Read Mousgoum Sdaɗi Apostelai 20 Bible Online

Sdaɗi Apostelai 20 - Mousgoum bible

Sdaɗi Apostelai 20

¹Won hlai na dûrgûzi a tika azumai li, Paulus a yikiɗisi ɗai zi hitri a siɗi arai-zi-pi. Asakal na a siɗi arai-zi-pi ya, a ɵiɓiɗi wuti na asakal lai, a ɓurwa gaiɗi a hala war Makedoniya.

²Won hlai na a vuga midini afti ni ɗaw, a sa arai-zi-pi viya wiiɗi ɗai, asakal par a hala war Gres.

³A za woni tile hu, a firiya ɓa a hala gaini hulum war Siriya, amma Yudeyakai e rgi miɗi midini buri e yimiŋ nɵa a waya war Makzdoniya pra.

⁴Ɗai n’e ɗa gaini e ɗi miɗi: Sopater n’ahini Piros na Bere par, Aristarkus gaini Sekundus na Tesalonik par, Gayus na Derbe par, Timotewus gaini Tikekus, gaini Trofimus na war Aziya par lai.

⁵Ɗai hanɗa e hilisika wuzayi, e biyiyika war Trowas.

⁶Amma tiyi ɗa asakalni mefeŋ na wiini peŋ na gaini is arni kai ɗa, mi niyi warni hulum aŋ hili war Filip, haa mi cû siɗi ta ɗa, mi zi mefeŋ warɗi futi ɵim, woni mi simni mefeŋ muguzak lai.

⁷War mefeŋ n’avut na wiini kosku ɗa, a dara a dimas ɗa, mi ɗifu gaini tipi tap burini ɓirwini peŋ. Paulus a firiya a hala dawaini ɗa, nɵa a hina aŋ haɗa kalaŋ gaiɗi, a sirɓa haa duvuk n’arba.

⁸Warɗi dilimi na amai na mi ɗa warɗi ɗa, lampakai a nafu viya.

⁹Gawla ktai yikini E tikus a nafu amai arni fenetir dam, weseŋ n’abai a yimaŋ, wan hlai na Paulus a na haɗa kalaŋni wuzani sek ɗa, weseŋ a suwa gdaŋni li ɗa a kɵasi amai warni etas n’ag'aŋ hu par, wan hlai n’e hili aŋ yimiŋ amai ɗa e niviŋ gaini mri su.

¹⁰Nɵa Paulus a niyasi azumai, a purmasi sini sek a tikaŋ amai war tini, asakal par a muɗa: Ki hûwiyi siki kai, a na karni.

¹¹Won hlai na a waya li amai ɗa, a ɗukla peŋ aŋ lumaŋ, asakal par a hala wuzani gaini kalaŋ ɗa ɵa haa gorof n’abai, asakal par a hala.

¹²E kisi aruwagwi ɗa anene karni, wala hanɗa a sa arai-zi-pi abai gara wiiɗi ɗai.

¹³Amma tiyi ɗa mi niyiɗi warni hulum avut aŋ hili war Asus buri mi niviŋɗi woni, a firiya a vugaɗi amai gdaŋ ɗaw.

¹⁴Won hlai na a coɗi siɗi ya, mi tikiŋ amai piyi aŋ hili war Mitilene.

¹⁵Woni par mi hili agoɗom ɵa ɗaw, dawaini ɗa mi cû war Kiyos, mefeŋ n’ag'aŋ sulu ɗa mi cûwar Samos, mefeŋ n’ag'aŋ hu ɗa mi cû a Miletus lai.

¹⁶Buri ɓa Paulus a rga warni buri a vuga a agoɗom miɗi Efesus ɗaw kapai a ba hlai edi warɗi Aziya kir kai. A purma nɵa kapai na ɓa a sɗa aŋ ɗa a co warɗi Yeruzalem war mefeŋ na wiiɗi fet pantekoste ɗa.

¹⁷War Miletus par a ɵina war Efesus aŋ yikiɗisi abakaiɗi tipi paŋ;

¹⁸Won hlai n’e cûsi sini li ɗa a miɗiɗi: Tiki ɗa, ki siɗi payai na mu paya arbaki ɗa edi gaglai, mefeŋ na mu fana arbaki na ta ɗa, haa sini mefeŋ n’avut na mu tikasi aza midini afti na Aziya par.

