Read Mousgoum Yohana 7 Bible Online

Yohana 7 - Mousgoum bible

Yohana 7

¹Asakal hanɗa, Yesu a paya midini afti na Galeliya, buri ɓa a firiya a paya midini afti na Yudia kai, buri Yudeyakai e firiyi e fiɗiŋ edi.

²Amma fet na wiini gumu na wiiɗi Yudeyakai e nafu gobi, tawalakaini e miɗini: Faka woni na par, hala war Yudia kapai ɗaiku zi hiri lai e tili sdaku na ku na zaŋ ɗa.

⁴Ɗif n’a firiya a siŋka sini edi ɗa a za wala war ŋoyai kai, na ɓa ku na za wazagai hanɗa, siŋka suku edi arɗi ɗai.

⁵Buri ɓa koo tawalakaini tekeɗeɗi, e ɗiyi yimiɗi midini kai.

⁶Yesu a miɗiɗi: Hlai na wiya a cosi kai hai, amma na wiiki a na ɵa kureɗ.

⁷Ɗai na yai e kiɗi e bili gaw siki kai buri mu na za zaida ɓa sdaɗi a meefeŋ.

⁸Tiki ɗa, hili amai miɗi fet ɗa, Ta ɗa mu halaɗi a hili miɗi fet hanɗa kai buri ɓa hlaiŋa a vasi amai kai hai.

⁹Asakal n’a muɗa hanɗa ya, a sumna war Galeliya.

¹⁰Amma won hlai na tawalakaini e hili amai miɗi fet ɗa ya, Ni lai a hala, a hala edi papɗak kai, amma war kuɗuhai.

¹¹Yudeyakai e piyiŋ miɗi fet ɗa, e miɗi: Ɗif ni ɗa aŋ wata ɗa?

¹²Arbani vok ɗa, ɗai e miɗi gaini viya, zamai e miɗi ɓa: Zamai e miɗi ɓa a ɗif na pɗem, na zamai pra e miɗi ɓa, a ɗif zi wili ɗai edi.

¹³Paŋ ktai ɗif n’a muɗa wala gaglai midini nɵa aŋ kai, e hiini buriɗi Yudeyakai.

¹⁴Won hlai na fet te co haa arba ta ɗa, Yesu a halasi amai warni tempel woni a hitriɗi ɗai.

¹⁵Yudeyakai e bindi hiyak e zilbi siɗi ɓa, ɗif hanɗa a hitra kaalai ɗa a sɗa ɗûɵa maɵa maɵa ɗa?

¹⁶Yesu a waya seŋ a miɗiɗi: Hitri na wiya ɗa mu navaɗsi gaini mada dama kai, amma a halasi sini Ni n’a ɵinaŋasi ɗa par.

¹⁷Na ɓa ɗif a dara a za diri na wiini Alaw ɗa aga a sɗa ɓa, hitriɗa aŋ sini Alaw par, zaw, mu zaŋ ɗa gaini mada dama ɗi?

¹⁸Ni n’a muɗa gaini midini dama ɗa, a paya ɗa a kol na wiini, amma ni n’a paya kol na wiini Ni n’a ɵinaŋasi ɗa, a na jre, meefeŋ warni kai.

¹⁹Musus a siki gadai zi ɗû kai ɗi? Paŋ ktai, ktai n’a za pini gadai zi ɗû aŋ kai, ki piyi aŋ fiɗiɗa edi buri maɗa?

²⁰Firiɗi ɗai e wiyini seŋ e miɗi: Ksalai aŋ muduku, n’a paya aŋ fuɗuku ɗa asiya ɗa?

²¹Yesu a waya seŋ a miɗiɗi: Mu za na ɗa a sda ktai, tiki paŋ ki bindi hiyak burini.

²²Musus a siki ɵini-gûrgûle, a na sini Musus par kai, buri ɓa aŋsi haa siɗi tiyakaiki par, tiki ki ɵi wiini ɗif war mefeŋ na wiini Sabbat.

²³Na ɓa ɗif a nava ɵini gûrgûle war mefeŋni Sabbat kapai gadai na wiini Musus ɗa a fuɗa edi kai, nɵa tiki ki zi hiy sa buri mu zuula ɗif war Sabbat ɗa buri maɗa?

²⁴Ki ɗûkliti sariya pini arai kadai kai, a zuva ɓa sariyaki ɗa a za war jre.

²⁵Yesu a Kristu ɗi? Ɗai zamai na Yeruzalem e miɗi: Hanɗa a ni n’e ɗa piyiŋ aŋ fiɗi edi ɗa kai ɗi?

²⁶A muɗa na edi papɗak, ɗif a na miɗini seŋ kaalai koo! N'abakai na wimu ɗa, e siɗi ya jre ɓa, Ni a Kristu tiɓ.

²⁷Ɗif hanɗa, tiyi mi siɗi hlai n’a halasi woni par ɗa, amma Kristu won hlai n’aga a halasi ɗa, ɗif a sɗa hlai n’a halasi woni par kai.

