Read Mousgoum Yohana 6 Bible Online

Yohana 6 - Mousgoum bible

Yohana 6

¹Asakal hanɗa Yesu a bunda anene kata wulani yem-ra n’abai na Galeliya, yem-ra n’abai na Tiberiyade.

²Vok n’abai a tapa pini buri e tili wazagai zi siŋki n’a zaŋ siɗi ɗai zi veglek.

³Yesu a niya amai midiɗi huwuŋ, woni a sumna azumai gaiɗi ɗaini zi hitri.

⁴Won hlai ni ɗa, fet na wiini Paska na wiiɗi Yudeyakai te ŋasi gobi.

⁵Yesu a yima arni amai, a tala firi n’abai e ɗa hilisi sini, a miɗini wiini Filip: Aga mu wurumusi peŋ na kapai ɗai hanɗa e simi paŋ ɗa wata par ɗa?

⁶A muɗa hanɗa buri a tetemaŋ, buri a sɗa ya buri ni a sɗa wala n’aga a zaŋ ɗa ya.

⁷Filip a wiyini seŋ: Koo ɓa peŋ sulai miya sulu tekeɗeɗi a kiɗa a ɓurwa miɗi paŋ kai.

⁸Ktai arbaɗi ɗaini zi hitri, Andre na tawalni Simun Peter a miɗini:

⁹Ahiyagwi ktai aŋ woni na na peŋ na wiini orge aŋ tini ɵim, hilif sulu lai. Hanɗa a kiɗa ɗa a maɗa buriɗi ɗai na e ɗiŋ ɗa?

¹⁰Yesu a muɗa: Miliɗi ɗai hanɗa azumai, hlai ni ɗa evek a nafu woni viya, nɵa e simni azumai, pɵaɗi a za gobi maɵagai dubu ɵim.

¹¹Yesu a mula peŋ ɗa, a sa tese, a buruwaŋ wiiɗi nagai n’e ɗa taaha ɗa, a za gaini hilif ɗa nɵa lai, e nivi paŋ maini n’e diri nɵa.

¹²Won hlai n’e vi li paŋ, a miɗiɗi wiiɗi ɗaini zi hitri: Pini n’a hina ki tipiŋ amai kapai wala a ɓa kai.

¹³Nɵa e tipiŋ amai, e vi dologo doogo pi sulu, gaini kolkoɗaini peŋ na wiini orge na ɵim n’a hinasi n’a hinasi piɗi ɗai n’e simi ɗa

¹⁴Won hlai n’e tili siŋki n’a zaŋ ɗa, ɗai e miɗi: Ni ɗa, a ɗif na mini Alaw n’aga a halasi warɗi yai ɗa jre jre.

¹⁵Won hlai na Yesu a sɗa ɓa aga e hilisi e yimiŋ buri e tikiŋ aŋ pai ɗa, a yima sini edi kiini amai midiɗi huwuŋ pra.

¹⁶Hlai na futi te za li koskoi ɗa, ɗaini zi hitri e hili agoɗom wulani yem-ra n’abai.

¹⁷E niyi amai war hulum n’abai buri e hili a Kapernahum, anene kata wulani yem-ra n’abai ɗa par, hlai a za gegeŋ ta, Yesu a cosi siɗi kai hai.

¹⁸Smer na gdaŋ a vuvuwa, mayaw a tika pini a za.

¹⁹Asakal na ɗai zi hitri e fili haa a za kilometir ɵim zaw ɵaara ɗi ɗa, e tili ɗa Yesu a na midini yem blaŋ, a n’a halasi sini hulum n’abai ɗa sek, hunai a yimiɗi.

²⁰Amma a miɗiɗi: Muta, ki hûni kai.

²¹Nɵa e firiyi e tikiŋ amai warni hulum n’abai ɗa, yafai kai, hulum a yima amai war hlai n’e firiyi e hili woni ɗa.

²²Dawaini, faraɗi ɗai n’e hinisi anene kata ɗa wulani yem-ra n’abai ɗa par ɗa, midiɗi a kɵa ɓa hulum n’abai ɗa a naka ɗa ktai, Yesu a niya amai warni gaiɗi ɗaini zi hitri ɗa kai, ɗaini zi hitri ɗa e hili kiiɗi.

²³Amma hulamai zamai n’abakai a halasi a Tiberiyade par gobi gaini hlai n’e limi peŋ woni, asakal n’EPIƊ-ƊAI a sa tese ya.

