Read Mousgoum Sdaɗi Apostelai 12 Bible Online

Sdaɗi Apostelai 12 - Mousgoum bible

Sdaɗi Apostelai 12

¹War mefeŋ ni ɗa, Pai Herod a yimiɗi ɗai zamai arbaɗi tipi, a ziɗi gir arɗi lai,

²maa a fuɗa Yakob na tawalni Yohana ɗa edi gaini kaɵkar.

³Won hlai na a tala ɓa sda hanɗa a siɗi firiyi wiiɗi Yudeyakai ɗa, a paya aŋ yima Peter lai, hanɗa a za war mefeŋ na wiini peŋ na Is arni kai ɗa.

⁴A yimaŋ a kaŋ warɗi daŋgai, a mula askarai zi gɗam mini vok puɗu, vok paŋ ɗa ɗai warni puɗu puɗu, e giɗimi ler hu hu lai, kapai asakalɗi ŋûɓuri na wiini vigi n’amai ɗaw par ɗa, a zini sariya wuzaɗi ɗai.

⁵Peter a nafu warɗi daŋgai, amma tipi e siiwi Alaw burini gaini kurfuk.

⁶Herod a firiya a kaŋ wuzaɗi sariya, duvuk ni ɗa, peter a fana arbaɗi askarai sulu, jaɓ sini sulu lai. Anene mini hlai par ɗa, ɗai zi gɗam mini hlai ca aŋ giɗimiti daŋgai ɗa lai.

⁷Amma agwiya ɗa, ɗif zi ɵeŋ na war fuŋni Alaw a luɓasi, gaglai a ŋala amlai warni hlai n’aŋ warni ɗa, ɗif zi ɵeŋ a tika tini paɵani, a gigizaŋ a ɵiyaŋ amai a muɗa: Faka amai witaw. Jaɓ ɗa a yakasi amai par tini.

⁸Ɗif zi ɵeŋ na war fuŋni Alaw a miɗini: Rga santirku wuzaku, harabakku azuku lai. A za hanɗa lai, wa sapaku suku, halasi pa.

⁹Peter a niyasi, a tika futi pini. Wala na ɗif zi ɵeŋ na war fuŋni Alaw azaŋ paŋ na ɗa, a hiina ɓa a jre kai, a hiina ɓa a siŋka arni na ɗa a wala.

¹⁰Won hlai n’e vigiɗisi ɗai zi gɗam n’avut ɗa vug, n’ag'aŋ sulu vug, e cûsi mini magala zi kawai n’aŋsi aha sini fuŋ n’abai ɗa sek ɗa, mini magala a mala edi wuzaɗi kiini. E niyisi anene, e hili warɗi futi ktai, war hlai ni ɗa, ɗif zi ɵeŋ a yima sini edi sini a hinaŋ kiini.

¹¹Won hlai na Peter arni a giliya li, a muɗa: Tiyana mu sɗa fakat ɓa, Epiɗ-ɗai a ɵinasi ɗifni zi ɵeŋ, a plaŋasi edi tini Herod par, mini meefeŋ na wiiɗi Yudeyakai n’e firiyi e ziŋ sa ɗa par lai.

¹²Won hlai na hiinini a wayasi sini li, a hala war dalamɗi Mariya na emini Yohana na znani ɓa Markus, ɗai viya e ɗifu woni aŋ siiwi.

¹³Won hlai na a ɵiɓa mini hlai ɗa, ahiyagwi zi sda ktai n’e yikiti ɓa Rode te halasi mini hlai aŋ zibura.

¹⁴Te sɗa wulani Peter ɗa ba, firiyi a viti haa mini hlai te malaŋ kir kai, te lawa te sa labar aha sek ɓa, Peter aŋsi anene mini hlai zaw.

¹⁵Ɗai e miɗiɗi: Ku ɗuula ɗa a ɗûûli zaw, amma te pa kaŋ ɓa a na ɗa ɵa. Nagai e miɗi ɓa a ɗifni zi ɵeŋ.

¹⁶Amma Peter a ɵiɓa mini hlai wuzani sek, e miliŋ edi ɗa, e bindi hiyak wan hlai n’e tiliŋ.

¹⁷A hûwitiɗi tini buri e miɗi kai, a miɗiɗi maɵa ɗa Epiɗ-ɗai a yimaŋsi edi warɗi daŋgai par. A muɗa: Ki miɗi seŋ hanɗa wiini Yakob gaiɗi tawalakai lai. Asakal par a niyasi anene, a hala warni hlai zamai.

¹⁸Won hlai na hlai a sɗa li edi, dûrgûzi n’abai a faka amai arbaɗi askarai, e miɗi: Peter ɗa a za maɵa ɗa?

¹⁹Herod a payaŋ, amma a navaŋ kai, a zilbiɗi ɗai zi gɗam ɗa ta ta, a sa futi buri e fiɗiɗi edi lai. Asakal par a hala a Yudeya par a sezariya buri a sumna woni.

²⁰Herod Agripa ɗa, arbani gaiɗi ɗai na Tirus, gaiɗi na Sidon lai ɗa a hala pɗem kai, amma nagai ɗa e kitisi miɗi e hilisi sini, e tiki Blastus ɗif zi giɗimiti dilimi na wiini pai ɗa, e piyi ɵeɗ buri ɓa, aftiɗi ɗa a nava simini ɗa sini afti na wiini pai ɗa par.

²¹War mefeŋ na gaini ɗiyi zaw ɗa, Herod a wa sapani zi pai ɗa sini, a sumnasi amai par midiɗi paramaini a miɗiɗisi:

²²Won hlai na ɗai e ɗa ɗûûli, e miɗi: Hanɗa a wulani ɗif murɗek, a wulani Alaw.

²³War hlai ni tizaw, ɗif zi ɵeŋ na war fuŋni Alaw a za wala ktai sini ta buri a sini kol wiini Alaw kai. Atla a sumaŋ amai karni par dam haa sunfani a wa edi.

²⁴Nɵa seŋ na wiini Epiɗ-ɗai a wa tini edi, a riya wuzani sek sek.

²⁵Barnabas na gaini Sawlus, wan hlai n’e vidisi li gaini ɵeŋɗi na war Yeruzalem ɗa, e wiyi sek ɗa, e yimi Yohana na znani ɓa Markus ɗa piɗi kaai.