Read Mousgoum Sdaɗi Apostelai 2 Bible Online

Sdaɗi Apostelai 2 - Mousgoum bible

Sdaɗi Apostelai 2

¹Won hlai na mefeŋ na wiiɗi fet Paŋtekoste a cosi li, nagai paŋ e ɗifu gaini tipi warni hlai ktai.

²Tizaw suura a halasi amai war hlai n’amai par maini suura na wiini berber na gdaŋ nɵa. A halasi a viti dilimi n’e ɗi woɗi ta.

³Nagai e tili wala a sɗa maini elesni afu nɵa, a ɓurwa edi sini marni par, a sumna midiɗi ktai ktai paŋ.

⁴Seze-sɗik a viɗi gaini hlaiɗi paŋ, e tiki piɗi aŋ miɗi warni meme zamai zamai pini na Seze a siŋɗi aŋ miɗiŋ ɗa nɵa.

⁵Amma Yudeyakai na jrekai n’edi midini afti na zamai par e ɗifu aha warɗi Yeruzalem.

⁶Won hlai n’e ɵini suura n’aŋa wa ɗa, firiɗi ɗai viya e liwisi, e tûrli marwai buri e tili ɗa ɗif paŋ a ɵina ɓa e miɗiŋnisi ɗa war meme na wiini tar tar.

⁷E bindi hiyak, e siɗi wala n’e zi kai, e miɗi: ɗai n’e miɗi hanɗa e ɗi ɗai na Galeliya par paŋ kai ɗi?

⁸Kapai tumu a siya a siya paŋ a ɵinaŋ war meme na wiini tar tar ɗa, a za ɵa maɵa maɵa ɗa?

⁹Partekai, Medekai, Elamitekai, ɗai na Mezopotamiya par, na Yuda par, na Kapadokiya par, Pontus par, na Aziya par,

¹⁰na Fridiya par, na Paŋfiliya par, n’Egipte par, na Libiya na gobi gaiɗi Sirene par, gaiɗi ɗai na Rome par n’e hilisi a Yeruzalem aŋ zak.

¹¹Yudeyakai gaiɗi nagai n’e yimi pini yimi na wiiɗi Yudeyakai, Kretekai, Arapai paŋ, tumu mu ɵunumu e miɗi midini sda n’abakai na wiini Alaw war meme na wimu maɵa ɗa?

¹²Nagai paŋ e bindi hiyak, e siɗi wala n’e zi kai, e miɗi arbaɗi marɗi: Wala hanɗa a siŋka ɗa a maɗa?

¹³Zamai e ziɗi yewere, e miɗi: E vi ɗa gaini viŋ na nem.

¹⁴Nɵa Peter a ɗiya amai zaw gaiɗi na doogo pi ktai, a muɗa gaini wulani amai, a muɗa sini firiɗi ɗai maini nɵa: Tiki ɗai na Yudeya gaiki tiki paŋ na ki ɗa war Yeruzalem, ɵini seŋŋa pɗem, yimiŋ midiki pɗem lai ɓa:

¹⁵Ɗai hanɗa e ɗa gaini ciini ca maini na ki hiiniŋ na ɗa ɵa kai, buri mu ɗumu na ɗa ler ɵeeŋe na win i gorof par hai.

¹⁶Amma hanɗa a wala na ɗif na mini Alaw Yuwel a muɗasi midini ɓa:

¹⁷Alaw a muɗa: War mefeŋ na asakal ɗa, aga mu ma Sezeŋa midiɗi ɗai paŋ, aliki na maɵagai gaiɗi na falakai lai ɗa aga e miɗi war wûle war wûle na wiiɗi ɗai na mini Alaw, aliki na gawlakai ɗa, wala aga a siŋka arɗi, ɗaiki na walakai ɗa, weseŋ aga a piɵiɗi.

¹⁸Nkam, midiɗi bagakaiŋa na maɵagai gaiɗi na falakai war mefeŋ ni ɗa, aga mu ma Sezeŋa midiɗi, aga e miɗi war wûle na wiiɗi ɗai na mini Alaw.

¹⁹Aga mu za wazagai zi hila amai war hlai n’amai, wazagai zi siŋki azumai warɗi yai lai, aga mu hinasi fel gaini afu gaini ɗugul z'agiyiŋ.

²⁰Futi ɗa aga te bunda aŋ gegeŋ, tile ɗa aŋ fel lai, wuzani hlai na mefeŋ na wiini Epiɗ-ɗai a cosi ɗa, mefeŋ n’abai, na zuv gara hanɗa.

²¹Nɵa a siya a siya paŋ n’aga a yika yikini Epiɗ-ɗai mini ɗa, aga a kurɗa.

²²Ɗai na Izrayel, ɵini seŋ hanɗa, Yesu na Nazaret par, ɗif n’Alaw a ɵinaŋsi arbaki, a siŋkaŋ edi gaini wazagai zi hila, gaini wazagai zi siŋki n’abakai na a bunda ɗif hiyak lai, na a zaŋ gaini arbaki maini na tiki ki sɗiŋ ɗa nɵa.

²³Ɗif hanɗa, n’aŋ gaini si edi ta pini siɗi na wuze na wiini Alaw gaini seŋ n’aŋ gaini ɗiyi zaw ɗa, tiki ki fiɗiŋ edi, ki siŋ tiɗi ɗai n’e hûni Alaw kai ɗa e tûkiŋ amai sini luwuŋ zi dagra.

