Read Mousgoum Sdaɗi Apostelai 13 Bible Online

Sdaɗi Apostelai 13 - Mousgoum bible

Sdaɗi Apostelai 13

¹War tipi na war Antiyokiya ɗa, ɗai na mini Alaw gaiɗi ɗai zi hitri e ɗifu viya, Barnabas gaini Simun na yikini ɓa Nizer gaini Lukuyus na kirene par, gaini Manayen n’e wili piɗi marɗi, gaini Lawan Herod Antipas, Sawlus lai.

²Mefeŋ ktai, war hlai n’e ɗa war hlai zi siiwa wuzani Epiɗ-ɗai, e tiki sai lai, Seze-sɗik a muɗa: Barnabas gaini Sawlus ɗa ki miliɗiŋa edi ca burini sda na mu yikiɗisi midini.

³Nɵa, asakal n’e vidi gaini tikini-sai li, gaini siiwa li lai ɗa, e tiki tiɗi midiɗi, e hiniɗi e hili.

⁴Nagai ɗa, wan hlai na Seze a ɵiniɗi ya, e hili azumai war Selekiya, woni par e hili gaini hulum n’abai war Kiprus.

⁵Won hlai n’e cû war Salamine ɗa, e ɓiki seŋni Alaw amlai war Sinagogne na wiiɗi Yudeyakai. Yohana a nafu gaiɗi aŋ zna piɗi.

⁶Asakal par wan hlai n’e vigiɗi midiɗi hudi par haa a Pafos ta ɗa, e nivi gaini ɗif zi mazi ktai, a ɗif na mini Alaw na jre kai, a ɗif na Yudeya lai yikini ɓa Bar-Yesu.

⁷A za sda gaini ɗif n’abai na Rome par n’e yikiŋ ɓa Sergiyus Pawulus, ɗif na yel gara. Sergiyus Pawulus a yikasi Barnabas gaini Sawlus sini a dara a ɵina seŋni Alaw.

⁸Amma Elimas ɗif zi mazi ɗa yikini ɗa a waya edi ɵa. A bla arɗi, a firiya ɓa a hina ɗif n’abai na Rome par ɗa a yima kai.

⁹Nɵa Sawlus n’e yikiŋ ɓa Paulus ɗa na a va li gaini Seze-sɗik, a mula arni sini

¹⁰a muɗa: Tuku na ku va gaini yel gaini rhai lai, ahini Mat, gawni jre-ɗikat, futi na ɗikat na wiini Epiɗ-ɗai ɗa, suku pini aŋ viɗaŋ ɵa buri maɗa?

¹¹Tiyana ɗa, spakni Epiɗ-ɗai aga a sumna muduku, aga ku ŋulva, aga ku tiliti futi kai haa mefeŋ yaw. War hlai ni tizaw, gegeŋ a dogoŋ azumai, a hina blaŋ aŋ paya ɗif na kapai a ɵa wuzani.

¹²Won hlai na ɗif n’abai na Rome par a tala wala na a za ɗa, a bunda aŋ ɗif zi yimi, a bunda hiyak burini hitri na wiini Epiɗ-ɗai ɗai.

¹³War Parfos par, pawlus gaiɗi marni e niyi warni hulum n’abai e hili a Perge war Pamfiliya. Yohana a ɓurwasi gaiɗi, a waya a Yeruzalem.

¹⁴War Perge par e tiki morkoiɗi wuzaɗi, e cû a Antiyokiya na war Pezidiya. War mefeŋ ni Sabbat e hili amlai warni sinagogne, e simni azumai ca.

¹⁵Asakal n’e vidi gaini ŋini Ɗû, gaini ɗû na wiiɗi ɗai na mini Alaw lai ɗa, ɗai n’abakai na midini sinagogne e zilbiɗi: Tawalakai, na ɓa arai-zi-pi na wiiki a na ɗa, futi k’aŋ siki.

