Read Mousgoum Yohana 8 Bible Online

Yohana 8 - Mousgoum bible

Yohana 8

²Amma gorof par cup a wayasi warni tempel, ɗai paŋ e hilisi sini, a sumna azumai dam a hitriɗi.

³Nɵa ɗai zi ɗû wazagai gaiɗi Farisekai e kitisi muni na e nivitisi war maɵara, e ɗiyiti arbaɗi zaw,

⁴E miɗini: Api zi hitri, muni hanɗa e nivitisi war maɵara.

⁵Musus, warni gadai zi ɗû na wiini ɗa a siyi futi buri mi fiɗiɗi falakai na maini hanɗa nɵa ɗa edi, lai ɗa, tuku ku muɗa maɵa ɗa?

⁶E miɗi hanɗa kapai e yimiŋ warni seŋ, e pini seŋ midini lai. Amma Yesu a goɓo azumai, a ɗo wala azumai midini afti gaiɗi ahini tini.

⁷Won hlai n’e ɗa e zilbini mini ɗai ɗai ɗa, a sumna amai dam a miɗiɗi: Arbaki ɗa, ni na tuwurni aŋ kai a tika pini a tika pini a biliti avut gaini kriyit.

⁸A waya a goɓaka azumai goɓ aŋ ɗowala azumai midini afti pra.

⁹Won hlai n’e ɵini hanɗa, e yimi siɗi edi ktai ya, ktai ya, siɗi n’abakai par haa siɗi n’agogoi ta. A hina kiini ktai gaiɗi muni n’e ɗiyiti arbaɗi ɗa.

¹⁰Nɵa Yesu a sumna amai dam a miɗiɗi: Muni e ɗi wata ɗa? Ktai n’a kûti sariya muduku aŋ kai ɗi?

¹¹Te waya seŋ te muɗa: Epiɗ-ɗai, ɗif kai. Yesu a miɗiɗi: Ta lai mu kûti sariya muduku kai, hala, amma dawai sek ɗa ku za tuwur kir kai.

¹²Yesu a miɗiɗi pra: Ta mu gaglai na wiiɗi yai, ni n’a hala pa aga a paya war gegeŋ duk kai, amma aga a nava gaglai na wiini suŋfa.

¹³Won hlai hanɗa, Farisekai e miɗini: Ku za zaida midini suku dama, zaidaku ɗa a jre kai.

¹⁴Yesu a waya seŋ a miɗiɗi: Koo ɓa mu za zaida midini sa dama muta tekeɗeɗi ɗa, zaidaŋa a jre buri mu sɗa hlai na mu halasi woni par gaini hlai na mu hala woni lai. Amma tiki ɗa ki siɗi hlai na mu halasi woni par kaalai, na mu hala woni kaalai.

¹⁵Tiki ki ɗûkliti sariya pini neŋ-si, Ta mu ɗûkliti sariya midini ɗif kai.

¹⁶Na ɓa mu ɗûkûlitifu sariya ɗa, sariyaɗa a jre buri ɓa mu na kiiya kai, mu na gaini Api n’a ɵinaŋasi ɗa.

¹⁷War gadai zi ɗû na wiiki ɗa aŋ gaini ɗû ɓa zaida na wiiɗi ɗai sulu ɗa a jre.

¹⁸Ta mu za zaida midini sa dama, Api n’a ɵinaŋasi ɗa a za zaida mada lai.

¹⁹Nɵa e miɗini: Apuku ɗa aŋ wata ɗa? Yesu a miɗiɗi: Tiki ki sɗiɗa ta kaalai, ki siɗi Apa kaalai, ki siɗiɗa ni a siɗi ɗa, aŋ ta ki siɗi Apa lai.

²⁰A muɗa seŋ hanɗa ɵimani kes zi godai ɗa won hlai n’a na hitra amlai warni tempel. Ɗif ktai maa a yimaŋ kai buri lerni a cosi kai hai.