²⁸Nɵa Yesu won hlai n’a na hitra warni tempel ɗa a ɗuula a muɗa: Tiki ki siɗiɗa, ki siɗi hlai na mu halasi woni par lai, paŋ ktai mu halasi gaini mada dama kai, Ni n’a ɵinaŋasi ɗa a jre, tiki ɗa ki siɗiŋ kai.

²⁹Ta mu sɗaŋ buri mu halasi sini par, a ɵinaŋasi ɗa a ni lai.

³⁰Nɵa e piyi aŋ yimiŋ, amma ɗif n’a tika tini sini aŋ kai, buri ɓa lerni a cosi kai hai.

³¹Arbani firiɗi ɗai par ɗa, viya e yimi pini, e miɗi: Won hlai na Kristu a halasi li ɗa, aga a za wazagai zi siŋki a suwa na ɗif hanɗa a na zaŋ ɗa ɗi?

³²Farisekai e ɵini wala na ɗai e ɗa ŋûriyi pini ɗa, nɵa paakai n’abakai zi ɓaka gaiɗi Farisekai e ɵiniɗi askarai zi gɗam buri e yimiɗsi.

³³Yesu a miɗiɗi: Mu na gaiki burini hlai n’agwi, aga mu waya sini Ni n’a ɵinaŋasi ɗa.

³⁴Aga ki piyiɗa, amma aga ki niviɗa kai, hlai na mu woni ɗa, ki kiɗi ki cûsi woni kai.

³⁵Yudeyakai e miɗi arbaɗi marɗi: A hala ɗa wata ɗa, na kapai mu nuvuɗmu kai ɗa? A firiya a hala edi arbaɗi nagai n’e ɵiri edi arbaɗi grekkai, zaw, a firiya a hala a hitriɗi grekkai ɗi?

³⁶Seŋ n’a muɗaŋ ɓa: Aga ki piyiɗa, amma aga ki niviɗa kai, hlai na mu hala woni ɗa tiki ki cûsi woni kai ɗa, a siŋka ɗa a maɗa?

³⁷Mefeŋ na asakal, mefeŋ n’abai na wiiɗi fet ɗa, Yesu a ɗiya amai zaw a ɗuula a muɗa: Ɗif na sai te na zaŋ ɗa a halasi sa aŋ ca yem,

³⁸ni n’a tika yimini li mada, ra zi yem na karni aga a kasi edi warni par maini na ɗû a muɗa ɗa nɵa.

³⁹A muɗa ɵa na ɗa midini Seze sɗik na nagai n’e ɗiyi yimiɗi midini aga e niviŋ ɗa, buri ɓa Seze a nafu kai hai, buri Yesu a niya warɗi abai kai hai.

⁴⁰Zamai arbaɗi firi par, won hlai n’e ɵini seŋ hanɗa, e miɗi: Jre, Ni ɗa a ɗif na mini Alaw.

⁴¹Na zamai pra e miɗi: A Kristu. Amma zamai e miɗi: Kristu ɗa a halasi a Galeliya par ɗi?

⁴²Ɗû a muɗa ɓa: Kristu ɗa aga a halasi war pinzibani David par, war Betlehem, fuŋ na David a naka warni par kai ɗi?

⁴³Nɵa braw a za arbaɗi ɗai burini.

⁴⁴Zamai arbaɗi e piyi e yimiŋ, amma ɗif n’a tika tini sini aŋ kai.

⁴⁵Askarai zi gɗam e wiyisi siɗi paakai n’abakai zi ɓaka gaiɗi Farisekai, nagai e miɗiɗi: Ki kiŋsi kai ɗa, buri maɗa?

⁴⁶Askarai zi gɗam e wiyi seŋ e miɗi: Mi siɗi ka ɗif a muɗa seŋ maini ɗif hanɗa nɵa duk kai.

⁴⁷Farisekai e wiyi seŋ e miɗi: Tiki lai, ki hini siki aŋ tirɗi edi pini seŋni lai ɗi?

⁴⁸Arbaɗi n’abakai gaiɗi Farisekai ɗa, ktai n’a yima pini a na ɗi?

⁴⁹Amma ɗai n’e siɗi gadai zi ɗû kai hanɗa, e ɗi ɗai na tusa aŋ midiɗi.

⁵⁰Nikodemus, ktai arbaɗi n’a halasi sini Yesu avut par, a ktai arbaɗi Farisekai lai, a miɗiɗi:

⁵¹Gadai zi ɗû na wimu a sa futi aŋ ɗûkliti sariya midini ɗif won hlai n’e ɵini seŋ na mini par kaalai, e siɗi sdani n’a zaŋ ɗa kaalai ɗi?

⁵²E wiyini seŋ e miɗi: Tuku ku na Galeliya par lai ɗi? Fufuka pɗem, aga ku navaŋ ɓa; ɗif na mini Alaw n’a halasi war Galeliya par aŋ kai.

⁵³Ɗif paŋ a waya ahani ahanI.