Read Mousgoum Yohana 4 Bible Online

Yohana 4 - Mousgoum bible

Yohana 4

¹Won hlai na Yesu a sɗa ɓa Farisekai e ɵini ya ɓa aŋ gaiɗi ɗai zi hitri viya, a na sa baptisme lai a suwa Yohana.

²War jreni kaai tiɓ ɗa, Yesu gaini midini dama a sa baptisme kai, e siɗɗa e ɗi ɗaini zi hitri.

³a yima sini edi midini afti na Yudia par a waya midini afti na Galeliya.

⁴A dewele ɓa a vuga warɗi Samariya par ɗaw.

⁵Nɵa a co warni fuŋ n’abai ktai na Samariya na yikini ɓa Sikar, gobi gaini vuwai na Yakob a siŋni wiini Yosef n’ahini.

⁶Keleɗi na wiini Yakob te nafu woni, Yesu gaini kayai tini hili su, a sumna amai miɗi keleɗi dam, futi gobi girvudi n’arba.

⁷Muni na Samariya ktai te halasi aŋ bula yem. Yesu a miɗiɗi: Sa yem ma do.

⁸Ɗaini zi hitri e ɗifu, e hili aha warni fuŋ n’abai e wirisi wala zi simi-

⁹Muni na Samariya ɗa te miɗini: Tuku ɗif na Yudia na ni, ku zilba yem zi ci ta ta muni na Samariya ɗa maɵa maɵa ɗa? Buri Yudeyakai ɗa e firiyi ɓa wala ktai a tipiɗi gaiɗi Samariyakai kai.

¹⁰Yesu a wiyiɗi seŋ: Ku sɗafu like na wiini Alaw ya ɗa, ku sɗa siɗi ni na muɗuku ɓa: Saɗa yem zi ci ma do na lai ɗa, a na ta ɗa, ku zilbaŋ ɗa ku tuku, ni ɗe aga a suku yem n’a sa suŋfa lai.

¹¹Muni te miɗini: Epiɗ-ɗai, wala zi bili yem tuku kai, keleɗi ɗe hulumi lai, nɵa yem n’a sa suŋfa hanɗa, ku navaɗsi wata par ɗa?

¹²Tuku ɗa, abai ku suwa Yakob n’epiyi n’a sitiyi keleɗi hanɗa, na ni dama a ca yem warɗi par gaiɗi alini, gaini faraini lai ɗi?

¹³Yesu a waya seŋ a midiɗi: Asiya ɗi paŋ n’a sa yem hanɗa, sai aga te zaŋ pra.

¹⁴Ni n’aga a ca yem na ta aga mu siŋni ɗa, sai aga te zaŋ kir kai zaŋ, yem n’aga mu siŋni ɗa, aga a bunda warni aŋ yem zi liwi, aga a liwa haa sini suŋfa n’a vada kai.

¹⁵Muni te miɗini: Epiɗ-ɗai, saŋa yem hanɗa kapai sai te zaŋa kir kai, kapai mu wayasi aŋ bula yem woni na pra kir kaalai.

¹⁶Yesu a miɗiɗi: Hala, yikasi mofaku ka, kapai ku wayasi.

¹⁷Muni te miɗini: Mafa aŋ kai. Yesu a miɗiɗi: Ku muɗa ɓa mafa aŋ kai ɗa, ku muɗa a jre,

¹⁸buri ɓa, ku mula maɵagai ɵim, ni n’aŋ gaiku tiyana ɗa a mafu kai, nɵa ɗa ku muɗa ɗa a jre.

¹⁹Muni te miɗini: Epin-geza, a yima li mada ɓa tuku ku ɗif na mini Alaw.

²⁰Tamaiyi e hûrgi azumai wuzani Alaw amai midiɗi huwuŋ hanɗa, amma tiki ki miɗi ɓa, hlai n’e hûrgi azumai wuzani Alaw warni ɗa, a na ɗa a Yeruzalem.

²¹Yesu a miɗiɗi: Muni, seŋ na mu muɗuŋku na ɗa, yimaŋ muduku pɗem, hlai aga a halasi n’aga ki hûrgi azumai wuzani Api ɗa midiɗi huwuŋ hanɗa kaalai, a Yeruzalem kaalai.

²²Tiki ɗa, ki hûrgi azumai wuzani wala na ki sɗiŋ kai, amma tiyi ɗa, mi hûrgi azumai wuzani wala na mi sɗiŋ buri kûri a halasi siɗi Yudeyakai par.

²³Amma hlai aga a halasi, a cosi ya lai, war hlai ni, ɗai n’e hûrgi azumai wuzani Api jre jre ɗa, aga e hûrgi azumai wuzani Api war seze, war jre lai. Buri hanɗa e ɗi ɗai n’e hûrgi n’Api a firyiɗi ɗa.

²⁴Alaw a Seze, a zuva ɓa nagai n’e hûrgi azumai wuzani ɗa, e hûrgi azumai war seze, war jre lai.

²⁵Muni te miɗini: Mu sɗa ɓa Mesiyas aga a halasi, - Ni n’e yikiŋ ɓa Kristu ɗa, won hlai n’a halasi li ɗa, aga a muɗumu midini wazagai n’aga a za ɗa paŋ.

