Read Mousgoum Yohana 19 Bible Online

Yohana 19 - Mousgoum bible

Yohana 19

¹Nɵa Pilatus a yima Yesu a siŋɗi buri e ɵiɓiŋ.

²Asakai e hiti bogorai zi hedek e pitini midini, e wiini sapa zi pai sini lai.

³E givilisi mini e miɗi: Lapiya, paiɗi Yudeyakai, e tiki piɗi e ɵiɓiŋ galaini lai.

⁴Pilatus a niyasi anene pra a miɗiɗi wiiɗi Yudeyakai: Mu na kiŋkisi anene kapai a yima miɗiki ɓa mu nava wala ktai na mu kûti sariya midini pini aŋ kai.

⁵Nɵa Yesu a niyasi anene, bogorai zi hedek ɗa midini tiɓ, sapa zi pai sini ca lai, Pilatus a miɗiɗi: Ɗif ɗa an na.

⁶Won hlai na paakai n’abakai zi ɓaka gaiɗi ɗai ɗi e tiliŋ ɗa, e ɗûûli e miɗi: Tûkiŋ amai, tûkûŋ amai. Pilatus a miɗiɗi: Tiki dama yimiŋ tûkûŋ amai buri ta mu nava wala na meefeŋ na mu kûti sariya midini pini aŋ kai.

⁷Yudeyakai e wiyini seŋ e miɗi: Tiyi ɗa, gadai zi ɗûktai a na, pini gadai ni ɗa, sai a mra edi buri a za sini aŋ Ahini Alaw.

⁸Won hlai na Pilatus a ɵina seŋ hanɗa, hunai te yimaŋ a suwa pra.

⁹A waya aha a miɗini wiini Yesu: Tuku ku na wata par ɗa? Amma Yesu a wiyini seŋ kai.

¹⁰Nɵa Pilatus a miɗini: Mu muɗuku ku muɗaŋa kai! Ku sɗa ɓa spak aŋ ta buri mu ɵuku, spak aŋ ta buri mu tukuku amai lai kai ɗi?

¹¹Amma Yesu a wiyini seŋ a muɗa: Spakku ktai maa mada kai, a sasifu suku amai par kai ɗa. Buri nɵa, ni n’a saŋa war tuku ɗa, tuwurni ɗa abai asuwa paŋ.

¹²Woni par Pilatus a paya aŋ ɵaŋ, amma Yudeyakai e ɗûûli e miɗi: Na ɓa ku ɵaŋ li ɗa, ku marmaini Sezar kai. Asiya ɗi paŋ n’a za sini aŋ pai ɗa a faka amai na ɗa sini Sezar.

¹³Asakal n’a ɵina seŋ hanɗa ya ɗa, Pilatus a kasi Yesu anene, a sumna azumai midiɗi paramay zi sariya, woni hlai n’e yikiŋ ɓa: Hlai zi didigi, war seŋɗi Hebrekai e yikiŋ ɓa: Gabbata.

¹⁴Hanɗa a meefeŋ na buri zizinini-si na buriɗi fet na wiini Paska, futi girvudi n’arba, Pilatus a miɗiɗi wiiɗi Yudeyakai: Paiki ɗa an na.

¹⁵Amma e ɗûûli e miɗi: Fiɗiŋ edi, fiɗiŋ edi, Tûkiŋ amai. Pilatus a miɗiɗi: Mu toko paiki ɗa amai ɗi? Paakai n’abakai zi ɓaka e wiyini seŋ: Paiyi zamai aŋ kai, sai Sezar tar.

¹⁶Nɵa a saŋ war tiɗi kapai e tûkûŋ amai. Nɵa e yimi Yesu

¹⁷E tikinisi dagrani wulani aŋ libi, a niyasi anene aŋ hala war hlai n’e yikiŋ ɓa keɵke na humok, na war seŋɗi Hebrekai e yikiŋ ɓa: Gogota ɗa.

¹⁸E tûkûŋ amai war hlai ni ɗa, ɗai zamai gaini sulu lai, ktai war gal hanɗa par lai, ktai war gal hanɗa par lai, Yesu arba tok.

¹⁹Pilatus a ɗo wala ktai ɗo, a tokoŋ amai sini dagra tok, ɗû na warni maini nɵa: Yesu na Nazaret par, pai na wiiɗi Yudeyakai.

²⁰Yudeyakai viya e ŋi ɗû hanɗa, buri ɓa hlai na e tûkû Yesu amai woni ɗa a nafu gobi gaini fuŋ n’abai ɗa. Ɗû hanɗa a ɗo war seŋ na wiiɗi Hebrekai, gaini latin gaini grek lai.

