Read Mousgoum Sdaɗi Apostelai 10 Bible Online

Sdaɗi Apostelai 10 - Mousgoum bible

Sdaɗi Apostelai 10

¹Ɗif ktai na yikini Korneliyus, a nafu war Sezare, abaiɗi askarai na ɗai pini miya ɗaw, vokni ɗa e yikiŋ ɓa: Italik.

²A ɗif na jre na a huna Alaw, na a zna piɗi na hurafai n’arbaɗi Yudeyakai, a siiwa Alaw kureɗ kureɗ gaiɗi ɗai na ahani paŋ.

³Yuvai ktai, sini sa hu na kuskoi, wala a siŋka arni. War hanɗa, a tala ɗif zi ɵeŋ na war fuŋni Alaw par a niyasi ahani a yikaŋ: Korneliyus.

⁴Korneliyus a mula arni sini, hunai a yimaŋ a miɗini: A za ɗa a maɗa Epiɗ-ɗai? Ɗif zi ɵeŋ a miɗini: Siwaku gaini sda na ku zaŋ siɗi ɗai na hurafai paŋ a co haa amai wuzani Alaw ta, midini a kɵa gaini hanɗa.

⁵Slina ɗai tiyana a Yope, e yikisi ɗif ktai n’e yikiŋ ɓa Simun, na znani Peter.

⁶A sumna na ɗa ahani ɗif ktai n’e yikiŋ ɓa Simun, a agoɗom wulani yem ra n’abai.

⁷Won hlai na ɗif zi ɵeŋ na war fuŋ, ni Alaw par a hala tar ɗa, Korneliyus a yika ɗaini zi sda sulu, gaini askar ktai na a huna Alaw arbaɗi nagai n’e ɗa pini par lai.

⁸Asakal na a miɗiɗi seŋ hanɗa paŋ li, a ɵiniɗi a Yope.

⁹Dawaini ɗa, wan hlai n’e ɗisi warɗi futi hai, n’e ŋisi gobi aha war fuŋ n’abai ɗa, Peter a niya amai midini daba zi mili girvudi n’arba aŋ siiwi.

¹⁰Wiyamai te yimaŋ, a firiya a suma wala. Won hlai n’e ɗa dinisi simi ɗa, a tala sini war seze,

¹¹a tala hlai n’amai ɗa a mala edi, wala ktai maini sapa n’abai nɵa a halasi amai par, koŋni na puɗu paŋ gaini yimi kaai kaai, a niyasi azumai haa midini afti ta.

¹²Amlai warni ɗa, wazagai n’e zini puɗu puɗu, gaini wazagai zi hidili, gaini wazagai zi ɗufli n’arbani hlai n’amai lai.

¹³Wûle a muɗa sini Peter: Faka amai, ku fuɗa, ku suma.

¹⁴Peter a waya seŋ a muɗa: Epiɗ-ɗai, mu sumaka wala na meefeŋ gaini na hihir duk kai.

¹⁵Wûle a muɗa sini azi n’ag'aŋ sulu pra, maini nɵa: Wala na Alaw a yikaŋ li ɓa, a hilu ɗa, tuku ku yimaŋ aŋ wala na hihir kai.

¹⁶Wala hanɗa a za ɵa haa azi hu, asakal par ɗa, wala na a niyasi azumai ɗa a waya amai war fuŋni Alaw wai.

¹⁷Tiyana Peter a bunda hiyak burini wala na a siŋka arni ɗa, a ma ɗa ezini edi kai. Won hlai hanɗa, ɗai na Koneliyus a ɵiniɗisi ɗa e zilbisi midini dalamni Simun haa e cûsi mini magala lai.

¹⁸E ɗûûli, e zilbi lai ɓa, Simun na znani ɓa Peter ɗa a na woni na ɗi?

¹⁹Won hlai na Peter a na hiina midini wala na a siŋka arni ɗa, Seze a miɗini: Ɗai hu e ɗa piyuku.

²⁰Ku niya azumai, ku hala gaiɗi, ku giriŋa kai buri mu ɵiniɗiɗi ɗa muta.

²¹Nɵa Peter a niyasi azumai, a miɗiɗi wiiɗi ɗai ɗa: Ta mu ɗif na ki piyiŋ na ɗa, ki hilisi sa ɗa buri maɗa?

²²E wiyi seŋ e miɗini: Korneliyus n’abaiɗi askarai na ɗai pini miya ɗaw, ɗif na jre na a huna Alaw, na pini zibaɗi Yudeyakai paŋ e miɗi zaida na pɗem midini, Alaw a miɗini war mini ɗif zi ɵeŋ na sɗik ɓa: Sai a kukuɗi ahani kapai a ɵina n’aŋ muku ɗa.

²³Nɵa a kiɗi aha, a siɗi hlai zi feŋ. Dawaini ɗa, a faka a hala gaiɗi, ɗai zamai na Yope par e kiini pini lai.

²⁴Dawaini ɗa, e cû a Sezare, Korneliyus a nafu aŋ biyiɗi, a yikiɗisi zagalakaini gaiɗi marmakaini n’abakai aha sini.

²⁵Won hlai na Peter a cosi ɗa, Korneliyus a hala mini, a goɓo azumai wuzani, a hurga azumai lai.