¹⁶Paulus a faka amai a huuɗa tini a muɗa: Tiki ɗai na Izrayel gaiki tiki na zamai, na ki hûni Alaw lai ɗa, ki ɵini pɗem:

¹⁷Alaw na wiiɗi pini ziba hanɗa, Alaw na wiiɗi Izrayel ɗa, a viriɗi tamaimu, a bunda pini ziba hanɗa viya war hlai n’e ɗisi aŋ zak war Egipte. Asakal par a miliɗisi edi gaini spak n’abai.

¹⁸A libiɗi haa buza doogo doogo puɗu edi war buza na kaɗataŋ,

¹⁹a vada pini ziba na war Kanaan ɗa edi azi muguzak, a siɗi afti ɗa aŋ bulum lai.

²⁰Nɵa haa buza miya puɗu gaini doogo-doogo-ɵim, asakal hanɗa e siɗi gaŋgalaŋai haa sini mefeŋ na wiini ɗif na mini Alaw Samuwel ta.

²¹Asakal par e piyi pai, Alaw a siɗi Sawul n’ahini Kis na war pinzibani Benyamin, a suma buza doogo-doogo-puɗu.

²²Hlai na a ɵaŋ edi warɗi pay par su ɗa, a siɗi David aŋ pai, a za zaida midini ɓa: David n’ahini Yese ɗa, a ɗif na siɗi agula, n’aga a va diriŋa paŋ amai.

²³Pini ɵinini-ha n’Alaw a zaŋ ɗa, a hinasi Yesu na ɗif zi kûri na wiiɗi Izrayel a wa war pinzibani.

²⁴Wuzani gizini ɗa, Yohana a muɗa edi midini baptisme na wiini bindi na gamai na wiiɗi Izrayel,

²⁵Won hlai na Yohana a ŋa ta aŋ vada gaini luwini ɗa, a muɗa: Ni na tiki ki hûni ɓa mu Ni na ɗa, ta mu Ni kai, amma ɗif Ni ɗa a na halasi asakala par, ta mu dai dai na mu pla harabak n’ezini edi kai.

²⁶Tawalakaya, tiki na war pinzibani Abraham, gaiki tiki zamai na ki hûni Alaw lai, seŋ zi kûri hanɗa a ɵinasi edi burimu tumu.

²⁷Ɗai na Yeruzalem gaiɗi abakaiɗi ɗa, e siɗi Yesu kai, seŋɗi ɗai na mini Alaw n’e ɗa e ŋiŋ warni Sabbat paŋ ɗa e yimiŋ aŋ jre kai, e ɗûkûliti sariya midini kapai ɗû hanɗa a va amai.

²⁸E nivi meefeŋ sini n’e fiɗiŋ edi pini kai, paŋ ktai e miɗini wiini Pilatus buri a fuɗaŋ edi.

²⁹Won hlai na seŋ na a ɗo midini paŋ a va li amai ɗa, e tikisi kopoŋni azumai amai sini luwuŋ par, e tikiŋ azumai warni waŋ.

³⁰Amma Alaw a ɵiyaŋsi amai arbaɗi zi mri par.

³¹A siŋka sini mefeŋ viya arɗi nagai n’e hilisi gaini war Galeliya par amai a Yeruzalem, n’e ɗa tiyana aŋ zaidakaini arbaɗi ɗai lai.

³²Tiyi ɗa, mi kikisi na ɗa a labar na pɗem hanɗa, ha na Alaw a ziŋɗi wiiɗi tamaimu ɗa,

³³a vaŋ amai pulmuɗik sumu tumu n’aliɗi, gaini ɵiyi na a ɵiyasi Yesu amai maini n’aŋ gaini ɗû war yama na wiini David n’ag'aŋ sulu ɗa nɵa, wan hlai na a muɗa ɓa: K'Ahiya, mu wuku girna ɗa muta.

³⁴Ni na a ɵiyaŋsi amai arbaɗi zi mri par kapai a waya warni hûfi kai ɗa, a seŋ na a muɗaŋ avut par ɓa: Aga mu siki wazagai na sɗik na wiini David, na ɗif a kiɗa a yimaŋ a ŋ jre.

³⁵Buri nɵa a muɗa warni hlai zamai ɓa: Aga ku hina na sɗik na wiiku ɗa a hofa kai.

