Read Mousgoum Sdaɗi Apostelai 11 Bible Online

Sdaɗi Apostelai 11 - Mousgoum bible

Sdaɗi Apostelai 11

¹Apostelai gaiɗi tawalakai na war Yudeya ɗa lai, e ɵini ɓa ɗai na kadai lai e yimi warni seŋni Alaw.

²Won hlai na Peter a cosi a Yeruzalem ɗa, Yudeyakai e tiki piɗi e yimi warɗi edi sini,

³e miɗi: Ku niya ahaɗi ɗai n’e ɵi gûrgûle kai, ku suma.

⁴Nɵa Peter a tika pini aŋ ziɗi gaglai midini wala na a za ɗa, sini pini zi tiki par haa sini vidini.

⁵Ta mu nasi fu war fuŋ n’abai na Yope, mu nafu aŋ siiwa, wan hlai na war Seze wala ktai a siŋka ara, wala a niyasi amai par a sɗa maini sapa n’abai nɵa, koŋni na puɗu paŋ gaini yimi edi kaai kaai a niyasi azumai amai war fuŋni Alaw par haa sa ta.

⁶Hlai na mu mula ara sini ca mu talaŋ gaini hangal ɗa, mu tala wazagai n’ezini puɗu puɗu na midini afti gaini wazagai n’edi buza, gaini wazagai zi hidili, gaini wazagai zi ɗufli paŋ lai.

⁷Mu ɵina wûle ktai a muɗa sa maini nɵa: Peter, faka amai, ku fuɗa, ku luma.

⁸Mu waya seŋ mu muɗa: Epiɗ-ɗai, wala na meefeŋ gaini na hihir a niyaka war ma duk kai zaŋ.

⁹Azi n’ag'aŋ sulu, wûle a muɗasi sa amai war fuŋni Alaw par maini nɵa: Wala na Alaw a yikaŋ ɓa a hilu ɗa, tuku ku yimaŋ aŋ wala na hihir kai.

¹⁰Wala hanɗa a za sa ɵa azi hu, asakal par wala na a niyasi azumai ɗa a niya amai war fuŋni Alaw.

¹¹Won ni Tizaw ɗai hu n’e ɵiniɗisi sa a Sezare par e cûsi mini dalam na mi ɗi aha warni ɗa.

¹²Seze a muɗa buri mu hala gaiɗi, mu giriŋa kai zaŋ. Maara na ɵaara na e ɗi na ɗa e hili gaya lai, mi hili mi niyi ahani ɗif ni ɗa.

¹³A miɗiyi maɵa ɗa ɗif zi ɵeŋ na war fuŋni Alaw a halasi ahani a miɗini ɓa: Slina ɗif ktai a Yope, a yikasi ɗif ktai na znani Peter,

¹⁴n’aga a muɗuku seŋ n’aga ku nava kûri pini, tuku gaini dalamku paŋ.

¹⁵Won hlai na mu tika pa aŋ muɗa gaiɗi ɗa, Seze-sɗik a kɵasi midiɗi maini na a kɵasi mudumu tumu war pi zi tiki ɗa nɵa.

¹⁶Nɵa, mada a kɵa gaini seŋ na wiini Epiɗ-ɗai na a naka a muɗa ɓa: Yohana ɗa a za baptisme gaini yem, amma tiki ɗa aga ki nivi baptisme gaini Seze-sɗik.

¹⁷Na ɓa Alaw a siɗi like na a suŋmu wimu tumu lai buri ɓa e yimi warni Yesu Kristu ɗa, ta mu siya ɗa na kapai mu bla edi sini Alaw ɗa.

¹⁸Asakal na e ɵini hanɗa ya, hangalɗi a tika azumai, e kûli Alaw e miɗi: Kapai Alaw a sa bindi na gamai wiiɗi pini ziba na zamai ɗa lai, kapai e gi sini sunfa lai.

¹⁹Nɵa nagai n’e ɵiri edi burini gir na a za pini Stefanus ɗa, e vigizi war Fenesiya, war Kiprus, war Antiyokiya lai. E ɓiki seŋ sini ɗif zamai kai sai siɗi Yudeyakai.

²⁰Amma zamai arbaɗi ɗai na Kiprus gaiɗi ɗai na Kirene par n’e hilisi war Antiyokiya ɗa, e ɓiki seŋ siɗi pini ziba na zamai ɗa lai, e miɗiɗi midini labar na pɗem na midini Epiɗ-ɗai Yesu.

²¹Spakni Epiɗ-ɗai a nafu midiɗi, ɗai viya e bindi aŋ ɗai zi yimi, e bindisi arɗi sini Epiɗ-ɗai sek.

²²Labar hanɗa a co haa sini tipi na warɗi Yeruzalem ɗa, e ɵini Barnabas, e miɗini buri a hala war Antiyokiya.

²³Won hlai na a co woni ɗa, a tala yum na wiini Alaw lai ɗa, a firiya gara, a siɗi arai-zi-pi buri e yimi Epiɗ-ɗai tiɗi gaini agulɗi ktai.

²⁴Buri ɓa ni a ɗif na pɗem, na a va gaini Seze gaini yimi lai. Firiɗi ɗai viya e tipi pini Epiɗ-ɗai.

²⁵A hala a payasi Paulus war Tarsis par, wan hlai na a navaŋsi li, a kaŋsi war Antiyokiya. E simni woni haa buza dam, e zi sda aŋ bonu gaini tipi na warni ɗa, e hitri ɗai viya lai. Ɗai zi hitri e nivi yiki na ɓa: Ɗaini Kristu avut ɗa war Antiyokiya par.

²⁷War mefeŋ ni ɗa, ɗai na mini Alaw e hilisi a Yeruzalem par war Antiyokiya.

²⁸Ktai arbaɗi par n’e yikiŋ ɓa: Agabus, a faka amai pini hûgûni Seze-sɗik a muɗa ɓa wiyamai n’amai aga te za midini afti paŋ. Wiyamai hanɗa te za war mefeŋ na wiini Sezar Klodiyus.

²⁹Ɗai zi hitri ɗa e tiki miɗi ɓa, arbaɗi ɗa, a siya a siya pini kiɗini kiɗini ɗa, a ɵina zinai siɗi tawalakai n’e ɗa war Yudeya.

³⁰E zi hanɗa lai, e ɵini hanɗa wiiɗi n’abakaiɗi tipi tini Barnabas gaini Sawlus.