²⁴Won hlai na firiɗi ɗai e tili ɓa Yesu lai, ɗaini zi hitri lai, e ɗi kai ɗa, nagai dama e niyi warni hulamai n’abakai hanɗa, e hilisi a Kapernahum aŋ piyi Yesu.

²⁵E niviŋsi anene kata wulani yem-ra ɗa, e miɗini: Rabbi, ku cosi woni na kas wa?

²⁶Yesu a waya seŋ a miɗiɗi: Jre, jre, mu miɗiki: Tiki, ki piyiŋa na ɗa buri ki tili wazagai zi siŋki ɗa kai, amma buri ki limi peŋ, ki vi lai.

²⁷Ki zi sda burini simi n’a vada edi ɗa kai, amma burini n’a na haa sini suŋfa n’a vada kai. Simi na Ahini-ɗif aga a siŋki buri ɓa A ni n’Api Alaw a tika tanpoɗni midini.

²⁸E miɗini: Aga mi zi ɗa a maɗa, kapai mi zi sda n a wiini Alaw ɗa?

²⁹Yesu a waya seŋ a miɗiɗi: Sdani Alaw a na ɗa ɓa, ki yimi warni Ni n’a ɵinaŋsi.

³⁰Nɵa, e miɗini: Wala zi siŋki n’aga ku za ɗa a na wata ɗa? Na kapai mi tiliŋ, kapai mi yimi puku ɗa a na wata ɗa? Aga ku za ɗa, a sda maɗa?

³¹Tamaiyi e simi mana edi war basga na kaɗataŋ, maini n’aŋ gaini ɗûɵa ɗa, a siɗi peŋ n’amai par aŋ simi.

³²Yesu a miɗiɗi: Jre, jre, mu miɗiki, a siki peŋ n’amai par ɗa a Musus kai, a siki peŋ n’amai par na jre ɗa a Apa.

³³Buri ɓa peŋ n’Alaw a saŋ ɗa, a n’a halasi amai par aŋ sa suŋfa wiiɗi ɗai na warɗi yai ɗa.

³⁴E miɗini: Epiɗ-ɗai, siyi peŋ ni ɗa kûreɗ-kûreɗ.

³⁵Yesu a miɗiɗi: Ta mu peŋ n’a sa suŋfa, ni n’a halasi sa, wiyamai aga te zaŋ kir kai, ni n’a yima wara sai aga te zaŋ kir kaalai.

³⁶Amma mu miɗiki ya ɓa: Ki tiliŋa, amma ki yimi kai.

³⁷N'Apa a saŋŋa paŋ aga a halasi sa. Ni n’a halasi li sa ɗa aga mu birgaŋ edi duk kai zaŋ.

³⁸Buri mu halasi amai par ɗa aŋ zi diriŋa kai, amma aŋ zi dirini Ni n’a ɵinaŋasi.

³⁹Dirini Ni n’a ɵinaŋasi ɗa, a na ɗa ɓa: Ktai arbaɗi nagai n’a sɗiɗa ta ɗa a ɓa edi kai, amma mu ɵiyiɗi amai war mefeŋ na asakal ɗa.

⁴⁰Buri dirini apa a na ɗa ɓa: Asiya ɗi paŋ n’a tala ahi li, a ɗiya yimini li warni lai ɗa, a nava suŋfa n’a vada kai, Ta aga mu ɵiyaŋ amai war mefeŋ na asakal.

⁴¹Yudeyakai e ŋûriyi pini buri a muɗa ɓa, Ta mu peŋ n’a halasi amai par.

⁴²E miɗi: Hanɗa a Yesu n’ahini Yosef ɗa kai ɗi? Na mu suɗumu epini gaiɗi emini kai ɗi?

⁴³Yesu a waya seŋ a miɗiɗi: Ki ŋûriyi arbaɗi marki kai.

⁴⁴Ɗif a kiɗa a halasi sa kai na ɓa Api a gidiyaɗsi kai ɗa, nɵa aga mu ɵiyaŋ amai war mefeŋ na asakal.

⁴⁵Aŋ gaini ɗû war maktuɓ na wiiɗi ɗai na mini Alaw maini nɵa: Nagai paŋ Alaw aga a hitriɗi, Asiya ɗi paŋ n’a ɵina mini Api, n’a yima hitrini lai ɗa, aga a halasi sa.

⁴⁶Ɗif n’a tala Api aŋ kai, sai Ni n’a halasi sini Alaw par, Ni a tala Api ɗa ya.