³⁶Asakal na a za sda arbaɗi vunani maini na Alaw a kataŋ ɗa ɵa, David a mra, e piŋ gaiɗi tamaini, a hofa kai.

³⁷Amma Ni na Alaw a ɵiyaŋsi amai ɗa, sini a hofa kai.

³⁸Tawalakaya, yimiŋ midiki pɗem ɓa, ni na burini tuwur ɗa a muɗa edi siki na ɗa gaini Ni, wazagai na tiki ki nivi zi n’edi aŋ jre-ɗikat gaini gadai na wiini Musus warni kai ɗa paŋ.

³⁹Warni hanɗa paŋ, a siya ɗi paŋ na a yima li warni ɗa, a za edi aŋ jre ɗikat warni Ni paŋ.

⁴⁰Nɵa ki zi hangal kapai wala na a ɗo warni maktuɓ na wiiɗi ɗai na mini Alaw ɗa ɓa:

⁴¹Tili, tiki na ki miisi gara, ki bindi hiyak, ki vidi edi lai, buri ɓa ta aga mu za sda ktai warni mefeŋ na wiiki ɗa, sda hanɗa, na ɓa e miɗiŋki na ɗa a miɗi ɗa, aga ki yimi duk kai.

⁴²Won hlai na e niyisi anene ɗa, ɗai e siiwiɗi buri e wiyi e miɗi midini seŋ hanɗa war Sabbat na wuzaɗi ɗa.

⁴³Won hlai na ɗai e ɵiri li ɗa, Yudeyakai viya gaiɗi ɗai n’e yimi pini yimi na wiiɗi Yudeyakai n’e siiwi tini Alaw, e tiki futi pini Paulus gaini Barnabas, nagai warni kalaŋɗi na gaiɗi ɗa, e yimiŋɗi midiɗi ɓa, a pɗem buri e nigi siɗi sini yimi hanɗa.

⁴⁴Sabbat zamai ɗa, ɗai na war fuŋ n’abai ɗa paŋ e tipi buri e ɵini seŋni Epiɗ-ɗai.

⁴⁵Won hlai n’e tili firiɗi ɗai ɗa, Yudeyakai e vi gaini sile n’abai, wala na Paulus a muɗaŋ li paŋ ɗa, e miɗi ɓa a na ɵa kai, e miisiŋ lai.

⁴⁶Tiyana Paulus gaini Barnabas e tiki seŋ e miɗiɗi edi gaglai maini nɵa: A dewele ɓa seŋni Alaw a muɗa edi siki tiki avut, amma tiyana ɗa, tiki ki hûgiŋ edi, ki tili siki maiɗi ɗai n’e kiɗi burini sunfana a vada kai kai ɵa, tiyana ɗa, tiyi mi bindi aryi siɗi pini ziba na zamai ɗa sek.

⁴⁷Buri Epiɗ-ɗai a miɗiyi maini nɵa: Mu zuku aŋ gaglai, kapai ku ka kûri ɗa haa edi mini koŋɗi yai na puɗu paŋ.

⁴⁸Won hlai n’e ɵini seŋ, pini ziba na zamai ɗa e firiyi gara, e kûli seŋ Epiɗ-ɗai, nagai n’e viri edi burini sunfana a vada kai e bindi aŋ ɗai zi yimi.

⁴⁹Seŋ na wiini Epiɗ-ɗai a wa tini edi midini afti paŋ.

⁵⁰Amma Yudeyakai e ziɗi piɗi falakai n’abakai dam dam ɗa ta ta, n’e siiwi tini Epiɗ-ɗai ɗa, gaiɗi ɗai n’abakai na war fuŋ n’abai ɗa lai, e fiki aŋ zi gir wiini Paulus gaini Barnabas, e birgiɗi edi midini aftiɗi par.

⁵¹Nagai e ɵiɓi alogodo n’eziɗi edi midiɗi, e hili war Ikoniyom,

⁵²amma ɗai zi hitri ɗa e vi gaini firiyi, gaini Seze-sɗik lai.