Read Mousgoum Yohana 15 Bible Online

Yohana 15 - Mousgoum bible

Yohana 15

¹Ta mu luwuŋ zi vin na jre, Apa epini vuwai zi luwuŋ zi vin.

²Tini luwuŋ n’aŋ sa paŋ, n’a wa ali kai ɗa a bulaŋ edi, tini n’a wa ali paŋ ɗa a zizinaŋ, a cawa tini na maafanai ɗa edi kapai a wa ali a suwa pra.

³Tiki, ki ɗa hilu ya buri seŋ na mu miɗiŋki ɗa,

⁴Simni warni bonu gaya maini na ta, m’aŋ warni bonu gaiki nɵa. Tini luwuŋ a kiɗa a wa ali gaini midini dama kai, na ɓa aŋ gaini pi sini luwuŋ zi vin tiɓ kai ɗa. Tiki nɵa lai, na ɓa ki simni warni bonu gaya kai ɗa ki wi ali kaalai.

⁵Ta! ɗa mu luwuŋ zi vin, tiki ɗa ki ɗi tini luwuŋ, ni n’a na war bonu gaya, na ta gaini ni lai ɗa aga a wa ali viya, buri ɓa gaya ta kai ɗa ki kiɗi ki zi wala ktai kai.

⁶Na ɓa ɗif aŋ war bonu gaya kai ɗa, aga a bla edi maini tini luwuŋ nɵa, aga a huula lai ɗif a na wara kai, ni a bula edi maini tini luwuŋ nɵa, a hula edi lai. Ɗai e tipi tini luwuŋ amai, e miliŋ arni afu, a ya edi lai.

⁷Na ɓa ki ɗa war bonu gaya, seŋŋa a sumna warki lai ɗa, na ki firiyiŋ paŋ ɗa, zilbiŋ aga a sa siki.

⁸Apa aga a nava kol war na ɓa, ki wi ali viya, ki zi aŋ ɗai zi hitri viya lai.

⁹Api a daraŋa, ta mu diriki nɵa lai, ki simni war diri na wiya.

¹⁰Na ɓa ki yimi gadaiŋa li ɗa, aga ki simni diri na wiya maini na ta mu yima gadai na wiini Apa mu sumna war diri na wiini lai nɵa.

¹¹Mu miɗiki nɵa ɓa kapai firiyi na wiiki a sumna warki, kapai firiyi na wiiki a va amai lai.

¹²Gadai na wiya a na maini nɵa: Ki diri arbaɗi marki maini na ta mu diriki ɗa nɵa.

¹³Diri n’abai n’a suwa hanɗa aŋ kai, na ɓa ɗif a sa suŋfani edi buriɗi marmakaini.

¹⁴Tiki ɗa ki ɗi marmakaya, na ɓa ki zi wala na ta mu gidiki midini ɗa.

¹⁵Mu yikiki aŋ bagakai kir kai, buri bege a sɗa wala n’epin-gezani a zaŋ ɗa kir kai, mu yikiki marmakaya, buri mu siɗkiki wazagai na mu ɵinaŋsi mini Apa par ɗa paŋ.

¹⁶Ki viriɗa ki ɗi tiki kai, mu viriki ɗa mu ta, mu miliki ca ca ɓa kapai ki hili ki wi ali, ali na ki wiŋ ɗa ɗe a sumna haa lai, kapai Api a siki wala paŋ na ki zilbiŋ midini war yikɗa.

¹⁷Gadai na mu siŋki ɗa ɓa, ki diri arbaɗi marki.

¹⁸Na ɓa ɗai na yai e bili gaw siki ɗa, aga ki yimi miɗiki pɗem ɓa, e bili gaw sa ta wuzaki par.

¹⁹Na ɓa ki ɗifu ɗai ɗi yai ɗa, ɗai na yai ɗa, aga e zi marmai gaiki, buri ɓa ki ɗi na wiiɗi, na ɓa ɗai na yai e bili gaw siki, a za nɵa buri ɓa ki ɗi ɗai ɗi yai kai, paŋ ktai ta mu viriki edi arbaɗi ɗai na yai ɗa par.

²⁰Ki hini miɗiki a kɵa gaini seŋ na mu miɗiŋki ɓa: Bege abai a suwa epin-gezani kai ɗa, na ɓa e ziŋa gir ɗa, aga e ziki gir wiiki tiki lai, na ɓa e yimi fu seŋŋa ɗa, aga e yimi seŋ na wiiki tiki lai.

²¹Amma wazagai hanɗa paŋ ɗa aga e ziŋ siki burini yikiŋa, buri ɓa e siɗi Ni n’a ɵinaŋasi ɗa kai.

²²Na ɓa mu halasi a hili kai, mu miɗiɗi a miɗi kaalai ɗa, aŋ ta ɗa tuwur midiɗi kai. Tiyana, burini tuwurɗi ɗa, e siɗi aŋ ɗûpi ezini seŋɗi ɗa kir kai. Ni n’a bla gaw sa ɗa, a bla gaw na ɗa sini Apa lai.

²³Na ɓa mu za fu sda na ɗif a zaŋ ka arbaɗi duk kai kai ɗa, a na ta ɗa tuwur midiɗi kai. Tiyana ɗa, e tili gaini arɗi, paŋ ktai e bili gaw sa, ta gaini Apa lai.

²⁵Amma a za nɵa kapai seŋ n’aŋ warni ɗû na wiiɗi n’a muɗa ɓa: E bili gaw sa pini wala ktai ta kaalai, a va amai.

²⁶Won hlai na Ni n’a zina piki a halasi li ɗa, ni na ta aga mu ɵiniɗkiɗi sini Api par, ni ɗa aga a za zaida mada.

²⁷Tiki lai aga ki zi zaida mada, buri ɓa, ki ɗi gaya haa war pi zi tiki par.