Read Mousgoum Sdaɗi Apostelai 15 Bible Online

Sdaɗi Apostelai 15 - Mousgoum bible

Sdaɗi Apostelai 15

¹Ɗai zamai e hilisi war Yudeya par e hiriɗi tawalakai ɓa, na ɓa ki ɵi gûrgûle maini de na wiini Musus a muɗaŋ ɗa nɵa kai ɗa, ki kiɗi ki kûri kai.

²Sispai a niya arbaɗi gaini Paulus gaini Barnabas lai gdaŋ. War sispai hanɗa, tawalakai e kiti miɗi ɓa, Paulus gaini Barnabas gaiɗi marɗi zamai lai, e hili amai a Yeruzalem siɗi Apostelai gaiɗi n’abakai n’arbaɗi ɗai aŋ miɗi midini seŋ hanɗa.

³Tipi e siɗi wazagai n’e kiɗi e kiti morkoiɗi gaini ɗa. Won hlai n’e vigisi war Fenesiya gaiɗi Samariya ɗaw, e zi gaglai wiiɗi ɗai midini bindi na wiiɗi pini ziba na zamai, wala hanɗa a siɗi firiyi n’abai wiiɗi tawalakai paŋ.

⁴Won hlai n’e cû a Yeruzalem, tipi gaiɗi Apostelai, gaiɗi n’abakai n’arbaɗi ɗai lai e yimiɗi siɗi, nagai e miɗiɗi midini wazagai na Alaw a zaŋ gaiɗi paŋ.

⁵Nɵa ɗai zamai na war vokɗi Farisekai par n’e bindi aŋ ɗai zi yimi, e fiki amai e miɗi: A pɗem ɓa e ɵiɗi gûrgûle wiiɗi pini zibaɗi ɗai zamai n’e yimi ɗa, e gidiɗi aŋ yimi gadai na wiini Musus ɗa lai.

⁶Apostelai gaiɗi n’abakai n’arbaɗi ɗai e dingi buri e tili seŋ hanɗa.

⁷Asakal na sispai a sawa ta ɗa, Peter a faka amai a miɗiɗi: Tawalakaya, tiki ki siɗi ya, war pi zi tiki par tar, Alaw a varaŋasi arbaki par, ɓa kapai war ma pini zibaɗi ɗai na zamai ɗa e ɵini labar na pɗem, e bindi aŋ ɗai zi yimi lai.

⁸Alaw na a siɗiti agul ɗa a za zaida edi midiɗi, a siɗi Seze-sɗik maini na a suŋmu wimu tumu nɵa lai,

⁹a za ɓraw arbamu tumu gaiɗi nagai kai buri a ma agulɗi edi hilu pini yimi.

¹⁰Nɵa tiyana ɗa, ki piyini mini Alaw buri maɗa? Ki firiyi ki tikiɗi juk na tamaimu kaalai, tumu kaalai, mu kuɗumu aŋ lubuŋmu kai wulaɗi ɗai zi hitri buri maɗa?

¹¹Kai tiɓ ɗa, mu hiinumu ɓa, mu kurumu ya na ɗa pini yum na wiini Epiɗ-ɗai Yesu maiɗi nagai nɵa lai.

¹²Nɵa dingi paŋ e simni hiyak, ɗai e zibiri seŋ na Paulus gaini Barnabas n’e miɗiɗi midini wazagai zi siŋki gaini hila na Alaw a zaŋ gaiɗi arbaɗi pini ziba na zamai ɗa.

¹³Won hlai n’e bi li, Yakob a miɗiɗi: Tawalakai zibiri seŋ na ɗa:

¹⁴Simun a muɗumu maɵa ɗa, azi n’avut Alaw a halasi a vara arbaɗi pini ziba na zamai ɗa par, pini ziba ktai aŋ wiini.

¹⁵A kata gaini seŋ na ɗai na mini Alaw e ɗûŋ ɓa:

¹⁶Asakal hanɗa aga mu wayasi, aga mu rga gumu na wiini David na a hurba azumai ɗa amai, aga mu zizina greŋaini amai, aga mu ɗiyaŋ amai pra.

¹⁷Kapai ɗai n’e hini ɗa e piyi Epiɗ-ɗai, nkam pini ziba paŋ n’e ɗa yiki yikiŋa ɗa,

¹⁸a muɗaŋ ɗa a Epiɗ-ɗai na a za wazagai hanɗa, na a sɗaŋsi haa gamai par.

