Read Mousgoum Yohana 5 Bible Online

Yohana 5 - Mousgoum bible

Yohana 5

¹Asakal hanɗa fet na wiiɗi Yudeyakai te za, Yesu a hala amai a Yeruzalem.

²Amma a Yeruzalem gobi ɵimani magala na wiini adumai avai ktai te na n’e yikiti war meme na wiiɗi Hebrekai ɓa: Betzata, balak n’abai a na ɵim.

³Azumai pini balak n’abakai hanɗa, zi veglek e ɗa, na malvanai, na daŋalaŋai, na höyökai e ɗa.

⁴Hlai zamai ɗa, ɗif zi ɵeŋ na war fuŋ-n’Alaw par a niyasi azumai warɗi avai, a durguza yem ɗa amai, ɗif n’a niya li asakalni dûrgûzini yem ɗa, a zuula, koo ɓa aŋ sini a veglek na wata ɗi.

⁵Ɗif ktai a nafu woni veglek, a buz a war veglekni buza doogo doogo- hu-pi-miwis.

⁶Yesu a talaŋ waŋ, a sɗa ɓa aŋ woni na buza yaw, a zilbaŋ a muɗa: Ku firiya ku nava zûûli ɗi?

⁷Ɗif zi veglek a waya seŋ a miɗini: Epiɗ-ɗai, ɗif ktai n’a tikaɗa agoɗom warɗi avai won hlai na yem a durguza li amai ɗa aŋ kai, won hlai na mu co ta ɗa, ktai a niya agoɗom li, ktai a niya agoɗom li.

⁸Yesu a miɗini: Faka amai, tika walaku zi feŋ, hala.

⁹Tizaw tar, ɗif a nava zûûli, a tika walani zi feŋ, a hala lai. Amma mefeŋ ni ɗa a mefeŋ Sabbat.

¹⁰Nɵa Yudeyakai e miɗini wiini ɗif n’a zuula ɓa: Girna ɗa a Sabbat, futi te sa buri ku luba walaku zi feŋ ɗa kai.

¹¹A wiyiɗi seŋ a muɗa: Ni n’a zuulaɗa ɗa a muɗaŋa ɓa: Tika walaku zi feŋ, hala.

¹²E zilbiŋ e miɗi: Ɗif n’a muɗuku ɓa: Tika walaku zi feŋ, hala lai ɗa, asiya ɗa?

¹³Amma ni n’a zuula ɗa, a sɗa ni n’a zuulaŋ kai, buri Yesu a dila dila buri firiɗi ɗai e ɗifu woni viya.

¹⁴Asakal hanɗa Yesu a navaŋ amlai warni tempel, a miɗini: Pɗem, ku nava zûûli ya, ku za tuwur kir kai, kapai wala na meefeŋ n’a suwa hanɗa a za suku kai.

¹⁵Ɗif a hala a miɗiɗi wiiɗi Yudeyakai ɓa a zuulaŋ ɗa a Yesu.

¹⁶Nɵa, Yudeyakai e zini gir wiini Yesu buri a za hanɗa war Sabbat.

¹⁷Yesu a waya seŋ miɗiɗi: Apa a na za sda haa tiyana, ta lai mu z a sda.

¹⁸Buri hanɗa, Yudeyakai e piyiŋ a suwa pra buri e fiɗiŋ edi. Buri sda n’a zaŋ war Sabbat ɗa kiini kai, amma buri a yika sini ɓa, Alaw ɗa a Epini mal, a kata sini gaini Alaw.

¹⁹Yesu a waya seŋ a midiɗi: Jre, jre, mu miɗiki, Ahi a kiɗa a za wala gaini midini dama kai, sai a n’a talaŋ sini Epini par, wala na Api a zaŋ ɗa, Ahi a zaŋ kal kal ɵa lai.

²⁰Buri Api a marmaini Ahi, a siŋkitini wazagai n’abakai a suwa pra, kapai tiki ki bindi hiyak.

²¹Buri maini Api a ɵiyiɗi zi mri amai war mri par a bindiɗi karɗi, nɵa Ahi lai a sa suŋfa wiini asiya ɗi paŋ pini dirini.

²²Pra, Api a ɗûkûlitri sariya midini ɗif kai, a sini sariya war tini ahi.

²³Kapai ɗai paŋ e sini hormo wiini Ahi maini n’e siŋni wiini Api ɗa nɵa, ni n’a sini hormo wiini Ahi kai ɗa, a sini hormo wiini Api n’a ɵinaŋsi ɗa kaalai.

