Read Mousgoum Sdaɗi Apostelai 17 Bible Online

Sdaɗi Apostelai 17 - Mousgoum bible

Sdaɗi Apostelai 17

¹Paulus gaini Silas e vigi war Amfipolis ɗaw, war Apoloniya ɗaw, e cû war Tesalonik, sinagogne na wiiɗi Yudeyakai aŋ woni.

²Paulus a hala woni maini n’aŋa zaŋ kureɗ kureɗ nɵa, Sabbat pini marni hu, Paulus a sispagaiɗi war ɗû par.

³A siŋkiɗi ezini ɗû edi kapai a yimiŋɗi midiɗi ɓa: Kaai tiɓ ɗa, a na ɗa ɓa, Kristu ɗa a sɗa gir, a ɵiya amai arbaɗi zi mri par lai, a muɗa: Yesu na ta mu miɗiki edi midini na ɗa a Kristu ɗa.

⁴Zamai arbaɗi Yudeyakai par, seŋni Paulus gaini Silas ɗa a yima midiɗi, e tipi gaiɗi. Grekkai n’e siiwi Alaw viya gaiɗi falakai n’abakai dam dam ɗa, e tipi gaiɗi lai.

⁵Amma Yudeyakai ɗa, sile a niya warɗi, e miliɗi ɗai zamai na maafanai n’e ɗa yaw arbani hlai piɗi, e firiɗi ɗai war fuŋ n’abai ɗa gid gid, e fiki dûrgûzi amai lai. E fiki fuŋ na wiini Jason aŋ piyi Paulus gaini Silas aŋ kiɗi wuzaɗi ɗai.

⁶Amma e niviɗi kai, e yimisi Jason gaiɗi tawalakaini zamai zamai lai e kiɗi wuzaɗi abakai na war fuŋ n’abai ɗa, e ɗûûli e miɗi: Ɗai n’e tûrliti yai ɗa paŋ amai ɗa e ɗi tiyana woni na.

⁷Jason a yimiɗi aha sini, gadai na wiini Sezar ɗa nagai e zi pini kai, e miɗi ɓa pai zamai a na e yikiŋ ɓa Yesu.

⁸Seŋ hanɗa a ɓla hiiniɗi ɗai gaiɗi abakai na war fuŋ ɗa lai.

⁹Jason gaiɗi marni na zamai ɗa, e virgi ta haw kapai e hiniɗi.

¹⁰Duvuk ni ɗa, tawalakai zi yimi e tikini pini Paulus gaini Silas war Bere. Won hlai n’e cûɗa, e hili amlai war sinagogne na wiiɗi Yudeyakai.

¹¹Nagai ɗa pɗamai e sûwiɗi ɗai na esalonik ɗa, e yimi seŋni Alaw gaini gdaŋɗi, mefeŋ mefeŋ paŋ e fifiki ɗû ɗa, kapai e siɗi ɓa seŋ na ɗai e miɗiŋɗi na ɗa a na ɵa zaw, a na ɵa kai ɗi?

¹²Zamai viya arbaɗi e bindi aŋ ɗai zi yimi gaiɗi falakai na grek n’abakai dam dam ɗa, gaiɗi maɵagai viya lai.

¹³Amma wan hlai na Yudeyakai na Tesalonik par e siɗi ɓa Paulus a na ɓaka seŋni Alaw war Bere lai ɗa, e hilisi woni pra aŋ fiki dûrgûzi amai arbaɗi ɗai.

¹⁴Nɵa tawalakai e tikini pini Paulus woɗi futi sini yem ra n’abai ɗa sek, Silas gaini Timotewus e hini ka ca.

¹⁵Nagai n’e kiini pini Paulus ɗa, e kiini pini haa a Aten ta. Asakal par e wiyi duɓaɗi. Paulus a sikitiɗi buri e miɗini wiini Silas gaini Timotewus buri e hiliɗi pini witaw.

¹⁶wan hlai na Paulus a na biyiɗi war Aten ɗa, tili na a tala fuŋ n’abai hanɗa gaini tiki tini alawai na zamai ɗa ɗaw ɗa, a fiɗini sini gara.

¹⁷Nɵa mefeŋ paŋ ɗa a sispa gaiɗi Yudeyakai, gaiɗi nagai n’e siiwi Alaw amlai warni sinagogne ɗa lai, gaiɗi nagai n’e simni woni hlai na ɗai e tipi woni ta ta ɗa lai.

¹⁸Ɗai zi siɗi zamai na yikiɗi ɓa: Epûkûrekai gaiɗi stoyikekai e hilisi e sisipi gaini; zamai e miɗi: Ɗif na mini a tuwa taf taf na ɗa, a muɗa ɗa a ma lai ɗa? Zamai pra e miɗi ɓa: A ɗif na a ɓaka seŋ na wiini Alaw na mu suɗuŋmu kai ɗi. E miɗi nɵa buri a na ɓaka labar na pɗem na midini Yesu gaini ɵiyi n’amai lai.