²¹A miɗiɗi pra: Ta mu na hala, tiki aga ki piyiɗa, amma aga ki mri warni tuwurki, hlai na mu hala woni ɗa ki kiɗi ki hiliɗi woni kai.

²²Yudeyakai e miɗi: A dara a fuɗa sini edi ɗi, na kapai a muɗa ɓa, hlai na mu hala woni ɗa ki kiɗi ki hili woni kai ɗa?

²³A miɗiɗi: Tiki ɗa, ki ɗi ɗai n’azumai, Ta mu n’amai par, tiki ki ɗi na warɗi yai hanɗa, Ta ɗa mu na warɗi yai hanɗa kai.

²⁴Mu miɗiki ɓa aga ki mri warni tuwurki ɗa burini hanɗa, buri ɓa, na ɓa ki yimi ɓa ta mu ni kai ɗa aga ki mri warni tuwurki.

²⁵E miɗini: Tuku ɗa, ku siya ɗa? Yesu a waya seŋ a miɗiɗi: A wala na mu miɗiŋki haa war pi zi tiki par.

²⁶Wazagai na mu muɗaŋ miɗiki viya, na mu zitiki sariya burini viya lai, amma Ni n’a ɵinaŋasi ɗa a jre, na mu ɵinaŋsi mini par ɗa mu muɗaŋ wiiɗi ɗai na warɗi yai ɗa lai.

²⁷E siɗi ɓa e miɗiɗi na ɗa midini nɵa kai.

²⁸Nɵa Yesu a miɗiɗi: Won hlai na ki tûki Ahini-ɗif li amai ɗa, aga ki siɗi ɓa ta mu na, pra aga ki siɗi ɓa mu za wala gaini mada dama kai, amma mu muɗa maini n’Api a hitraɗasi ɗa nɵa.

²⁹Ni n’a ɵinaŋasi ɗa a na gaya, a hinaŋa kiiya kai, buri ɓa ta mu za kureɗ ɗa a wala n’a daraŋ.

³⁰Won hlai n’a na muɗa maini nɵa, viya e yimi pini.

³¹Nɵa Yesu a miɗiɗi wiiɗi Yudeyakai n’e yimi warni ɓa: Na ɓa ki simni li warni seŋŋa ɗa, tiki ki ɗi ɗaiŋa zi hitri jre jre.

³²Tiki aga ki siɗi jre, jre aga a piliki edi lai.

³³E wiyi seŋ e miɗini: Tiyi mi ɗi pinzibani Abraham, mi zi ka bege pini ɗif duk kai, kapai tuku ku muɗa ɓa: Aga mi nivi pili n’edi ɗa maɵa maɵa ɗa?

³⁴Yesu a waya seŋ a miɗiɗi: Asiya asiya paŋ n’a za tuwur, ni a begeni tuwur.

³⁵Bege ɗa a hina aha war dalam ɵa haa kureɗ kai, amma ahi a sumna ɵa haa kureɗ.

³⁶Nɵa na ɓa Ahi a piliki edi li ɗa, tiki ki pili edi li jre jre.

³⁷Mu sɗa ɓa ki ɗi pinzibani Abraham, amma ki piyi aŋ fiɗiŋa edi, buri seŋŋa a nava hlai zi simni warki kai.

³⁸Ta mu miɗiki na ɗa a na mu talaŋsi sini Apa par ɗa, nɵa tiki lai zi wala na ki ɵiniŋsi mini Api par ɗa.

³⁹E wiyi seŋ e miɗini: Apiyi ɗa a Abraham. Yesu a miɗiɗi: Na ɓa, ki ɗifu alini Abraham ɗa, aga ki zi sda na wiini Abraham ɗa.

⁴⁰Amma tiyana ki piyi aŋ fiɗiŋa edi, ta ɗif na mu miɗiki jre na mu ɵinaŋsi mini Alaw par ɗa, Abraham a za hanɗa kai.

⁴¹Tiki ki zi ɗa a sda na wiini epiki ɗa. E miɗini: Tiyi mi wi war maɵara kai, epiyi ɗa a ktai, a Alaw.

