Read Mousgoum Sdaɗi Apostelai 19 Bible Online

Sdaɗi Apostelai 19 - Mousgoum bible

Sdaɗi Apostelai 19

¹Won hlai na Apolos aŋ war Korinte ɗa, Paulus a vugasi midini galni afti n’amai mogo par, a halasi war Efesus a navasi ɗai zamai zi hitri woni.

²A zilbiɗi a muɗa: Won hlai na ki bindi aŋ ɗai zi yimi ɗa, ki nivi Seze-sɗik ya ɗi? E wiyi seŋ e miɗi: Wala na e yikiŋ ɓa Seze-sɗik maa mi ɵinika labarni duk kai.

³Paulus a zilbiɗi: Tiki ki nivi ɗa a baptisme na wata ɗa? E wiyi seŋ a baptisme na wiini Yohana ɗa.

⁴Nɵa a muɗa: Yohana ɗa a za a baptisme na wiini bindi na gamai, amma a miɗiɗi wiiɗi ɗai buri e yimi warni Ni n’aga a halasi asakalni par ɗa, a dara a muɗa war Yesu.

⁵Won hlai n’e ɵini seŋ hanɗa, e nivi baptisme war yikini Epiɗ-ɗai Yesu.

⁶Won hlai na Paulus a tika tini midiɗi, Seze a halasi a sumna midiɗi, e tiki piɗi aŋ miɗi gaini meme na kiini kiini, e miɗi seŋ na wuze lai.

⁷Ɗai hanɗa, e ɗa paŋ doogo pi sulu.

⁸Paulus a hala war sinagogne, woni a ɓaka seŋ gaini hunai kaalai, gaini giriŋi kaalai. A za gaiɗi haa tile hu, a sispa gaiɗi, a paya yel aŋ mala hiiniɗi edi midiɗi paini Alaw.

⁹Amma wan hlai na zamai arbaɗi e bindi agulɗi gdaŋ buri e ɵini kai, e miɗi meefeŋ siɗi futi na wiini Alaw wuzani firiɗi ɗai ɗa, a yima sini edi siɗi par, a miliɗi ɗaini zi hitri edi kiiɗi, mefeŋ paŋ a hitra seŋ war lokor na wiini Tirannus.

¹⁰A zaŋ maini hanɗa ɵa haa buza sulu, haa ɗai na war Aziya paŋ, Yudeyakai gaiɗi grekkai lai e ɵini seŋ na wiini Epiɗ-ɗai.

¹¹Alaw a za wazagai zi hila n’abakai gaini Paulus.

¹²Haa sapa zi wi, zaw sapa zi girdi arsuk na a poko li sini paŋ ɗa, e miliŋ li siɗi ɗai zi veglek ɗa, veglekɗi a zuula, seze na maafanai a niyasi edi siɗi par lai.

¹³Ɗai zamai zi birgi ksalai na gaini eziɗi yaw yaw arbaɗi Yudiyakai par, e tiki piɗi aŋ yiki yikini Epiɗ-ɗai midiɗi ɗai na ksalai aŋ midiɗi ɗa e miɗi: mi muɗuku war yikini Yesu na Paulus a ɓakaŋ ɗa, niyasi anene.

¹⁴Ɗif ktai yikini Sekevas, a ktai arbaɗi paakai n’abakai zi ɓaka na wiiɗi Yudeyakai, alini na maɵagai muguzak e ɗa zi nɵa lai.

¹⁵Seze na meefeŋ a wiyiɗisi seŋ a muɗa: Yesu, ta mu sɗaŋ, Paulus ɗe mu sɗaŋ gaglai lai, tiki ɗa ki ɗi miɗi a siya lai ɗa?

¹⁶Ɗif na gaini seze na meefeŋ sini a yima siɗi aŋ ɵiɓiɗi gaini hlaiɗi paŋ, haa e prisi aha war dalam hanɗa par ɗa ganala, gaini wuruk siɗi lai.

¹⁷Labar hanɗa a wa edi warɗi Efesus paŋ, Yudeyakai gaiɗi grekkai lai e ɵini hanɗa paŋ, yikini Epiɗ-ɗai Yesu a nava kol lai.

¹⁸Viya arbaɗi nagai n’e bindi aŋ ɗai zi yimi ɗa, e miɗi edi wuzaɗi ɗai doogo midini wazagai n’e ziŋ ɗa.

¹⁹Zi zi magi viya, e kisi maktuɓɗi n’e zi gaini ɗa, e ziŋ edi wuzani arɗi ɗai paŋ, e kiti wirini ɗa, a za sulai zi arzaŋ dubu doogo doogo ɵim.

²⁰Seŋ ni Alaw a wa tini edi, a suma hlai gdaŋ lai ɗa pini spak na wiini Epiɗ-ɗai ɗa.

²¹Asakal hanɗa Paulus a rga warni buri a hala a Yeruzalem, a vugasi warɗi Makedoniya gaiɗi Akaya par ɗaw. A hiina gaini warni ɓa: Mu hala li warni ɗa, sai mu hala war Rome pra.

