Read Mousgoum Sdaɗi Apostelai 1 Bible Online

Sdaɗi Apostelai 1 - Mousgoum bible

Sdaɗi Apostelai 1

¹Tuku Teyofilis tawala zi diri gara, warni maktuɓŋa n’avut ɗa, mu muɗa midini wala paŋ na Yesu a tika pini aŋ zaŋ, aŋ hitraŋ lai ɗa.

²Haa sini mefeŋ na a yima amai, asakal na a sa miɗi pini spakni Seze-sɗik, wiiɗi Apostelai na a viriɗi.

³Arɗi nagai lai a siŋka sini karni azi viya, asakal na a sɗa gir viya, war wazagai viya na a siŋka edi gaglai ɓa hanɗa A ni. A siŋka sini arɗi haa mefeŋ doogo doogo puɗu, a muɗa midiɗi pai na wiini Alaw maini nɵa:

⁴Won hlai n’a na gaiɗi, a gidiɗi buri e hili edi warɗi Yeruzalem par kai haw, e biyi wala na Api a za ha wala mini midini ɓa aga a saŋ ɗa, wala na ta mu miɗiki midini ɗa.

⁵Yohana ɗa a za baptisme gaini yem, amma tiki ɗa, mefeŋ aŋ kai agwi kadai aga ki nivi baptisme ɗa gaini Seze-sɗik.

⁶Nagai n’e ɗifu ta ɗa, e zilbiŋ e miɗi: Epiɗ-ɗai, hanɗa a sarti n’aga ku ziziniti paiɗi Izrayel warni ɗi?

⁷A waya seŋ a miɗiɗi: Mefeŋ gaini sarti na Apa a ɗiyaŋ war spak na wiini ɗa hanɗa a seŋ na wiiki kai.

⁸Amma tiki aga ki nivi spak wan hlai na Seze-sɗik a halasi li midiki ɗa, tiki aga ki zi aŋ zaidakaiŋa aha warɗi Yeruzalem, midini afti na Yudeya gaini na Samariya paŋ, haa edi mini koŋɗi yai na puɗu paŋ.

⁹Asakal na a muɗa hanɗa ya, wan hlai n’e ɗa aŋ tili ɗa, Yesu a yima amai, ɗugu a ŋoyaŋ wuzani arɗi lai.

¹⁰Won hlai na arɗi a hiɗika amai sek hlai na Yesu a na hala ɗa, ɗai sulu gaini sapa siɗi muɗugwi e siŋki siɗi arɗi.

¹¹E miɗi: Tiki ɗai na Galeliya, siki ca aŋ tili arki amai sek ɗa buri maɗa? Yesu na a yimaɗi arbaki par a na hala amai sek na ɗa, aga a wayasi kal kal maini na ki tiliŋ a hala amai sek ɗa ɵa.

¹²Nɵa edi par midiɗi huwuŋ Olive na te na gobi gaiɗi Yeruzalem na hili na haa woni ta ɗa, a mogoni hili n’e hiliŋ war Sabbat ta, e wiyisi aha war Yeruzalem.

¹³Won hlai n’e cûsi aha ɗa, e niyi amlai warɗi dilimi zi etaz n’e simni ka warɗi kureɗ ɗa, nagai n’e ɗa taaha ɗa e ɗi miɗi: Peter, Yohana, Yakob gaini Andre, Filip gaini Tumas, Bartelemi gaini Matewus, Yakob n’ahini Alfewus, Simun na Zelotus, gaini Yudas n’ahini Yakob ɗa lai.

¹⁴Nagai paŋ miɗi ktai, e bi hlaiɗi zi siiwa edi kai, gaiɗi falakai zamai zamai lai maiɗi mariya n’emini Yesu ɵa, tawalakaini lai.

¹⁵War mefeŋ ni ɗa, Peter a faka amai arbaɗi tawalakai, pɵaɗi ɗai n’e diŋgi ɗa a za gobi miya gaini caɓa, a muɗa:

¹⁶Tawalakaya, ɗû na a muɗa edi warni spakni Seze-sɗik mini David par burini Yudas na a ɵasi wuzaɗi nagai n’e yimi Yesu ɗa, gaini dewele ɗû hanɗa a va amai.

¹⁷A naka a pɵa ɗa arbamu, a za sda zi ɵeŋ n’aŋ tumu na ɗa lai.

¹⁸Ɗif hanɗa gaini farai na jre kai na a navaŋ ɗa, a wura vuwai ktai kaai, a kɵa warni vuwai ni ɗa, warni a naɓa edi haa aru na warni paŋ a niyasi edi.

¹⁹Wala hanɗa ɗai na Yeruzalem e sɗiŋ paŋ, haa e sini yiki wiini vuwai hanɗa war seŋɗi ɓa: Hakeldama, a dara a muɗa: Vuwai zi fel.

²⁰Paŋ ktai aŋ gaini ɗû warni maktuɓ zi yama ɓa: A zuva ɓa dalamni a hina edi aŋ greŋ, ɗif a sumna warni kir kai, pra a zuva ɓa ɗif zamai a tika sdani lai.

²¹Nɵa ɗa a pɗem ɓa arbaɗi nagai n’e ɗika gaimu kureɗ kureɗ, hlai paŋ n’EPIƊ-ƊAI Yesu a naka wuzamu su, a niya anene gaimu, a wayasi aha ɗa,

²²a tikasi pini sini baptisme na Yohana a siŋni par haa sini mefeŋ na a yima amai arbamu par ta ɗa, ktai arbaɗi ɗai hanɗa a za aŋ zaida na wiini ɵiyi n’amai na wiini gaimu lai.

²³E nivi ɗai sulu: Yosef n’e yikiŋ ɓa: Barsabas, na zinani ɓa: Yustus, gaini Matiyas.

²⁴Asakal par e siiwi maini nɵa: Epiɗ-ɗai, tuku na ku siɗiti agulɗi ɗai paŋ, ku siŋkiyi ni na ku varaŋ arbaɗi na sulu hanɗa,

²⁵kapai a tika balamni war sda zi ɵeŋ hanɗa, sda zi Apostel na Yudas a hinaŋ edi, aŋ hala warni hlai na a zuva sini ɗa.

²⁶Nɵa e zi wala zi vili, e tiki arbani par, wala zi vili a yima Matiyas, a tapa gaiɗi na doogo pi sulu.