Read Mousgoum Yohana 17 Bible Online

Yohana 17 - Mousgoum bible

Yohana 17

¹Asakal n’a muɗa hanɗa ya, Yesu a bunda arni amai war hlai n’amai a muɗa: Apa, hlai a cosi li, sa kol wiini Ahiku kapai Ahiku a suku kol lai.

²Maini na tuku ku sini spak midiɗi ɗai paŋ, nɵa lai ku sa suŋfa n’a vada kai wiiɗi nagai paŋ na tuku ku siɗini.

³Suŋfa n’a vada kai hanɗa, a na ɗa ɓa e suɗuku tuku Alaw na ktai na Jre, gaini Ni na ku ɵinaŋsi, Yesu Kristu.

⁴Ta ɗa mu suku kol midiɗi yai, mu va sda na ku saŋ war ta aŋ zaŋ ɗa amai.

⁵Tiyana ɗa, Tuku Api, sitiɗa abai amai gaiku, abai na mu naka warɗi gaiku wuzani hlai na yai te za kai hai ɗa.

⁶Mu siŋka yikuku edi gaglai wiiɗi nagai na ku miliɗisi edi arbaɗi ɗai na yai par ku siɗiɗa, e ɗika ɗa e ɗi na wiiku, amma ku siɗiɗa ca, nagai e yimi seŋku lai.

⁷Tiyana ɗa, nagai e siɗi ya ɓa, wala paŋ na ku saŋŋa ɗa, a halasi na ɗa suku par.

⁸Buri mu siɗi seŋku na ku saŋŋa ɗa, e yimi lai, e siɗi fakat ɓa mu halasi suku par, e yimi ɓa ku ɵinaŋasi ku tuku lai.

⁹Ta ɗa mu siiwa na ɗa buriɗi nagai, mu siiwa buriɗi ɗai na yai ɗa kai, amma buriɗi nagai na ku siɗiɗa, buri ɓa e ɗi na wiiku.

¹⁰Mu sɗa ɓa wala n’a wiya paŋ ɗa a wiiku, wiiku tuku ɗa a wiya lai, mu nava kol buriɗi nagai lai.

¹¹Mu na warɗi yai ɗa kir kai, nagai e ɗa warɗi yai, ta mu na halaɗi suku, Api na sɗik, giɗimiɗi war yikiŋa, yiki na ku saŋŋa ɗa, kapai e zi ktai maimu tumu nɵa.

¹²Won hlai na mu nasi ka gaiɗi ɗa, ta mu giɗimiɗi war yikuku, yiki na ku saŋŋa ɗa. Mu giɗimiɗi, ktai arbaɗi par a ɓa edi kai, sai a ni n’a sa edi buri bi n’edi ɗa, kapai ɗû ɗa a va amai.

¹³Tiyana mu na halaɗi suku, mu muɗa ɵa na ɗa warɗi yai par kapai firiyi na wiya a va amai warɗi marwai.

¹⁴Ta mu siɗi seŋku ya, ɗai na yai ɗa e bili gaw siɗi buri e ɗi ɗai ɗi yai kai, maini na ta mu ɗifɗi yai kai ɗa nɵa.

¹⁵Mu siiwuku na ɗa buri ɓa ku miliɗi edi warɗi yai par ɗa kai, amma buri ku kûtiɗi wuzani meefeŋ.

¹⁶E ɗi ɗai ɗi yai kai, maini na ta mu ɗifɗi yai kai ɗa nɵa.

¹⁷Ziɗi edi aŋ sɗik gaini jre, seŋku ɗa a jre.

¹⁸Maini na tuku ku ɵinaŋasi warɗi yai ɗa nɵa, ta lai mu ɵiniɗi edi warɗi yai.

¹⁹Ta ɗa mu za sa edi aŋ sɗik gaini mada dama buriɗi kapai nagai lai e zi edi aŋ sɗik gaini jre.

²⁰Mu siiwa na ɗa buriɗi nagai hanɗa kiiɗi kai, Amma buriɗi nagai n’aga e yimi wara pini seŋ na wiiɗi lai.

²¹Kapai paŋ e zi ktai, maini na tuku Api k’aŋ wara, ta warku tuku lai nɵa, nagai lai e simni warmu kapai ɗai na yai e yimi ɓa ku ɵinaŋasi ɗa ku tuku.

²²Ta ɗa mu sitiɗi abai na tuku ku sitiɗa ɗa kapai e zi ktai e zi ktai maini na tumu mu ɗumu ktai nɵa.

²³Ta warɗi nagai, tuku wara ta lai, kapai a va amai war tipi na ktai kapai ɗai na yai e siɗi ɓa ku ɵinaŋasi ɗa ku tuku, e siɗi ɓa, ku diriɗi maini na ku daraŋa nɵa.

²⁴Amma nagai na ku siɗiɗa ɗa, Api, mu dara ɓa hlai na ta m’aŋ woni ɗa, nagai lai e simni gaya kapai e tiliti abai na wiya na ku sitiɗa buri ku daraŋa ɗa wuzani piɗi yai zi tiki.

²⁵Api na ɗikat, ɗai na yai ɗa e suɗuku duk kai, amma ta mu suɗuku, nagai e siɗi ya ɓa ku ɵinaɗaɗi ku tuku;

²⁶Mu siŋkiɗi yikuku ya, aga mu siɗkiɗɗi pra kapai diri na ku daraŋa gaini ɗa a sumna warɗi maini na ta m’aŋ warɗi ɵa.