Read Mousgoum Sdaɗi Apostelai 18 Bible Online

Sdaɗi Apostelai 18 - Mousgoum bible

Sdaɗi Apostelai 18

¹Asakal hanɗa a fakasi a Aten par aŋ hala war Korinte na Yudeya.

²A nava ɗif ktai woni na yikini ɓa Akilas, a na midini afti na Pontus par, na a halasi war Italiya par gobi na gaiɗi Priskila na munini buri Sezar Klodiyus a sa miɗi ɓa, Yudeyakai e yimi siɗi edi war Rome par, a tapa gaiɗi.

³Sdaɗi ɗa a ni ktai, nɵa a sumna gaiɗi a za sda lai, sda na wiiɗi ɗa a hini tanta.

⁴Sabbat Sabbat paŋ, a sispa gaiɗi Yudiyakai gaiɗi grekkai lai amlai warni sinagogne haa seŋni a yimiŋɗi midiɗi.

⁵Won hlai na Silas gaini Timotewus a Makedoniya par e cûli ɗa, Paulus a ɗiya midini ɓikini-seŋ, a siŋkiɗi edi wiiɗi Yudeyakai gaglai ɓa Yesu ɗa a Kristu.

⁶Won hlai na Yudeyakai e pi arni, e miisiŋ lai ɗa, a guvura sapa na sini a miɗiɗi: Felki ɗa a zilba tiki, ta ɗa felki a zilba ta kai, tiyana par ɗa, aga mu bunda ara siɗi pini ziba na zamai.

⁷A fakaɗi woni par, a hala ahani ɗif ktai n’e yikiŋ ɓaTitiyus Yustus, ɗif na a yima pini Alaw, na dalamni a na gobi sini sinagogne ɗa.

⁸Paŋ ktai Krispas n’abaini sinagogne ɗa a yima warni Epiɗ-ɗai gaini dalamni paŋ, ɗai na Korinte viya n’e ɵini seŋ e bindi aŋ ɗai zi yimi e nivi baptisme lai.

⁹War duvuk ktai, warni wala na a siŋka sini arni Paulus, Epiɗ-ɗai a miɗini maini nɵa: Ku huna kai, ɓaka seŋ wuzaku sek, ku ba muku kai,

¹⁰buri ta m’aŋ gaiku, ɗif ktai n’aga a tikan tini suku aŋ zuku meefeŋ aŋ kai buri ɓa ɗaiŋa e ɗa viya war fuŋ n’abai hanɗa.

¹¹Paulus a hina woni haa buza ɗaw gaini tile ɵaara aŋ hitra seŋni Alaw arbaɗi.

¹²Won hlai na Galiyon a naka aŋ ɗif n’abai midiɗi Akay ɗa, Yudeyakai e tipi ktai midini Paulus e kiŋ war sariya lai.

¹³E miɗi: Ɗif hanɗa a ziɗi midiɗi ɗai buri e siiwi tini Alaw maini na gadai a muɗa midini nɵa, kai.

¹⁴Won hlai na Paulus a dara a tika seŋ a muɗa ɗa, Galiyon a miɗiɗi wiiɗi Yudeyakai maini nɵa: Tiki Yudeyakai, na ɓa a nafu na ɗa a wala na meefeŋ, zaw a seŋ ktai n’abai ɗi ɗa, koo a na maɵa ɗi aga mu ɵiniki,

¹⁵amma na ɓa sispai ɗa a yima arbaki burini seŋ, burini yiki, zaw burini gadai na wiiki lai ɗa, a seŋki. Ta ɗa mu firiya mu wa sa warni seŋ zi sariya hanɗa kai.

¹⁶A birgiɗi wuzani par.

¹⁷Nɵa e yimi Sosten abai na midini sinagogne ɗa, e tiki piɗi e ɵiɓiŋ wuzani hlai zi sariya, amma Galiyon jaani kai sam.

¹⁸Paulus a sumna gaiɗi katawai mefeŋ yaw, asakal par ɗa, a hiniɗi tawalakai a niya warni hulum n’abai a hala war Asiriya, Priskila gaini Akilas e hili gaini, a faɗa midini edi a Kankreya buri ɓa a ha wala mini.

¹⁹Won hlai n’e cûwar Efesus ɗa, a ɓurwa gaiɗi, a hala amlai war sinagogne a sispa gaiɗi Yudeyakai,

²⁰e zilbiŋ buri a sumna gaiɗi burini hlai n’agwi, amma ni a ɗiya kai.

²¹A hala siɗi par a muɗa: Aga mu wayasi ahaki, na ɓa Alaw a dara ɗa. War Efesus par a niya war hulum n’abai, a hala

²²a sezare sek a yima woni, a hala amai a Yeruzalem a ɵiɓa wuti wiiɗi tipi tiɓ tiɓ, asakal par a wayasi a hala war Antiyokiya.

²³Asakal par agwiya ɗa, a waya katawai pra a vuga midini afti na Galat gaini Frigiya, a sa arai-zi-pi wiiɗi ɗai zi hitri paŋ.

²⁴Amma ɗif na Yudeya ktai n’e yikiŋ Apolos, a wa war Alekzandriya, a ɗif na a sɗa seŋ zi miɗi gara, na a sɗa ɗû gara lai, a cosi war Efesus;

²⁵A nava hitri midiɗi futi na wiini Epiɗ-ɗai, a ɗif na kurfuk war seze a muɗa, a hitra midini Yesu lai kal kal maini na a na ɗa nɵa. Amma a sɗa ɗa a baptisme na wiini Yohana ɗa bas.

²⁶A tika pini aŋ ɓaka seŋ edi gaini hunai pini kaalai, gaini giriŋi kaalai amlai warni sinagogne ɗa. Won hlai na Priskila gaini Akilas e tili seŋ n’aŋa muɗaŋ ɗa, e yimiŋ gaiɗi, e siŋkiŋni edi gaglai a suwa.

²⁷Won hlai na a firiya ɓa sai a hala war Akaya ɗa, tawalakai e sini arai-zi-pi, e ɗûɗi wiiɗi ɗai zi hitri buri e yimiŋ siɗi gaini futini. Won hlai na a co woni ɗa, a zna piɗi ɗai na pini yum e bindi aŋ ɗai zi yimi ɗa viya gara.

²⁸Buri ɓa arɗi ɗai doogo ɗa, a dûgûɗi miɗi Yudeyakai gaini gdaŋ, a siŋkiɗi edi warni ɗû par lai ɓa, Yesu ɗa a Kristu.