Read Mousgoum Sdaɗi Apostelai 16 Bible Online

Sdaɗi Apostelai 16 - Mousgoum bible

Sdaɗi Apostelai 16

¹Asakal par a co a Derbe, a Listra lai, amma ɗif zi hitri ktai n’e yikiŋ ɓa: Timotewus a nafu woni. Emini te Yudeya, epini a ɗif na grek lai.

²Tawalakai na Lira gaiɗi na Ikoniyom ɗa e zi zaida midini pɗem gara.

³Paulus a firiya a yimaŋ gaini, nɵa a yimaŋ a ɵini gûrgûle buriɗi Yudeyakai n’e ɗa woni hlai ni ɗa, buri paŋ e siɗi ɓa epini ɗa a ɗif na grek.

⁴War fuŋ n’abakai n’e vigi woni paŋ ɗa, Paulus gaini Silas e miɗi edi midini gadai na Apostelai gaiɗi n’abakai n’arbaɗi ɗai na Yeruzalem e ɗiyiŋsi ɗa, kapai ɗai e zi pini.

⁵Nɵa tipi e bindi gdaŋai war yimi a suwa a suwa, piɵiɗi ɗe mefeŋ mefeŋ paŋ a riya amai sek sek lai.

⁶Seze-sɗika ɗiliɗi buri e ɓiki seŋ war Aziya kai. E vigi war Frigiya ɗaw, midini afti na Galat ɗaw.

⁷Won hlai na e cûgobi gaiɗi Misiya, e firiyi e hili war Bitiniya, amma Seze n a wiini Yesu a hiniɗi aŋ zi nɵa kai.

⁸E vigi ɵemaɗi Misiya ɗaw, e hili azumai a Trowas.

⁹War duvuk ɗa, Paulus wala a siŋka arni, a tala ɗif na Makedoniya amai zaw aŋ siiwa maini nɵa: Vugazi war Makedoniya ɗaw, halasi zna piyi ta.

¹⁰Won hlai na wala hanɗa a siŋ ka aryi tar ɗa, tiyi mi piyi futi aŋ hili war Makedoniya, buri a yima midiyi ɓa, a yikisiyi woni par na ɗa Alaw buri mi hili mi ɓiki labar na pɗem woni.

¹¹war rowas par mi hili cir midiɗi hudi na samatras, dawaini ɗa mi hili a Neyapolis tar,

¹²Woni par ɗa mi hili war Filip fuŋ n’abai na a suwa paŋ midini afti na Makedoniya, e ŋi midini ɗa e ɗi romeakai. Mi simni warni fuŋ n’abai hanɗa feŋ yaw.

¹³War mefeŋ na wiini Sabbat ɗa, mi niyi anene mini magala na wiini fuŋ n’abai ɗa gobi gaini ra, war hlai na mi hiini ɓa hlai zi siiwi na wiiɗi Yudeyakai aŋ woni. Mi simni azumai aŋ ɓiki seŋ siɗi falakai n’e tipisi woni ɗa.

¹⁴Muni ktai te nafu woni e yikiti ɓa Lidiya, te na war fuŋ n’abai na Tiyatira par, te cikila sapa na mekele na wirini caŋ gara; na te siiwa Alaw lai, na te zuɓura, Epiɗ-ɗai a mala hiiniɗi edi kapai te yima seŋ na Paulus a na muɗaŋ ɗa.

¹⁵Asakal na te nava baptisme gaini dalamɗi paŋ ya, te siiwiɗi ɓa: Na ɓa mu tala arki ɓa mu yima warni Epiɗ-ɗai jre ɗa, ki hilisi ki simni ahaya. Te siika miyi haa mi hili ahaɗi.

¹⁶Mefeŋ ktai war hlai na mi ɗa hili war hlai zi siiwa, mi niviti ahiyagoi zi sda ktai na ksalai zi siɗi na wuze aŋ midiɗi, te za farai viya wiiɗi ɗai na te sɗa ahaɗi ɗa, gaini sdaɗi zi siɗi na wuze na te zaŋ ɗa, te halasi miyi.

¹⁷Te ɵasi piyi gaini Paulus su aŋ ɗuula maini nɵa: Ɗai hanɗa e ɗi bagakai na wiini Alaw n’amai, e miɗiki na ɗa midiɗi futi zi kûri.

¹⁸Te na zaŋ ɵaŋŋa ɵaŋŋa, mefeŋ ktai ɗa, Paulus a kaya ta a bunda arni a muɗa sini ksalai na gaini siɗi na wuze maini nɵa: War yikini Yesu Kristu, mu muɗuku, ku niyasi edi siɗi par.