²⁴Alaw a ɵiyaŋsi amai, a plaŋsi edi mini gir na wiini mri par buri futi te sa sini mri aŋ blasi midini kai.

²⁵Buri David a muɗa edi midini maini nɵa: Mu tala Epiɗ-ɗai kûreɗ-kûreɗ wuzani ara, buri ɓa Ni a ni na a zna pa kapai wala a gigiɗaŋa kai.

²⁶Buri hanɗa agula t'aŋ warni firiyi, ma ɗa a va gaini firiyi lai, neŋ-sa maa aga a fana azumai war hlai waŋ war biyi na pini ɵeɗ.

²⁷Buri ɓa aga ku hinaŋa azumai warni hlai zi simni na wiiɗi ɗai zi mri kai, Tuku aga ku hina ɗifku na sɗik a hofa kai.

²⁸Tuku ku siŋkaŋa futi na wiini sunfa, aga ku vaŋa gaini firiyi pini simni na ku sumna gaya.

²⁹Tawalakaya, mu dara mu miɗiki gaini giriŋi kain hunai kaalai midini tiyimu David maini nɵa: A mra su, e piŋ tiɓ, yeɵni a na arbamu haa girna.

³⁰A naka ɗa a ɗif na mini Alaw, a sɗa ɓa Alaw a hini wala mini ɓa aga a tika ahini ktai midiɗi paramaini zi pay;

³¹A talasi ɵiyi n’amai na wiini Kristu wuzani hlai ba, a muɗa midini hanɗa lai, wan hlai na a muɗa ɓa: A hinasi azumai warni hlai zi simni na wiiɗi ɗai zi mri kai, neŋ-sini a hofa kaalai.

³²Yesu, Ni n’Alaw a ɵiyaŋsi amai ɗa, tiyi paŋ mi ɗi zaidakaini.

³³Alaw a sini rɗi n’amai, Api a sini Seze-sɗik na a za ha ɓ'aga a saŋ ɗa, a ma seze hanɗa edi ya, na ki ɗa tiliŋ lai, ki ɵiniŋ lai na ɗa a hanɗa.

³⁴David gaini midini dama ɗa a hala amai war hlai n’amai ɗa kai, amma ni dama a muɗa maini nɵa: Epiɗ-ɗai a muɗa sini Epiɗ-ɗaiŋa ɓa: Ku sumna warni hlaiŋa zi hormo,

³⁵Haa mu miliɗi gawku aŋ tubla na azumai pini buburni azuku.

³⁶A pɗem ɓa ɗai na Izrayel ɗa, e sɗiŋ edi gaglai ɓa Alaw ɗa a za Yesu na ki tûkûŋ amai sini luwuŋ zi dagra aŋ Epiɗ-ɗai, aŋ Kristu lai.

³⁷Asakal n’e ɵini seŋ hanɗa ya, agulɗi a ya warɗi, e miɗini wiini Peter gaiɗi Apostelai na zamai ɗa lai ɓa: Tawalakai kapai mi zi maɵa ɗa?

³⁸Peter a miɗiɗi: Ki bindi payaiki gamai, a siya, a siya paŋ a nava baptisme war yikini Yesu Kristu kapai tuwurni a nava girdi n’edi, asakal par aga ki nivi Seze-sɗik aŋ like.

³⁹Buri wala n’Alaw a za ha midini hanɗa, a na buriki tiki gaiɗi aliki, gaiɗi nagai n’e ɗisi gai gai n’e kiɗi e piɵi kai, n’EPIƊ-ƊAI Alaw na wimu aga a yikiɗisi ɗa lai.

⁴⁰A za zaida, a miɗiɗi seŋ zamai-zamai viya, a siɗi arai-zi-pi lai a muɗa: Pri edi wuzani vunaɗi ɗai na maafanai zi ɵipiti seŋ hanɗa.

⁴¹Nagai n’e yimi seŋni ɗa e nivi baptisme, mefeŋni ɗa, ɗai n’e yimisi hahakai ɗa e zi gobi dubu hu.

⁴²War hitrai na wiiɗi Apostelai, war bonu zi tawal, war ɓrawni simi, gaini hlai zi siiwa lai ɗa, ɗif a hinasi edi kai.

⁴³Ɗai paŋ hunai te yimiɗi paŋ, Apostelai e zi wazagai zi hila gaini zi siŋki viya.

⁴⁴Ɗai zi yimi ɗa paŋ e ɗifu war hlai ktai, e tipip wazagaiɗi paŋ war hlai ktai lai.

⁴⁵E wûri wazagaiɗi paŋ edi, dalamɗi gaini vuwaiɗi lai, farai na e niviŋsi ɗa e ɓûrwiŋ arbaɗi, e si sini a siya ɗi paŋ pini hazani hazani.

⁴⁶Mefeŋ paŋ e ɓûrwi gaini tempel ɗa kai, miɗi ktai, e simi ɗa aŋ bonu aha war dalam dalam, e simi simiɗi gaini firiyi, gaini kûlini-si warɗi kai.

⁴⁷E kûli Alaw, ɗai paŋ e firyiɗi paŋ, mefeŋ paŋ ɗa, Epiɗ-ɗai a kiɗisi ɗai n’e ɗa kûri ɗa siɗi zi yimi sek sek.