²¹Paakai n’abakai zi ɓaka na wiiɗi Yudeyakai e miɗini wiini Pilatus: Ku ɗoŋ ɓa, pai na wiiɗi Yudeyakai kai, amma ɗif hanɗa a muɗa mu pai na wiiɗi Yudeyakai.

²²Pilatus a waya seŋ: Na mu ɗoŋ ɗa, mu ɗoŋ ɗa a ɗû ɵa.

²³Askarai, won hlai n’e tûkû Yesu amai li ɗa, e mili sapani, e ɓûrwiŋ arni puɗu, askar paŋ ɗa gal ktai ktai. E militi ropni na ziigi siɗi kai gaini hi ktai amai par haa azumai ta ɗa yaw lai.

²⁴E kitiŋ arbaɗi ɓa: Mi ɓisitumu edi kai, amma mu ɓultumu aŋ tambulo kapai mu suɗumu ɗif n’aga te sa sini ɗa. A za nɵa kapai ɗû na a muɗa ɓa: E ɓûrwi sapani arbaɗi, E ɓiliti robni edi aŋ tambulo lai a va amai. Hanɗa a wala na askarai e ziŋ ɗa.

²⁵Gobi gaini dagrani Yesu ɗa, emini gaiɗi Mariya na tawalɗi emini na munini Klopas gaiɗi mariya Magdelena e ɗifu ca.

²⁶Yesu, won hlai n’a tiliti emini gaini ɗif zi hitri n’a daraŋ gara ɗa, ɵimani zaw lai ɗa a miɗiɗi wiiɗi emini: Muni ahiku ɗa an na.

²⁷Asakal par a miɗini wiini ɗif zi hitri ɗa ɓa: Amuku t'aŋ na. War hlai ni par ɗif zi hitri ɗa a yimiti aha gaini.

²⁸Asakal hanɗa, kapai ɗû a va amai ɗa, Yesu won hlai n’a sɗa ya paŋ ɓa a vada li ɗa, a muɗa: Sai te na zaŋa.

²⁹Grak ktai a nafu zaw, gaini vi gaini vin, e rgi tipeɵ na gaini diyiɓi arni vinegre mini tini luwuŋ Izop ɓak, e kiŋnisi mini.

³⁰Won hlai n’a ca vinegre hanɗa, Yesu a muɗa: Paŋ a va amai li, asakal par a pa midini azumai, suŋfani a wa edi.

³¹Hanɗa a mefeŋ na wiini zizinini-si, kapai kopoŋ ɗa a hina amai sini dagra warni Sabbat kai ɗa, buri ɓa Sabbat ni ɗa a mefeŋ n’abai. Yudeyakai e zilbi Pilatus buri e hiɗi eziɗi ɓaw ɓaw, e miliɗisi azumai.

³²Nɵa askarai e hilisi e hiɗi ezini n’avut n’a toko amai sini dagra gaini,

³³won hlai n’e cûsi sini Yesu ɗa, e niviŋ gaini mri, e hiɗini ezini kir kai.

³⁴Amma ktai arbaɗi askarai a ɓla paɵani gaiɗi kaway, won hlai ni yem gaini fel a niyasi edi.

³⁵Ni n’a tala hanɗa a za zaida midini lai, zaidani a jre, ni a sɗa ɓa a muɗa na ɗa a jre lai kapai tiki ki yimi.

³⁶Hanɗa a za nɵa kapai ɗû n’a muɗa ɓa: Keɵkeni ktai maa aga a haɗa kai ɗa a va amai.

³⁷Ɗû zamai a na muɗa pra ɓa: Aga e mili arɗi sini Ni na e ɓiliŋ ɗa.

³⁸Asakal hanɗa Yosef na Arimatiya par, a ɗif zi hitri na wiini Yesu amma war kuɗuhai buri hunai na wuzaɗi Yudeyakai, a zilba Pilatus buri a tikasi kopoŋni azumai, Pilatus a sini futi, nɵa Yosef a tika kopoŋ azumai.

³⁹Nikodemus, ni n’a halasi ka sini duvuk ɗa a cosi lai, a kasi mir gaini yitir zamai lai, a za kilo gobi doogo doogo hu.

⁴⁰E tiki kopoŋni Yesu ɗa, e rgiŋ gaini sapa, gaini wazagai zi ɗûgûdi zi lûgûzi lai maini na Yudeyakai e pi ɗai ɗi nɵa.

⁴¹Zardeŋ ktai a nafu woni hlai na e tûkûŋ amai warni ɗa, war zardeŋ hanɗa, waŋ na hehe a nafu woni n’e tiki ɗif warni kai hai.

⁴²E tiki Yesu warni waŋ ni ɗa, buri zizinini-si na wiiɗi Yudeyakai buri ɓa waŋ ɗa a nafu gobi.