²⁴Jre, jre, mu miɗiki: Ni n’a ɵina seŋŋa, n’a yima warni ni n’a ɵinaŋasi lai, suŋfa n’a vada kai a wiini. Aga a niya warni sariya kai, a vuga war mri par sini suŋfa.

²⁵Jre, jre mu miɗiki, hlai aga a halasi, a cosi ya lai, won hlai ni ɗai zi mri aga e ɵini wulani ahini Alaw, nagai n’e ɵini wulani li ɗa, aga e bindi karɗi.

²⁶Buri maini Api suŋfa aŋ warni sini dama, nɵa lai a sini wiini Ahi buri aŋ nava suŋfa warni sini dama,

²⁷a sini spak aŋ ɗûkliti sariya buri ɓa a Ahini-ɗif.

²⁸Ki bindi hiyak burini hanɗa kai, buri hlai aga a halasi, woni hlai ni, nagai n’e ɗa warni waŋ ɗa paŋ aga e ɵini wulani.

²⁹Aga e niyisi edi, nagai n’e zi pɗem e ɵiyi war suŋfa n’a vada kai, nagai n’e zi meefeŋ e ɵiyi amai warni suŋfa lai.

³⁰Ta ɗa, mu za wala gaini mada dama kai, mu ɗûkliti sariya pini wala na mu ɵinaŋ ɗa, sariyaŋa te jre buri ɓa mu paya ɗa a diriŋa kai, amma a diri na wiini Ni n’a ɵinaŋasi ɗa.

³¹Na ɓa mu za zaida mada muta dama ɗa, zaidaŋa a jre kai.

³²A za zaida mada ɗa a ɗif zamai, mu sɗa lai ɓa, zaidani n’a zaŋ mada ɗa a jre.

³³Ki ɵini ɗai sini Yohana ki ɗi tiki, a za zaida midini jre lai.

³⁴Amma ta ɗa, a za zaida mada ɗa a ɗif kai, amma mu muɗa hanɗa kapai tiki ki nivi kûri.

³⁵Ni ɗa a naka ɗa a lampa n’a ya, a za gaglai, amma tiki ki firiyi pini gaglai buri hlai n’agwi.

³⁶Ta ɗa, zaida na mada ɗa abai a suwa na wiini Yohana ɗa, buri ɓa sda na Api a saŋŋa aŋ vaŋ amai ɗa, sda na mu na zaŋ hanɗa, a za zaida mada, a siŋkaŋa edi ɓa a ɵinaŋasi ɗa a Api.

³⁷Api n’a ɵinaŋasi ɗa ni gaini midini dama a za zaida mada, ki ɵini wulani duk kai, ki tili wuzani arni duk kaalai.

³⁸Seŋni a sumna warki kai buri ɓa ki yimi warni Ni n’a ɵinaŋsi ɗa kai.

³⁹Tiki ki fifiki ɗû war hiini na ɓa aga ki nivi suŋfa n’a vada kai warni, paŋ ktai a za zaida mada ɗa a ɗû hanɗa lai.

⁴⁰Tiki ki diri ki hilisi sa aŋ nivi suŋfa kai.

⁴¹Kol na wiya mu navaŋ siɗi ɗai par kai, mu siɗiki ya, tiki ɗa diri na wiini Alaw aŋ warki kai.

⁴²

⁴³Ta mu halasi war yikini Apa, amma tiki yimiɗa kai, na ɓa ɗif zamai a halasi war yikini ni dama, ɗif ni ɗa tiki aga ki yimiŋ siki.

⁴⁴Ki siɗi aŋ yimi maɵa maɵa ɗa? Ki piyi ɗa a kol n’a halasi sini Alaw par kiini kai.

⁴⁵Ki hiini ɓa ta aga mu pa seŋ miɗiki wuzani Apa ɗi ɗa, ki hiini nɵa kai. Ni n’aga a pa seŋ miɗiki ɗa a Musus na tiki ki tiki hiiniki paŋ midini ɗa.

⁴⁶Buri ɓa ki yima yimi pini Musus ɗa, aga ki yimi pa lai, buri ɓa ni a ɗo ɗa mada.

⁴⁷Amma na ɓa ki yimi pini ɗû na wiini kai ɗa, aga ki yimi pini na wiya ɗa maɵa maɵa ɗa?