Read Mousgoum Yohana 21 Bible Online

Yohana 21 - Mousgoum bible

Yohana 21

¹Asakal hanɗa, Yesu a siŋka sini arɗi ɗai zi hitri pra, agoɗom wulani yem-ra n’abai na Tiberiyade, a siŋka sini arɗi ɗa maini nɵa:

²Simun Peter, Tumas n’e yikiŋ ɓa na Teyek gaini Nataniyel na Kana na war Galeliya par, alini Zebedewus gaiɗi ɗai zi hitri na zamai na sulu lai e ɗifu ktai.

³Simun Peter a miɗiɗi: Mu hala fu aŋ tum. Nagai e miɗini: Tiyi mi hiliɗi gaiku lai. E niyisi anene, e niyi warni hulum n’abai, duvuk ni ɗa e yimi wala ktai kai.

⁴Gorof par na hlai a sɗasi li edi ɗa, Yesu a halasi a ɗiya ɵimani ɗa ɗa zaw, amma ɗai zi hiri e siɗi ɓa A ni ɗa nɵa kai.

⁵Yesu a miɗiɗi: Aliya wala zi simi aŋ tiki ɗi? E wiyini seŋ e miɗi: Aŋ kai.

⁶A miɗiɗi: Sli ava na tiki ɗa midini graɗki na wus ɗa, aga ki yimi. Nɵa e ɵiɗki avaɗi midini graɗɗi na wus e yimi hilif viya haa avaɗi ɗa a yimasi amai gaiɗi kai.

⁷Nɵa ɗif zi hitri na Yesu a daraŋ gara ɗa a miɗini wiini Peter: A Epiɗ-ɗai sike. Won hlai na Peter a ɵina ɓa a Epiɗ-ɗai ɗa, a rga sapani pini buri a nafu gaɗala, a ɵa sini agoɗom aŋ zila sini sek,

⁸ɗai zi hitri na zamai ɗa e vilisi gaini hulum ɗa, e yimisi ava amai gaini vi gaini hilif, e ɗifu gaigai gaini wulani daŋ ɗa kai, a za li viya ɗa a metir miya ɗaw ɗi.

⁹Won hlai n’e niyisi li amai ɗa, e nivi morjoni afu gaini hilif midini gaini peŋ lai.

¹⁰Yesu a miɗiɗi: Ki milisi pini hilif na ki yimiɗsi tiyana ɗa, kiŋsi.

¹¹Simun Peter a niya warni hulum, a yimasi ava amai gdaŋ, a nava hilif n’abakai warni miya gaini doogo doogo ɵim pi hu; gaini viyani paŋ tekeɗeɗi, ava ɗa a ɓasa edi kai.

¹²Yesu a miɗiɗi: Hilisi simi. Ktai arbaɗi ɗai zi hitri n’a zilbaŋ ɓa tuku ku siya ɗa nɵa aŋ kai, buri e siɗi ya ɓa a Epiɗ-ɗai.

¹³Nɵa Yesu a halasi a tika peŋ a siŋɗi, a siɗi hilif ɗa nɵa lai.

¹⁴Hanɗa a azi n’ag'aŋ hu na Yesu a siŋka sini arɗi ɗaini zi hitri asakalni ɵiyini n’amai arbaɗi zi mri par ta ɗa.

¹⁵Asakal na e simi ya, Yesu a miɗini wiini Simun Peter ɓa: Simun ahini Yohana, ku daraŋa ku sûwiɗi nagai hanɗa ɗi? A waya seŋ a miɗini: Nkam Epiɗ-ɗai, tuku ku sɗa ya ɓa, ta mu marmaiku. Yesu a miɗini: Tika hangalku sini alini adumaiŋa.

¹⁶A zilbaŋ azi n’ag'aŋ sulu, Simon ahini Yohana, ku daraŋa ɗi? Peter a waya seŋ a miɗini: Nkam, Epiɗ-ɗai, tuku ku sɗa ɓa ta mu marmaiku. Yesu a miɗini: Ku giɗima adumaiŋa.

¹⁷A zilbaŋ azi n’ag'aŋ hu, a muɗa: Simon ahini Yohana, ku marmaya tiɓ? Peter, sini a kwima buri a zilbaŋ azi n’ag'aŋ hu ɓa: Ku marmaya tiɓ ɗi ɗa? A waya seŋ a miɗini: Epiɗ-ɗai, tuku ku sɗa wazagai paŋ, ku sɗa ya ɓa mu marmaiku. Yesu a miɗini: Tikini hangal wiini adumaiŋa.

¹⁸Jre jre mu muɗuku, won hlai na ku na agwi hai ɗa, ku naga santir wuzaku kiiku, ku hala warni hlai na ku daraŋ lai, amma won hlai na ku za li wel ɗa, aga ku yima graɗku amai kapai ɗif zamai a rguɗku, aŋ kuku wn hlai zamai na ku daraŋ kai.

¹⁹A muɗa seŋ hanɗa buri a siŋkitini wiini Peter midini mri n’aga a mra gaini, n’aga a sini kol wiini Alaw gaini. Asakal n’a muɗa hanɗa ya, a miɗini: Tapasi pa.

²⁰Won hlai na Peter a bundasi arni ɗa, a tala ɗif zi hitri na Yesu a daraŋ gara ɗa, ni n’a naka a hiɗila didikni Yesu won hlai n’e ɗa simi simi na koskoi aŋ zilbaŋ ɓa: Epiɗ-ɗai, n’aga a suku edi ɗa asiya ɗi ɗa? Ni lai a nafu piɗi su

²¹Won hlai n’a talaŋ, Peter a zilba Yesu a muɗa: Epiɗ-ɗai ni hanɗa koo!

²²Yesu a miɗini: Na ɓa mu firiya ɓa a sumna karni haa mu wayasi ɗa, seŋku woni ɗi? Tuku ɗa, halasi pa.

²³Asakal hanɗa par, labar a wa edi arbaɗi tawalakai ɓa, ɗif zi hitri hanɗa aga a mra kai. Paŋ ktai, Yesu a miɗini ɓa aga a mra kai ɗa kai, amma a miɗiŋ ɓa: Na ɓa a sumna karni haa hlai na mu wayasi ɗa, seŋku woni ɗi?

²⁴A za zaida midini wazagai hanɗa, a ɗoŋ lai ɗa a ɗif zi hitri ni ɗa, tiyi mi siɗi ɓa, zaidani ɗa a jre.

²⁵Yesu a za wazagai zamai zamai viya, na ɓa e ɗûŋ fu na ktai ktai paŋ ɗa, yai na gaiɗi abaiɗi maa te kiɗa te mula maktuɓ n’e ɗûŋ ɗa kai.