¹⁹Mu za sdani Epiɗ-ɗai maini bege nɵa, war hûsi, warni tuwi, arbani gir zamai zamai na a za sa pini kitini-mi na wiiɗi Yudeyakai.

²⁰Mu ŋoya wala ktai kai zaŋ, wazagai na pɗamai ta ta mu miɗiki edi midini, mu hitriki edi papɗak, aha war dalam lai.

²¹Mu gidiɗi Yudeyakai gaiɗi grekkai lai buri e bindi payaiɗi gamai, e bindisi arɗi sini Alaw sek, e yimi war Epiɗ-ɗai Yesu lai.

²²Ta tiyana ɗa Seze a nag'aŋa li, mu dara mu hala war Yeruzalem, mu sɗa wala n’aga a za sa woni ɗa kai.

²³Amma warni fuŋ n’abakai ta ta na mu vuga woni ɗa paŋ ɗa, Seze-sɗik a na siŋkaŋa ɓa, jaɓ gaini gir a na bayaŋa woni.

²⁴Amma gaini hanɗa paŋ, mu tala sunfaŋa maini wala kadai nɵa, mu talaŋ maini wala na wirini caŋ gara nɵa kai? Pɗemni ɓa mu daba luwiŋa gaini ɵeŋ na Epiɗ-ɗai Yesu a saŋ war ta ɗa, a dara a muɗa, mu muɗa edi midini labar na pɗem na wiini yum na wiini Alaw.

²⁵Tiyana ɗa, ta mu sɗa edi gaglai, tiki aga ki tiliŋa kir kai, tiki paŋ na mu vuga arbaki aŋ ɓikiti pay.

²⁶Buri nɵa mu miɗiŋki edi gaglai girna, felni ɗif a zilba wula kai,

²⁷na Alaw a kataŋsi paŋ ɗa, mu miɗiŋki edi kafa, mu ŋoya wala ktai maa pini kai.

²⁸Buri nɵa ki giɗimi siki dama pɗem, ki giɗimi fara na Seze-sɗik a virikisi arbani par kapai a ziki aŋ abakai zi gɗam ɗa, ki giɗimi tipi na wiini Alaw pɗem, tipi na Ni a wuraŋ gaini felni dama.

²⁹Ta mu sɗa edi gaglai ɓa, wan hlai na mu hala li ɗaw ɗa, belemke na maafanai aga a niyasi arbaki, aga a ɵaraŋ edi,

³⁰arbaki tiki par maa, ɗai zamai aga e fiki amai, aga e ɓiki seŋ na jre kai aŋ miliɗi ɗai zi hitri piɗi.

³¹Buri nɵa, ki simni karki, ki hini midiki a kɵa lai ɓa, haa buza hu duvuk gaini girvudi paŋ sa aŋ gidiki gaini tuwi.

³²Tiyana ɗa mu hiniki war tini Alaw, war seŋni zi yum ɗa lai, na spakni a na buri a rga wala, buri a sa bulum wiiɗi nagai na Sɗik paŋ lai.

³³Mu za suuna sini arzaŋ, zaw or, zaw sapa na wiini ɗif kai;

³⁴hazaŋa ta lai, gaini na wiiɗi mara na pa lai, mu za gaini gdaŋŋa kapai a va amai.

³⁵War wazagai paŋ mu siŋkiki edi gaglai ɓa, a dara ɓa ɗif a za sda kapai a zna piɗi na hurafai lai, pini seŋ n’EPIƊ-ƊAI Yesu a muɗaŋ gaini mini dama ɓa: Ɓiki aŋ midini ni na a sa tini edi, a suwa ni n’e sini wala gaini si ɗa.

³⁶Asakal na a muɗa hanɗa ya, a pa kurnaini azumai aŋ siiwa gaiɗi paŋ.

³⁷Nagai paŋ e tûwi gara, e ɵi marava siɗi, e kɵi amai wulani pawlus e sisiɓi mini lai.

³⁸Agulɗi a kwima a suwa paŋ buri a miɗiɗi ɓa aga e tiliŋ kir kai ɗa. Asakal par e kiini pini haa a agoɗom mini hulum n’abai ɗa ta.