Read Mousgoum Sdaɗi Apostelai 14 Bible Online

Sdaɗi Apostelai 14 - Mousgoum bible

Sdaɗi Apostelai 14

¹War Ikoniyom e hili warni sinagogne na wiiɗi Yudeyakai lai, e ɓiki seŋ haa Yudeyakai viya gaiɗi grekkai lai e bindi aŋ ɗai zi yimi.

²Amma Yudeyakai n’e diri e yimi kai ɗa, e ziɗi piɗi pini ziba na zamai ɗa aŋ fiki amai siɗi tawalakaiɗi.

³Amma Paulus gaini Barnabas e fini woni viya, e piɵi jre jre midini Epiɗ-ɗai na a za zaida midini seŋni zi yum gaini wazagai zi siŋki, gaini wazagai zi hila lai na nagai e ziŋ ɗa.

⁴Ɗai na war fuŋ n’abai ɗa e ɓûrwi ca, zamai piɗi Yudeyakai par, na zamai piɗi Apostelai par.

⁵Amma wan na pini ziba na kadai gaiɗi Yudeyakai lai, gaiɗi abakaiɗi lai e ɗa zizini siɗi buri gir, e fiɗiɗi edi gaini kriyit lai ɗa,

⁶nagai wan hlai n’e ɵini hanɗa, e hili e ŋûyi war fuŋ n’abakai na: Likawniya, Listra gaiɗi Derbe gaini fuŋ na ɵimani lai,

⁷e ɓiki labar na pɗem woni.

⁸War Listra ɗa, ɗif ktai a naka, a ɗif n’ezini gaini mri, a wa ɗa ɵa, a hala ka duk kai, a zumai dam ɗa,

⁹a zuɓura seŋ na Paulus a na muɗaŋ ɗa. Paulus a mula arni sini, wan hlai na a tala ɓa, a kiɗa a nava zûûli burini yimini ɗa,

¹⁰a muɗa gaini gdaŋni maini nɵa: Faka amai, ɗiya amai midini azuku ɗikat. A faka azumai par kot, a tika pini a hala.

¹¹Won hlai na firiɗi ɗai e tili wala na Paulus a zaŋ ɗa, e ɗûûli gaini wulaɗi amai e miɗi war seŋɗi Likawniyakai maini nɵa: Alawai ɗa e bindi siɗi aŋ ɗai, e niyisi haa azumai sumu.

¹²E sini yiki wiini Barnabas ɓa: Zeus, wiini Paulus ɓa: Hermes lai, buri ɓa a muɗa seŋ edi ɗa a ni.

¹³Pai zi ɓaka na wiini Zeus n’aŋa anene par mini fuŋ n’abai ɗa, a kasi garakai gaini wazagai zi gaŋ anene mini magala ɗa gaiɗi ɗai lai, hiiniɗi a tapa ɓa e zi ɓaka.

¹⁴Won hlai na Barnabas gaini Paulus e ɵini hanɗa, e ɓisi sapa na siɗi edi, e liwi piɗi ɗai e ɗûûli e miɗi:

¹⁵Tiki marmakai, ki zi nɵa buri maɗa? Tiyi lai, mi ɗi ɗai murɗakai maiki ɵa lai, siyi maiki ɵa lai. Na ɓa tiyi mi hilisi mi ɓiki labar na pɗem siki ɗa, mi ziŋ ɗa ɓa kapai ki hinisi alawai na a nafa kai ɗa edi, ki bindisi arki sini Alaw na karni na a za hlai n’amai gaiɗi yai, gaini yem ra n’abai gaini wazagai na warni paŋ lai.

¹⁶A ɗipar ɗa, Alaw a hiniɗi pini zibaɗi ɗai paŋ aŋ zi maini n’e diri nɵa,

¹⁷Amma gaini hanɗa paŋ ɗa, a za wala na a za zaida midini lai, a ziki pɗem, a hina faŋ n’amai par a ɵa, gaini hlai zi der lai, a viki gaini wazagai zi simi gaini muluk lai.

¹⁸Seŋ hanɗa a waya hiiniɗi ɗai azumai kapai e ziɗi ɓaka kir kai ɗa gaini gir kaɓa kaɓa.

¹⁹Wan hlai n’e ɗa miɗi, Yudeyakai zamai e hilisi war Antiyokiya gaiɗi Ikoniyom par e ziɗi piɗi ɗai ɗa, e bili Paulus gaini kriyit, aŋ fiɗiŋ edi, e sipiŋ edi war fuŋ n’abai ɗa par, e hiini ɓa a mra su.

²⁰Amma wan hlai na ɗai zi hitri e hiriŋ azumai har, a fakasi amai a wayasi aha war fuŋ n’abai. Dawaini ɗa a hala a Derbe gaini Barnabas.

²¹Asakal na e ɓiki labar na pɗem war fuŋ n’abai hanɗa, e bindi ɗai viya aŋ ɗai zi hitri lai ɗa, e wiyi war Listra, war Ikoniyom, war Antiyokiya lai.

²²E siɗi gdaŋ wiiɗi ɗai zi hitri, e siɗi arai-zi-pi aŋ ɗiyi war yimi, e miɗi aga mu suɗumu gir viya kapai mu niyumu warɗi paini Alaw ɵa.

²³War tipi tipi paŋ e viriɗi ɗai n’e ɵi wuze, asakal n’e tiki sai ya, e siiwi ya lai ɗa, e hiniɗi war tini Epiɗ-ɗai na nagai e tiki yimiɗi midini ɗa.

²⁴Asakal par e vigi war Pizidiya, e cûwar Pamfiliya.

²⁵Asakal n’e ɓiki seŋ war Perge ya, e hili azumai war Ataliya.

²⁶Woni par e niyi warni hulum aŋ hili war Antiyokiya, hlai na e viriɗisi edi aŋ hiniɗi war tini Alaw burini sda na e ziŋsi na ɗa.

²⁷Won hlai n’e cûɗa e diŋgiɗi tipi paŋ, e miɗiɗi midini sda na Alaw a zaŋ gaiɗi paŋ, gaini mili na a miliɗi arɗi pini ziba na zamai edi sini yimi ɗa lai.

²⁸E simni gaiɗi ɗai zi hitri ɗa haa mefeŋ yaw.