²⁶Amma Peter a yimaŋ amai a muɗa: Ta lai mu ɗif maiku tuku ɵa.

²⁷A tika pini aŋ haɗa kalaŋ gaini, a niya aha lai. wan hlai na a co aha ɗa, a nava ɗai e dingi viya.

²⁸A miɗiɗi: Tiki ki siɗi ɓa futi te sa sini ɗif na Yudeya buri a za marmai gaini ɗif n’edi par, zaw a niya ahani kai. Amma Alaw a yimaŋ mada na ɗa ɓa, aga mu yika ɗif ɓa a na hihir, zaw a na meefeŋ nɵa kai.

²⁹Won hlai na ki ɵiniɗi pa ɗa, mu blasi kai na ɗa burini hanɗa, tiyana ɗa, mu zilbiki na ɗa ɓa ki yikiŋasi ɗa buri maɗa?

³⁰Korneliyus a muɗa: Mefeŋ a za tiyana puɗu mu nafu aŋ siiwa ahaya, sini sa na hu na kuskoi, tizaw ɗif ktai gaini sapa na a ŋala gara sini a ɗiya wuza zaw,

³¹A muɗa: Korneliyus, siiwaku a ɵina ba, Alaw midini a kɵa gaini sdaku na ku zaŋ siɗi na hurafai ɗa lai.

³²Nɵa, ɵina ɗif a Yope aŋ yikisi Simun na znani Peter, a sumna aha warni dalamni Simun ɗif zi ɵûɗi amur agoɗom wulani yem ra n’abai.

³³Mu ɵinaɗi ɗif puku witaw tar, tuku ku za pɗem ku halasi lai, nɵa tiyana ɗa, tiyi paŋ mi ɗi woni na wuzani Alaw, aŋ zibiri seŋ na Epiɗ-ɗai a muɗukusi buri ku muɗaŋ ɗa.

³⁴Nɵa Peter a tika seŋ a muɗa: A jre, a yima li mada ɓa, Alaw ɗa a ɓurwa arɗi ɗai kai.

³⁵Amma war pini ziba ziba, ni na a sini hormo, na a za jre lai ɗa Alaw a daraŋ.

³⁶A ɵinasi seŋni wiiɗi aliɗi Izrayel, a miɗiɗi midini labar na pɗem na wiini ɵeɗ na gaini Yesu, ni ɗa a Epiɗ-ɗai na wiiɗi ɗai paŋ.

³⁷Tiki ɗa ki siɗi wala na a za war Yudeya paŋ ya, na a tikasi pini war Galeliya par asakalni baptisme na Yohana a muɗa edi midini ɗa,

³⁸maɵa ɗa Alaw a ma Seze-sɗik gaini spak midini Yesu na Nazaret par, hlai na a vuga li woni paŋ ɗa a za pɗem siɗi ɗai, a zûûliɗi nagai n’e ɗa siɗi gir tini Mat lai buri Alaw a nafu gaini.

³⁹Tiyi mi zaidakai burini wazagai paŋ na za midini aftiɗi Yudeyakai, war Yeruzalem lai. Ni n’e fiɗiŋ edi aŋ belek, n’e higiŋ amai sini luwuŋ ɗa,

⁴⁰Alaw a ɵiyaŋ amai war mri par war mefeŋ n’ag'aŋ hu, a hinaŋ aŋ siŋka sini arɗi ɗai lai.

⁴¹Arɗi ɗai na Izrayel paŋ kai, amma arɗi zaidakai na Alaw a viriɗisi haa ɗipar, siyi tiyi na mi simi gaini, mi ci gaini lai asakal na a ɵiyasi amai arbaɗi zi mri par ya ɗa.

⁴²A gidiyi miyi buri mi miɗiɗi wiiɗi ɗai, aŋ siŋkiɗi edi gaglai lai ɓa, Alaw a tika aŋ ɗûkûliti sariya wiiɗi ɗai na karɗi, zi mri lai ɗa A ni.

⁴³Ɗai na mini Alaw paŋ e zi zaida midini maini nɵa ɓa: A siya ɗi paŋ na a yima li warni Ni ɗa, aga a nava ni burini tuwurni war yikini.

⁴⁴Peter a nafu aŋ muɗa seŋ hanɗa hai, woni hlai ni Seze a kɵasi midiɗi nagai n’e ɗifu aŋ zibiri seŋ ɗa.

⁴⁵Ɗai zi yimi n’e ɵi gûrgûle, n’e hilisi gaini Peter e bindi hiyak buri e tili ɓa like na wiini Seze-sɗik a bara haa sini pini zibaɗi ɗai n’edi par lai paŋ.

⁴⁶Buri ɓa e tiliɗi ɗa, e ɗa miɗi war meme na kiini kiini, e kûli Alaw lai, nɵa Peter a tika seŋ a muɗa:

⁴⁷Nagai n’e nivi Seze-sɗik maimu tumu nɵa ya na ɗa, mu kuɗumu aŋ ɗuluɗumu aŋ nivi baptisme na gaini yem ɗi?

⁴⁸A sa futi buri e siɗi baptisme war yikini Yesu Kristu, nagai e zilbiŋ, a za mefeŋ gaiɗi agwi.