⁴²Yesu a miɗiɗi: Alaw a nafu epiki ɗa, tiki aga ki diriŋa buri ta mu niyasi ɗa edi sini Alaw par, mu halasi na sini par lai. Mu halasi gaini mada dama kai, amma a ɵinaŋasi ɗa a ni.

⁴³Tiki ki ɵini seŋ n’a muɗaŋ ɗa kai buri maɗa? Buri ki kiɗi aŋ ɵini seŋ hanɗa kai.

⁴⁴Tiki epiki ɗa a Mat, ki diri ki zi na ɗa a dirini epiki ɗa, ni ɗa haa war pi zi tiki par a ɗif zi ɵiɓi belek, a ɗiya war jre kai buri jre warni kai. Won hlai n’a muɗa eles a muɗa ɗa a wala na war hiini na wiini dama. Buri ni a ɗif z'eles, epini eles lai.

⁴⁵Ta ɗa, buri ɓa mu miɗiki jre ɗa, ki yimi pa kai.

⁴⁶Arbaki ɗa, ktai n’a kiɗa aŋ siŋkaŋa midini tuwurŋa ɗa asiya ɗa? Na ɓa mu muɗa a jre ɗa, tiki ki yimi kai buri maɗa?

⁴⁷Ni n’a na sini Alaw par ɗa a ɵina seŋ na wiini Alaw ɗa, na ɓa tiki ki ɵiniŋ kai ɗa, buri ɓa ki ɗi na wiini Alaw kai.

⁴⁸Yudeyakai e wiyi seŋ e miɗini: Kadai tiɓ mi miɗi ɗa ɓa: Tuku ku ɗif na Samariya, ksalai aŋ muduku lai.

⁴⁹Yesu a miɗiɗi: Ta ksalai mada kai, ta mu sa ɗa a kol wiini Apa, tiki ki ɗa miisiɗa.

⁵⁰Ta ɗa mu paya ɗa a kol na wiya kai, ɗif n’a paya hanɗa a na, n’a ziti sariya lai ɗa.

⁵¹Jre jre mu miɗiki: Ni n’a yima seŋŋa li ɗa, aga a mra kai zaŋ.

⁵²Nɵa Yudeyakai e miɗini: Tiyana, tiyi mi siɗi ɓa ksalai aŋ muduku. Abraham ɗa a mra su, ɗai na mini Alaw nɵa lai, tuku ku muɗa ɓa, ɗif n’a yima seŋŋa li ɗa aga a tetema mri kai zaŋ.

⁵³Tuku ɗa, abai ku suwa Abraham n’epiyi n’a mra ɗi? Ɗai na mini Alaw ɗe e mri lai, tuku ku ɗa suku na ɗa aŋ siya ɗa?

⁵⁴Na ɓa mu kola sa muta dama ɗa, kol na wiya ɗa a wala na kadai. A kolaɗa a Apa, Ni na tiki ki piyiŋ ɓa a Alaw na wiyi.

⁵⁵Tiki ki sɗiŋ kai, ta mu sɗaŋ, na ɓa mu sɗaŋ a siɗi kai ɗa, mu bunda fu aŋ ɗif z'eles maiki tiki nɵa. Amma mu sɗaŋ, mu yima seŋni lai.

⁵⁶Abraham n’Epiki ɗa a va gaini firiyi won hlai n’a hiina ɓa aga a tala mefeɗɗa ɗa, a talaŋ, a firiya lai.

⁵⁷Yudeyakai e miɗini: Buzaku maa a za doogo doogo ɵim kai hai, ku tala Abraham ɗa ya, maɵa maɵa ɗa?

⁵⁸Yesu a miɗiɗi: Jre jre mu miɗiki, wuzani hlai na Abraham a wa sek ɗa, ta mu na.

⁵⁹Asakal hanɗa, e mili kriyit e bliŋ gaini, amma Yesu a ŋoya sini, a niyasi edi warni tempel ɗa par.