²²Arbaɗi ɗai n’e zini pini par ɗa, a ɵinasi ɗai sulu: Timotewus gaini Erastus, ni gaini midini a hinasika war Aziya burini hlai n’agwi.

²³War sarti ni ɗa, dûrgûzi n’abakai a faka amai buri futi na wiini Epiɗ-ɗai,

²⁴ɗif zi hiliyi or ktai yikini Demetriwus, a zizina tempelai zi arzaŋ na wiini alaw Artemis, a kasi der viya wiiɗi ɗai n’e siɗi yelni sda hanɗa.

²⁵A tipiɗi ɗai hanɗa paŋ gaiɗi marni na e zi sda ni lai a miɗiɗi: Marmakaya, tiki ki siɗi ɓa mu nuvumu dermu na ɗa pini sda hanɗa,

²⁶amma tiki ki tili, ki ɗa ɵini lai ɓa, Paulus a na ziɗi midiɗi ɗai, a na wula ɗai viya edi lai ɓa, alaw na e ziziniŋ e ɗi ɗai ɗa a Alaw kai, hanɗa war Efesus kiiɗi kai, amma midini afti na Aziya gaini hlaini paŋ.

²⁷Wala hanɗa aga a fakasi ɗa a tirki sini sdamu kiini kai, amma aga a ɵaɗa diri na ɗai e diri tempel na wiini alwa Artemis ɗa azumai, nɵa kol na a sa siɗi, na ɗai na war Aziya paŋ gaiɗi ɗai na midini afti e ɗa hûgi azumai wuzaɗi ɗa, aga a vada edi lai.

²⁸Won hlai n’e ɵini seŋ hanɗa, e vi gaini suwar e ɗûûli e miɗi: Alaw Artemis na wiiɗi Efesekai ɗa, te na amai gara.

²⁹Dûrgûzi a tika fuŋ n’abai ɗa paŋ, ɗai paŋ war hiini na ktai e pirmisi mini hlai n’e yikiŋ ɓa: Teyatre ɗa, e yimisi Gayus gaini Aristarkus na Makedoniya par n’e ɗa gaini Paulus.

³⁰Paulus a firiya ɓa sai a hala arɗi ɗai ɗa, amma ɗai zi hiri e hiniŋ aŋ za nɵa kai.

³¹Ɗai zamai zi sda n’abakai na marmakaini n’e ɗa war fuŋ n’abakai ɗa, e ɵinisi sini aŋ siwiŋ buri a hala woni hlai na e yikiŋ ɓa: Teyatre ɗa kai.

³²Ktai a ɗuula nsek, ktai a ɗuula nsek lai, buri dûrgûzi ɗa a suwa arbaɗi ɗai suwai. Abaiɗi ɗai maa e siɗi wala na e diŋgisi pini ɗa kai.

³³Arbaɗi firi par ɗai e zini gaglai wiini Alekzandre na Yudeyakai e tikiŋ wuzaɗi ɗa, Alekzandre a yima tini amai a dara a miɗiɗi seŋ wiiɗi ɗai.

³⁴Amma wan hlai n’e siɗi ɓa a ɗif na Yudeya ɗa, ɗai paŋ e fiki aŋ! dûûli miɗi ktai haa gobi ler sulu, maini nɵa: Artemis, alaw na wiiɗi Efesekai, t'alaw na amai gara.

³⁵Sekreter a tika hangalɗi ɗai azumai, a muɗa: Tiki ɗai na Efesus, ɗif na a sɗa ɓa, fuŋ n’abai na Efesus ɗa a hlai n’e giɗimi tempel na wiiɗi alaw Artemis na amai woni kai ɗa a siya ɗa? Na a sɗa ɓa na te kɵasi amai war hlai n’amai par kai ɗa a siya ɗa?

³⁶Na ɓa hanɗa a wala zi sispai kai ɗa, tiki aga ki tiki hangalki azumai ta aŋ zi wala gaini pirmi kai.

³⁷Buri ɓa ɗai na tiki ki kiɗisi na ɗa, e zi wala na meefeŋ siɗi alawki kai, e tirkiti kaalai.

³⁸Na ɓa Demetriyus gaiɗi ɗai na e siɗi yelni rgini tempel, seŋ a na arbaɗi gaini ɗif ɗa mefeŋ na e ɗûkûliti sariya woni a na, abai na e tikiŋ ta aŋ ziti sariya kaw a na lai, a pɗem ɓa e ɗûûli.

³⁹Na ɓa seŋ zamai a na ɗa, aga mu kutunmu wuzani dingi na mu muluɗumu ɗa.

⁴⁰Buri ɓa, tumu aga mu kumusi seŋ pumu ɓa, mu piyumu na ɗa a fiki n’amai, buri ɓa wala ktai na mu kuɗumu mu yumumu tumu sini buri tipi na mu tupumu girna ɗa aŋ kai. Asakal na a muɗa hanɗa ya, a ɵiriɗi ɗai ɵar.