Read Mousgoum Yohana 2 Bible Online

Yohana 2 - Mousgoum bible

Yohana 2

¹War mefeŋ n’ag'aŋ hu, fet na wiini tiki a za war Kana na war Galeliya, emini Yesu te nafu woni.

²E yikisi Yesu miɗi fet hanɗa gaiɗi ɗaini zi hitri lai.

³Won hlai na vin ɗa a kiɗa kir kai ɗa, emini Yesu te miɗini: Viɗɗi ɗa a vada vad.

⁴AmmaYesu a wiyiɗi seŋ: Muni n’a tupuku warni seŋ hanɗa a maɗa? Lerɗa a cosi kai hai.

⁵Emini te miɗiɗi wiiɗi ɗaini zi sda: N'aga a miɗiŋki paŋ ɗa ki zi hanɗa.

⁶Grak zi huwuŋ a nafu woni ɵaara, na Yudeyakai e zi siɗi edi aŋ hilu gaini grak paŋ ɗa, warni a kiɗa a ma litir miya miya.

⁷Yesu a miɗiɗi: Vi grak hanɗa gaini yem. E vin haa amai mini teɓ teɓ.

⁸A miɗiɗi: Tiyana ɗa, mi agwi kiɗni wiini abai na midini sdani simi ɗa, e kiɗni lai.

⁹Won hlai na abai na midini sdani simi a tetema yem n’a bunda aŋ vin mini ɗa, a sɗa hlai na vin hanɗa a halasi woni par kai. Amma ɗai zi sda n’e libisi yem e siɗi hanɗa. A yika Epiɗ-dray,

¹⁰a miɗini: Ɗif paŋ ɗa a ɓurwa wiiɗi ɗai avut ɗa, a vin na pɗem ɗa, asakal par won hlai na ɗai e ciini li ɗa, e siɗi na pɗem dai dai ɗa. Amma tuku ku giɗima vin na pɗem ta, ku saɗsi edi tiyana hai ɗa maɵa maɵa ɗa?

¹¹Hanɗa a pi zi tiki na wiini wazagai zi siŋki na Yesu a zaŋ war Kana na war Galeliya. A siŋkiɗi abaini edi, ɗaini zi hitri e yimi warni.

¹²Asakal hanɗa halasi azumai a Kapernahum gaiɗi emini, gaiɗi tawalakaini, gaiɗi ɗaini zi hitri, amma e simni woni mefeŋ viya kai.

¹³Fet na wiini Paska na wiiɗi Yudeyakai te nafu gobi, nɵa Yesu a hala amai a Yeruzalem.

¹⁴A nava ɗai zi sikili ɵaakai, adumai gaini dere lai amlai warni tempel, ɗai zi bindi farai gaini simni ca ca lai.

¹⁵A za daɓala gaini sogom, a birgiɗi edi warni empel ɗa par paŋ, gaini adumai gaini ɵaakai lai. A ko sulaiɗi ɗai zi bindi farai ɗa edi, a hogo tabelɗi azumai lai.

¹⁶A miɗiɗi wiiɗi ɗai zi sikili dere ɗa maini nɵa: Miliɗi wazagaiki edi woni na par, dalamni Apa ɗa aga ki bindiŋ aŋ kosku kai.

¹⁷Ɗaini zi hitri midiɗi a kɵa buri aŋ gaini ɗû ɓa: Diri zi sile na burini dalamku ɗa a na vadaɗa edi.

¹⁸Yudeyakai e miɗini: Sda na ku zaŋ maini hanɗa ɵa ɗa, wala na ku dara ku siɗkiyi tiɓ ɗa a maɗa?

¹⁹Yesu a waya seŋ a miɗiɗi: Hûhlai na sɗik hanɗa azumai, war mefeŋ hu ɗa aga mu rgaŋ amai.

²⁰Yudeyakai e miɗi: Tiyi, mi zi buza doogo doogo puɗu pi ɵaara kapai mi rgi tempel hanɗa amai, amma tuku ku za mefeŋ hu, ku rgaŋ amai!

²¹Amma tempel na Ni a muɗa midini na ɗa a sini.

²²Won hlai n’a ɵiyasi amai arbaɗi zi mri par li, ɗaini zi hitri midiɗi a kɵa ɓa a naka a muɗa seŋ hanɗa, e yimi pini ɗû gaini seŋ na Yesu a muɗaŋ ɗa lai.

²³Won hlai n’a na Yeruzalem, miɗi fet na wiini Paska ɗa, viya e yimi war yikini pini wazagai zi siŋki n’a zaŋ, n’e tiliŋ gaini arɗi.

²⁴Amma Yesu a dara a siɗi warni kai, buri ɓa a siɗiɗi ɗai paŋ.

²⁵Buri jaani a na ɓa e zini zaida midini ɗif haw kai, buri Ni a sɗa n’aŋ warɗi ɗai paŋ.