¹⁹Won hlai na ɗai na te sda ahaɗi e tili ɓa aga e nivi wala kir kai ɗa, e yimi Paulus gaini Silas e kiɗi woni faada wuzaɗi ɗai n’abakai ɗa.

²⁰E kiɗi wuzaɗi ɗai zi ɗûkûliti sariya, e miɗi: Ɗai hanɗa e kisi tûrli warni fuŋ n’abai hanɗa, nagai e ɗi Yudeyakai,

²¹e ɗa hitri gadai na tumu Romekai ɗa mu kuɗumu buri mu yumunmu kaalai, mu zumu pini kaalai.

²²Ɗai e fiki amai siɗi lai, nɵa paakai zi sariya e si futi buri e wi sapa na siɗi edi, e ɵiɓiɗi gaini daɓala.

²³Asakal n’e ɵiɓiɗi yaa haa ɗa, e pûkûɗi war daŋgai, e gidini mini ɗif zi daŋgai ɗa buri a giɗimiɗi gaini futini.

²⁴Won hlai na e sini gadai hanɗa ya ɗa, a pûkûɗi amlai piɗi daŋgai amlai, a wa eziɗi war pokolom ɗik ɗik lai.

²⁵Duvuk n’arba ɗa, Paulus gaini Silas e siiwi, e zini yama zi kol na sini Alaw lai, marɗi zi daŋgai ɗa e ɵini lai.

²⁶Won hlai ni tizaw afti a ziriya, eziɗi daŋgai a muguza war hlai ni tizaw lai, mini hlai paŋ a mala edi, zaŋ n’eziɗi ɗai zi daŋgai ɗa a pla edi lai.

²⁷Ɗif zi giɗimi daŋgai a ɵiyasi amai, a navasi miɗi daŋgai gaini mili edi mal mal, a hota kaɵkarni buri a fuɗa sini, a hiina ɓa ɗai zi daŋgai e pri edi yaw.

²⁸Amma Paulus a ɗuula a muɗa: Ku fuɗa suku kai, tiyi mi ɗa kafa.

²⁹Nɵa ɗif zi giɗimi daŋgai ɗa a paya afu, a purma aŋ niya amlai, a bla sini azumai wuzani Paulus gaini Silas, a ziriya lai kaw kaw kaw.

³⁰A kiɗisi anene a muɗa: Ɗai n’abakai, aga mu za ɗa a maɗa kapai mu kora ɗa?

³¹A wiyini seŋ a miɗini: Ku yima warni Epiɗ-ɗai Yesu, nɵa aga ku kora, tuku gaini dalamku paŋ.

³²E ɓiki seŋ na wiini Epiɗ-ɗai sini gaiɗi nagai paŋ n’e ɗa ahani lai.

³³War hlai ni, piɗi duvuk ni dama a miliɗi pini, a ma mini wurukɗi edi, gaini safai kai a nava baptisme ni gaiɗi ɗaini paŋ.

³⁴A kiɗi amai ahani a zizina simi buriɗi, a firiya gaini dalamni paŋ buri a yima warni Alaw.

³⁵Won hlai na hlai a sɗa li edi ɗa, paakai zi ɗûkûliti sariya e ɵini ɗai ɗi sini ɗif zi giɗimiti daŋgai ɗa, aŋ miɗini: Pûkûɗi ɗai hanɗa.

³⁶Ɗif zi giɗimiti daŋgai a kasi seŋ hanɗa sini Paulus maini nɵa: Paakai zi ɗûkûliti sariya ɗa ɓa: Mu hiniki ki hili. Tiyana ɗa, niyi wiiki anene, ki hili jam.

³⁷Amma Paulus a wiyiɗi seŋ wiiɗi nagai n’e ɵiniɗisi ɗa maini nɵa: Nagai e ziyi sariya kai, e ɵiɓiyi arɗi ɗai doogo, tiyi na mi ɗi Romekai lai, e pûkûyi warɗi daŋgai lai. Tiyana e firiyi e pûkûyi war kuɗuhai, a za kai. A pɗem ɓa nagai mal e hilisi e miliyi anene.

³⁸Ɗai n’e ɵiniɗisi ɗa, e ki seŋ hanɗa wiiɗi paakai zi ɗûkûliti sariya ɗa, wan hlai na nagai e ɵini ɓa Paulus gaini Silas ɗa e ɗi Romeakai ɗa, hunai te yimiɗi,

³⁹e hilisi e tikiɗi hangalɗi azumai, e miliɗisi anene, e siiwiɗi buri e yimi siɗi edi warni fuŋ n’abai ɗa par kaai.

⁴⁰Won hlai na e niyisi edi war daŋgai par, e hili ahaɗi Lidiya. Asakal na e tiliɗi tawalakai ba ba, e siɗi arai-zi-pi lai ɗa, e hili warni hlai zamai.