Read Mousgoum Sdaɗi Apostelai 21 Bible Online

Sdaɗi Apostelai 21 - Mousgoum bible

Sdaɗi Apostelai 21

¹Asakal na mi ɓirwisi gaiɗi li, mi hili cir war Kos, dawaini ɗa mi hili a Rodes, woni par mi hili a Patara.

²Mi nivi hulum n’abai ktai na a ka ɗai war Tenisiya sek mi niyi warni, mi tiki edi lai.

³Won hlai na aryi a mula gaiɗi kiprus, mi hiniti war tiyi na muni sek ta, mi hili a Siriya sek, mi yimi amai a Tirus war hlai na hulum ɗa a hina zakni woni ɗa.

⁴Won hlai na mi niviɗi ɗai zi hitri ɗa, mi simni woni mefeŋ muguzak, Seze a hûgûɗi aŋ miɗini wiini Paulus aŋ hala amai a Yeruzalem kai.

⁵Amma wan hlai na simniyi na gaiɗi a vada li ɗa, mi fiki mi hili, ɗai paŋ e kiyi piyi edi, falakai gaiɗi aliyagoi lai. Mi niyi edi warni fuŋ n’abai ɗa par, a agoɗom wulani daŋ mi hûrgi azumai aŋ siiwi gaiɗi.

⁶Asakal par wan hlai na mi ɓûrwi li gaiɗi ɗa, mi niyi warni hulum n’abai, nagai e wiyi ahaɗi sek lai.

⁷Amma tiyi ɗa, mi hili wuzayi gaiɗi morkoiyi ɗa, a Tirus par mi hili war Potemais. Woni mi ɵiɓiɗi wuti wiiɗi tawalakai, mi simni gaiɗi mefeŋ ktai lai.

⁸Dawaini mi hili woni par, mi cû war sezareya, mi hili aha war dalamni Filipi, Filip n’aŋa ɓaka labar na pɗem, a ktai arbaɗi na muguzak ɗa lai na mi simni ahani.

⁹Alini na falakai e ɗa puɗu n’e miɗi seŋ na wuze,

¹⁰wan hlai na mi ɗa woni haa mi zi mefeŋ yaw ɗa, ɗif na mini alaw ktai yikini Agabus a halasi amai a Yudeya par,

¹¹a halasi siyi a mula santir na wiini Paulus ɗa, a rga tini gaini ezini gaini asakal par, a muɗa: Seze Sɗik a na muɗa maini nɵa: Epini gezani santir hanɗa, Yudeyakai aga e nigiŋ maini hanɗa ɵa war Yeruzalem, aga e siŋ edi tiɗi pini ziba na zamai.

¹²Won hlai na mi ɵini seŋ hanɗa, tiyi gaiɗi nagai na warni hlai ni ɗa, mi siiwi Paulus buri a hala amai a Yeruzalem kai.

¹³Paulus a waya seŋ a miɗiɗi: Ki miliŋa sirdaiŋa lai buri maɗa? Ta ɗa mu sa sa buri rgi n’e rgiŋa ktai kai, amma aŋ mra edi lai burini yikini Epiɗ-ɗai Yesu Kristu war Yeruzalem.

¹⁴Won hlai na mi tili haa a yima seŋyi kai ɗa, mi pini mini kir kai, mi miɗini ɓa, a zuva ɓa dirini Epiɗ-ɗai a va amai.

¹⁵Asakal mefeŋ hanɗa par ɗa, tiyi mi zizini siyi mi hili amai a Yeruzalem,

¹⁶ɗai zi hitri zamai e hilisi gaiyi a Seazriya par lai aŋ kiyi piyi warni hlai na mi simni woni ɗa, ahani ɗif ktai na yikini ɓa: Mnason na Kiprus par, ni a ɗif zi hitri haa ɗipar.

¹⁷Won hlai na mi cû a Yeruzalem ɗa, tawalakai e yimiyi siɗi gaini firiyi.

¹⁸Dawaini ɗa, Paulus a hala gaiyi ahani Yakob, abakaiɗi tipi paŋ e hili paŋ lai.