⁴⁷Jre jre mu miɗiki: Ni n’a yima, suŋfa n’a vada kai a wiini.

⁴⁸Ta mu peŋ n’a sa suŋfa, tamaiki e simi mana edi war basga na kaɗaan, e mri lai.

⁴⁹

⁵⁰Peŋ n’a na ɗa a n’a halasi amai par kapai asiya ɗi paŋ n’a sumaŋ li a mra kir kai.

⁵¹Peŋ na karni n’a halasi amai par ɗa Muta, ɗif n’a luma peŋ hanɗa li ɗa, aga a sumna karni pra. Peŋ na ta aga mu siŋni ɗa, a neɗ-sa kapai ɗai na yai e simni karɗi gaini.

⁵²Yudeyakai e zi hiy arbaɗi marɗi: Ɗif hanɗa a sumu neɗ-sini aŋ limi ɗa maɵa maɵa ɗa?

⁵³Yesu a miɗiɗi: Jre, jre, mu miɗiki: Na ɓa ki limi neŋ-si na wiini Ahini-ɗif kai, ki ci felni Ahini-ɗif kaalai ɗa, tiki suŋfa aŋ warki kai.

⁵⁴Ni n’a luma neɗ-sa, n’a ca fel ɗa lai ɗa, suŋfa n’a vada kai a wiini, Ta aga mu ɵiyaŋ amai war mefeŋ na asakal.

⁵⁵Buri neɗ-sa ɗa a wala zi simi na gaini futini, fel ɗa ɗa a wala zi ci na gaini futini lai.

⁵⁶Ni n’a luma neɗ-sa, n’a ca fel ɗa lai ɗa, a sumna wara ta, maini na ta m’aŋ warni ni nɵa.

⁵⁷Api n’a ɵinaŋasi ɗa a na karni, Ta mu na kara burini Api lai, nɵa ni n’a luma li sa ɗa aga a sumna karni buriya.

⁵⁸Hanɗa a peŋ n’a halasi amai par ɗa, a na maini na tamaiki e limiŋ e mri lai ɗa nɵa kai, ni n’a luma peŋ hanɗa li ɗa, aga a sumna karni haa hlai n’a vada kai.

⁵⁹Hanɗa a wala n’a muɗaŋ won hlai n’a na hitra warr sinagogne a Kapernahum.

⁶⁰Asakal n’e ɵini seŋni ya, viya arbaɗi ɗaini zi hitri e miɗi: Seŋ hanɗa gdaŋ koo, ɗif n’a yimaŋ ɗa asiya ɗa?

⁶¹Won hlai na Yesu a tiliɗi ɗaini zi hitri e ɗa ŋûriyi a miɗiɗi: Hanɗa a wala zi dibi azi buriki ɗi?

⁶²Kapai ki tili li Ahini-ɗif a niya amai war hlai n’a nasi ka warni avut ɗa koo!

⁶³A sa suŋfa ɗa a Seze, neŋ-si ɗa a nafa wala kai. Seŋ n’a mu miɗiŋki hanɗa a Seze, a suŋfa lai.

⁶⁴Amma zamai e ɗa arbaki e diri e yimi kai ɗa haa war pi zi tiki par gaini ni n’aga a saŋ edi lai.

⁶⁵A miɗiɗi: Mu miɗiki ɓa, ɗif a kiɗa a halasi sa kai, na ɓa a sa sini sini Api par kai ɗa buri hanɗa.

⁶⁶Woni par, viya arbaɗi ɗaini zi hitri e wiyi duɓaɗi kir kai.

⁶⁷Nɵa Yesu a miɗiɗi wiiɗi na doogo pi sulu: Tiki ɗa ki firiyi ki hili.

⁶⁸Simun Peter a waya seŋ a miɗini: Epiɗ-ɗai, tiyi kapai mi hili pini asiya ɗa? Seŋ n’a sa suŋfa n’a vada kai ɗa aŋ muku koo!

⁶⁹Tiyi ɗa a yima midiyi ya, mi siɗi ɓa na sɗik na wiini Alaw ku tuku.

⁷⁰Yesu a waya seŋ a miɗiɗi: Mu virikisi muta kai ɗi, tiki na doogo pi sulu ɗa, paŋ ktai ktai arbaki a Mat.

⁷¹A muɗa ɵa na ɗa midini Yudas, n’ahini Simun Iskariyot, buri a ni n’aga a saŋ edi, ni a ktai arbaɗi na doogo pi sulu lai.