²⁶Yesu a miɗiɗi: Mu muɗuku na ɗa mu ta mal.

²⁷War hlai ni ɗaini zi hitri e cûsi, e bindi hiyak buri e niviŋ a na haɗa kalaŋ gaiɗi muni, gaini hanɗa paŋ ktai n’a miɗini ɓa, ku paya a maɗa, kalaŋku na gaiɗi a wiini a maɗa? Nɵa kai.

²⁸Nɵa muni te hinitika arginiɗi ta, te hala aha war fuŋ n’abai, te miɗiɗi wiiɗi ɗai ɓa:

²⁹Hilisi haw, ɗif ktai aŋsi na, a muɗaŋa wazagai na mu zaŋ ɗa paŋ, a Kristu ɗa ɗi?

³⁰Ɗai e niyisi edi war fuŋ n’abai ɗa par e hilisi sini.

³¹Won hlai ni ɗaini zi hitri e miɗini: Rabbi, suma.

³²Amma a miɗiɗi: Mu na suma simi na tiki ki sɗiŋ kai.

³³Nɵa ɗai zi hitri e miɗi arbaɗi marɗi: Ɗif a kinisi simi ɗi?

³⁴Yesu a miɗiɗi: Simi na wiya ɗa, azi na mu za pini dirini Ni n’a ɵiɓasi, a vi na mu va sdani amai ɗa lai.

³⁵Tiki ki miɗi ɓa, tile aŋ kai puɗu kapai hiɗi a za, amma mu miɗiki: Yimi arki amai, tili, vuwai ɗa a naya ya, a hina ɗa a hiɗi.

³⁶Tiyana par ɗif zi hiɗi a nava vrak, a haɗa ali burini, na buri suŋfa n’a vada kai ɗa lai, kapai ɗif zi sûûɗi lai, zi hiɗi lai e firiyi piɗi marɗi aŋ bonu.

³⁷Buri nɵa, seŋ joro n’a muɗa ɓa: Na ktai a suuɗa, na ktai a haɗa lai ɗa a jre.

³⁸Ta mu ɵiniki aŋ hiɗi wala na ki ɵini girni ktai siki kai. Zamai e zi sdani ɗa, tiki ki cûsi ki hiɗi seyemni ɗa.

³⁹Samariyakai viya na war fuŋ n’abai hanɗa par, e yimi warni burini seŋ na muni te muɗaŋ ɓa: A muɗaŋa wazagai na mu zaŋ ɗa paŋ ɗa.

⁴⁰Nɵa won hlai na Samariyakai e cû sini ɗa, e siiwiŋ buri a sumna gaiɗi, a sumna woni mefeŋ sulu.

⁴¹N'e yimi pini seŋni ɗa, viya e sûwi pra.

⁴²E miɗiɗi wiiɗi muni: Tiyi mi yimi ɗa pini seŋku kir kai, buri ɓa tiyi mi ɵini na mini par ya, tiyi mi siɗi ɓa A ni n’aga a kûrɗiɗi ɗai na warɗi yai par fakat fakat.

⁴³Asakal mefeŋ na sulu hanɗa par, a fakaɗi woni par a hala a Galeliya.

⁴⁴-Buri ɓa Yesu gaini midini dama a muɗa ya ɓa: Ɗif na mini Alaw a nava kol midini aftini dama kai. -

⁴⁵Won hlai n’a co a Galeliya ɗa, ɗai na Galeliya e yimiŋ siɗi pɗem buri e hilisi wazagai n’a zaŋsi a Yeruzalem miɗi fet ɗa.

⁴⁶A waya katawai a Kana na war Galeliya war hlai n’a bunda yem aŋ vin woni ɗa. Abaiɗi askarai ktai na war pinzibaɗi pai a nafu a Kapernahum, ahini a na veglek,

⁴⁷Won hlai n’a ɵina ɓa war Yudia par Yesu a halasi a Galeliya ya ɗa, a hala mini aŋ zilbaŋ buri a halasi aŋ zuula ahini n’a na gobi gaini mri.

⁴⁸Yesu a miɗini: Na ɓa ki tili wala zi siŋki gaini zi hiila kai ɗa ki yimi duk kai.

⁴⁹Abaiɗi askarai na war pinzibaɗi pai a miɗini: Epin-geza, halasi ahaya, ɵa kai ɗa, ahiya ɗa a mra na ɗa a mri.

⁵⁰Yesu a miɗini: Hala, ahiku ɗa aŋ karni, ɗif a yima seŋ na Yesu a miɗiŋni ɗa, a hala lai.

⁵¹Won hlai n’a na halasi ɗa, ɗaini zi sda e hilisi mini aŋ miɗini ɓa: Ahini a na karni.

⁵²A zilbiɗi a muɗa: Ahiyagwi a bunda mariya ɗa war ler na wata ɗa? E miɗini: Eɗibi, sa ktai, sini n’a sawa ɗa, a ɵaɗa azumai.

⁵³Nɵa, api a sɗa ɓa a sarti na Yesu a miɗini ɓa, ahini aŋ karni ɗa. A bunda aŋ ɗif zi yimi ni gaini dalamni paŋ lai.

⁵⁴Yesu a za wala zi siŋki n’ag'aŋ sulu hanɗa won hlai n’a wayasi war Yudia par a Galeliya.