ɓa ki yimi ɵa kai ɗa, yimi burini sda n’a na za ɗa dama lai.

¹²Jre, jre, mu miɗiki: Ni n’a yima wara, ni lai aga a za wazagai na ta mu zaŋ ɗa, maa aga a za zamai n’abakai n’a suwa pra, buri ɓa mu na halaɗi sini Api.

¹³Wala paŋ na ki zilbiŋ li war yikiŋa ɗa aga mu zaŋ kapai Api a nava kol warni Ahi,

¹⁴Na ɓa ki zilbi wala li war yikiŋa ɗa, ta aga mu zaŋ.

¹⁵Na ɓa ki diriŋa ɗa aga ki yimi gadaiŋa,

¹⁶ta aga mu zilba Apa buri a sikisi zinai zamai n’aga a sumna gaiki ɵa haa hlai n’a vada kai.

¹⁷Seze na jre, na ɗai na yai e kiɗi e yimiŋ kai buri e tiliŋ kai, e sɗiŋ kaalai, tiki ɗa ki sɗiŋ buri ɓa aga a sumna gaiki, a sumna warki.

¹⁸Aga mu hiniki huyokai kai, aga mu halaɗi siki.

¹⁹Safai n’agwi ɗa, ɗai na yai aga e tiliŋa kir kai, amma tiki ɗa aga ki tiliŋa, buri ɓa ta m’aŋ kara, tiki lai aga ki simni karki.

²⁰War mefeŋ ni ɗa, aga a yima miɗiki ɓa ta m’aŋ warni Apa maini na tiki ki ɗi wara ta, ta warki tiki lai nɵa.

²¹Ni n’a daraŋa ɗa a ni n’a yima gadaiŋa, a za pini lai. Nɵa ni n’a daraŋa ɗa Apa aga a daraŋ lai, ta lai aga mu daraŋ, aga mu siŋka sa arni lai.

²²Yudas, na Iskariyot ɗa kai, a miɗini: Epiɗ-ɗai, tuku aga ku siŋka suku aryi tiyi, amma arɗi ɗai na yai ɗa kai ɗa maɵa maɵa ɗa?

²³Yesu a waya seŋ a miɗini: Na ɓa ɗif a daraŋa ɗa, a yima seŋŋa, Apa aga a daraŋ, tiyi aga mi hilisi sini, mi zi hlai zi simni na wiyi gaini.

²⁴Ni n’a daraŋa kai ɗa, a yima seŋŋa kai, seŋ na ki ɗa ɵiniŋ na ɗa a seŋ na wiya kai, amma a wiini Api n’a ɵinaŋasi.

²⁵Won hlai na mu naka gaiki ɗa, mu miɗiŋki ɵa ya,

²⁶amma ni n’a zina piki, Seze sɗik na Api aga a ɵinaŋsi war yikiŋ a ɗa aga a hitriki wazagai paŋ na ta mu miɗiki gaini.

²⁷Mu hiniki ɵeɗ wiiki, mu siki ɵeɗ na wiya wiiki lai, ta mu siŋki ɗa maini na ɗai na yai e siŋki ɗa ɵa kai. Ki hini hiiniki a turla kai, ki bindi muhunakai kaalai.

²⁸Tiki ki ɵini ma par ɓa, mu na hala, aga mu wayasi siki pra, na ɓa ki diriŋa ɗa, aga ki firiyi buri na ɓa mu na hala sini Api buri Api ɗa abai a suwaŋa.

²⁹Mu miɗiki seŋ hanɗa tiyana par wuzani hlai, kapai won hlai n’a cosi li ɗa ki yimi.

³⁰Aga mu muɗa seŋ gaiki pra kir kai zaŋ, buri ɓa paiɗi yai ɗa a na halasi, spakni ktai mada kai.

³¹Amma kapai ɗai na yai ɗa e siɗi ɓa mu dara Api ɗa, mu za wala na Api a muɗaŋa gaini paŋ lai. Fiki amai, yumumu sumu edi woni na par.