¹⁹Nɵa ɗa, ta hiiniŋa ɗa ɓa: Pini ziba na zamai n’e yimisi warni Epiɗ-ɗai ɗa, mu huwuyuɗumu kir kai,

²⁰amma mu ɗumu siɗi ɓa: E ɗili siɗi aŋ limi neŋ n’e ziŋ aŋ ɓaka wiiɗi alawai na zamai ɗa kai, war zini maɵara, warni simini wazagai zi rûzi gaini fel lai.

²¹Buri ɓa haa gamai par, war fuŋ n’abakai ta ta ɗa, ɗai n’e miɗi edi midini Musus e ɗa, buri ɓa Sabbat Sabbat paŋ ɗa, e ɗa niŋ amlai warni sinagogne.

²²Nɵa, a tala arɗi Apostelai gaiɗi n’abakai n’arbaɗi ɗai gaiɗi tipi paŋ lai pɗem, buri e viri ɗai arbaɗi par e ɵiniɗi war Antiyokiya gaini Paulus gaini Barnabas. E viri Yudas n’e yikiŋ ɓa Barsabas gaini Silas, e ɗi ɗai n’e ɵi wuzaɗi marɗi.

²³E sitiɗi letre hanɗa war tiɗi, te muɗa maini nɵa: Tiyi tawalakaiki, Apostelai, gaiɗi n’abakai n’arbaɗi ɗai, mi ɗa ɵiɓiki wuti wiiki tiki tawalakai na war pini ziba na zamai, na ki ɗa war Antiyokiya, war Siriya, war Silikiya lai.

²⁴Tiyi mi ɵini ɓa, ɗai zamai e hiliɗi ahayi par, na tiyi mi siɗiɗi miɗi miɗi ktai kai, e ɗa ûrliki, e miliki hunai piki lai gaini seŋɗi zi miɗi.

²⁵Tiyana ɗa, tiyi mi kiti miyi ɓa, mi viriɗi ɗai arbayi par aŋ ɵiniɗiɗi siki gaiɗi tawalakai zi diri gara, Barnabas gaini Paulus,

²⁶nagai n’e si sunfaɗi edi burini yikini Epiɗ-ɗai Yesu Kristu.

²⁷Tiyi mi ɵiniɗi Yudas gaini Silas aŋ kikiɗi labar hanɗa gaini miɗi lai.

²⁸Buri ɓa, a tala arni Seze-sɗik pɗem, aryi tiyi nɵa lai, kapai mi tikiki guma zamai midiki a suwa kir kai.

²⁹Amma tiki aga ki ɗili siki aŋ limi neŋ na ki ziŋ aŋ ɓaka wiiɗi alawai na zamai ɗa kai, warni simini fel, gaini neŋni wazagai zi rûzi gaini zini maɵara lai. Wazagai hanɗa aga ki zi hanɗa kai. Alaw a za gaimu.

³⁰Nɵa nagai e fikisi, e hilisi azumai war Antiyokiya, woni e tipiɗi ɗai viya, e sitiɗi letre ɗa.

³¹Letre te ŋa edi, ɗai e firiyi burini arai-zi-pi hanɗa.

³²Yudas gaini Silas na e ɗi ɗai na mini Alaw gaini midiɗi dama e siɗi arai-zi-pi wiiɗi tawalakai, e siɗi gdaŋ gaini seŋ zi miɗi viya viya lai.

³³E fini agwiya ɗa, tawalakai e tikiɗi piɗi war futi war ɵeɗ aŋ wiyi siɗi nagai n’e ɵiniɗisi ɗa.

³⁴A tala arni Silas pɗem buri a hina woni.

³⁵Paulus gaini Barnabas e simni war Antiyokiya, e hitri, e ɓiki labar na pɗem na wiini Epiɗ-ɗai lai gaiɗi ɗai zamai viya lai.

³⁶Mefeŋ agwi asakal par, Paulus a miɗini wiini Barnabas: Wuyumu aŋ ɗûgûliɗi tawaalakai, war fuŋ n’abakai na mu ɓukumu labar na pɗem na wiini Epiɗ-ɗai woni ta ta ɗa, na e gi wata ta ɗi ɗa?

³⁷Barnabas a firiya ɓa a yima Yohana na zizinani Markus ɗa piɗi kaai lai,

³⁸amma Paulus warni a dara kai, a firiya e yimi ɗif na a hiniɗisi haa a Pamfiliya par, na a kiɗi piɗi war sda kir kai ɗa, gaiɗi kir kai.

³⁹Sispai a riya amai arbaɗi haa e ɓûrwi siɗi marɗi par. Barnabas a yima Markus gaini a hala war Kiprus.

⁴⁰Paulus a vara Silas gaini a hala lai, tawalakai e hiniŋ war tini Epiɗ-ɗai.

⁴¹A vuga war Siriya ɗaw, a kilikiya ɗaw a sa arai-zi-pi wiiɗi tipi.