¹⁹Nɵa e yimiŋ e kiŋ arbaɗi Ayrepagos e miɗi: Hitri na hehe na ku muɗa midini na ɗa, a na wata ɗa, miɗiŋyi haw ɗa!

²⁰Buri ɓa seŋ na ku muɗaŋ ɵemayi na ɗa aseŋ na hehe, ku kiɗa ku miɗiyi ezini edi ɗi?

²¹Buri ɓa ɗai na war Aten gaiɗi ɗai n’edi par n’e hilisi arbaɗi lai ɗa, e zi wala zamai kai e miɗi ɗa a labar na hahakai, e zibiri ɗa a labar na hahakai lai.

²²Paulus a ɗiya amai arbani Ayrepagos edi arba zaw, a muɗa: Tiki ɗai na Aten, mu sɗa ɓa ki ɗi ɗai na ki hûni Alaw gara war wazagai.

²³Won hlai na mu na vuga blaŋ ɗa, mu nava wazagaiki na ki siiwi tini ɗa zaw zaw zaw, maa mu nava gûwiŋ zi ɓaka ktai gaini ɗûmidini maini hanɗa nɵa: Wiini alaw na mi sɗiŋ kai. Nɵa wala na ki ɗa hûrgi azumai wuzani na ki sɗiŋ kai na ɗa, ta mu halasi mu miɗiki na ɗa midini wala ni mal.

²⁴Alaw na a ziti duniya gaini wazagai na warɗi paŋ ɗa, Ni na a Epiɗ-ɗai na war hlai n’amai, na midiɗi yai lai ɗa, a sumna warni tempel na ɗai murɗakai e ziziniŋ ɗa kai.

²⁵Ni ɗa a na paya wala ktai tiɗi ɗai murɗakai par kai, wala ktai na a suwaŋ aŋ kaalai. A hina ɗai karɗi ɗa A ni, a sa sunfa ɗa A ni lai, gaini wazagai na zamai zamai paŋ lai.

²⁶A ziɗi pini zibaɗi ɗai paŋ na ɗa sini ɗif ktai par, ɓa kapai nagai paŋ e simni midini afti warni sarti n’aŋ gaini kiti ta ta, gaini arni hlai na a ɗuklaŋ ta ta ɗa lai.

²⁷Kapai e piyi Alaw na ɓa ablaŋtaŋkai war giliŋiɗi ɗa e kiɗi e niviŋ ɗi ɗa; Ni na kadai tiɓ a na gai gai gaini ktai arbamu kai.

²⁸Buri ɓa mu ɗumu karmu na ɗa warni Ni, mu muguzumu na ɗa warni Ni, mu ɗumu aŋ ɗai na ɗa warni Ni lai, maini na zamai arbaɗi ɗaiki zi ɗû wazagai e miɗiŋ ɗa nɵa: Tiyi lai, mi ɗi na war pinzibani.

²⁹Nɵa ɗa, na ɓa mu ɗumu na war pinzibani Alaw ɗa, aga mu hiinumu kai ɓa, Alaw a na maini or ɵa, zaw arzaŋ, zaw maini ahi fuŋ ɵa na ɗif a hiinaŋ, a zizinaŋ lai pini yelni nɵa kai.

³⁰Alaw a tika pini hlai na ɗai e ɗika e siɗi wala kai ɗa kai, tiyana ɗa a a na gidiɗi ɗai paŋ, n’e ɗa woɗi woɗi paŋ buri e bindi payaiɗi gamai.

³¹Buri ɓa a ɗiya mefeŋ ktai a na zaw, na woni aga a ziti sariya wiiɗi ɗai na midiɗi yai war jre gaini ɗif na a tikaŋ ta ɗa. A siŋkiɗi edi wiiɗi ɗai gaglai ɓa, e kiɗi e yimi seŋ hanɗa, gaini ɵiyi na a ɵiyaŋsi amai arbaɗi zi mri par ɗa.

³²Wan hlai n’e tiliŋ a na muɗa midini ɵiyi n’amai na wiiɗi ɗai zi mri ɗa, zamai e zini yewere, amma na zamai e miɗi: Seŋ hanɗa ku miɗiŋyi yuvai zamai.

³³Nɵa Paulus a niyasi edi arbaɗi par.

³⁴Gaini hanɗa paŋ, zamai e yimi seŋni, e bindi aŋ ɗai zi yimi lai. Arbaɗi ɗai hanɗa, mu nuvumu Denis, a ktai arbaɗi ɗai na Ayrepagos par ɗa, gaiɗi muni ktai na yikiɗi ɓa: Damaris, gaiɗi ɗai zamai zamai lai.