¹⁹A ɵiɓiɗi wuti, a tika pini aŋ miɗiɗi midini wala na Alaw a zaŋ gaini war ɵeŋni n’edi arbaɗi pini zibaɗi ɗai na zamai ɗa.

²⁰Asakal n’e ɵini seŋ na mini par ya ɗa, e si kol sini Alaw e miɗini: Tala haw le, tawal! Yudeyakai dubu dubu viya e bindi aŋ ɗai zi yimi, amma e yimi gadai zi ɗû na wiiɗi ɗa tiɗi gdaŋ.

²¹E yimiŋɗi midiɗi ɓa, hitri na ku hitra na ɗa, ku firiya ɓa ku ziɗi piɗi Yudeyakai n’e ɗa edi arbaɗi pini ziba na zamai ɗa buri e hini gadai na wiini Musus ɗa edi, aga ku miɗiɗi ɓa e ɵi gûrgûle wiiɗi aliyagoi kaalai, e zi pini de ɗa kaalai.

²²Kapai mu zumu maɵa ɗa, buri aga e ɵini ɓa ku halasi ɗaw.

²³Nɵa n’aga mi muɗuŋku ɗa, ɗai e ɗa arbayi puɗu n’e hi wala miɗi tapa gaiɗi,

²⁴ku yikiɗi ta, ku za suku edi aŋ hilu gaiɗi paŋ, midiɗi zi fiɗi edi ɗa, ku yima vrakni suku. Nɵa ɗai paŋ aga e siɗi ɓa, wala ktai na jre war seŋ n’e miɗiŋɗi muduku ɗa aŋ kai. Amma tuku lai aga ku paya maini ɗif n’aŋa za pini gadai nɵa lai.

²⁵Amma wiiɗi ɗai na war pini zibaɗi ɗai na zamai n’e bindi aŋ ɗai zi yimi ɗa, a tala aryi pɗem ɓa: Mi gidiɗi buri e ɗili siɗi aŋ limi neŋni wazagai n’e fiɗiŋ wiini alawai zi rgi kai, e simi fel kai, e limi wazagai n’e rûziŋ gaini rûzi kai, e zi maɵara kaalai.

²⁶Dawaini ɗa, Paulus a miliɗi ɗai nagai ɗa, a za sini edi aŋ hilu gaiɗi, a hala warni tempel aŋ muɗa edi midini mefeŋ na wiini zi n’edi aŋ hilu ɗa, gaini ɓaka n’aga e ziŋ buriɗi ktai ktai paŋ lai.

²⁷Sini vidini mefeŋ na muguzak ɗa, Yudeyakai na war Aziya par n’e tiliŋ amlai warni tempel ɗa, e yikiɗi ɗai amlai sini e yimiŋ.

²⁸E ɗûûli e miɗi: Ɗai na Izrayel hilisi zini piyi! Hanɗa a ɗif n’aŋa hitra wiiɗi ɗai paŋ, war hlai paŋ lai, seŋ na meefeŋ siɗi ɗaimu, sini gadai zi ɗû, sini hlai hanɗa lai. Maa a kiɗisi grekai amlai warni hlai hanɗa, a bunda hlai na sɗik hanɗa aŋ hlai na hihir pla.

²⁹Buri wuzani hlai par e tili Trofumus na Efesus par ɗa gaini warni fuŋ n’abai ɗa blaŋ, e hiini ɓa Paulus a kaŋ amlai warni tempel ɗa ta ɗi?

³⁰Fuŋ n’abai ɗa paŋ a muguza paŋ, ɗai e liwi warni hlai paŋ par. E yimi Paulus e sipiŋ edi warni tempel ɗa par, e dûgi mini hlai amai tizaw lai.

³¹Won hlai n’e ɗa e piyiŋ aŋ fiɗiŋ edi ɗa, labar a cosi sini abaiɗi askarai na midini vok ɗa ɓa fuŋ n’abai na Yeruzalem ɗa aŋ war dûrgûzi

³²Ɗif hanɗa a miliɗi askarai pini witaw tar gaiɗi abakaiɗi askarai na! ɗa piɗi miya ɗaw ɗaw lai, a purma woni sek gaini luwi. Won hlai n’e tili abaiɗi askarai gaiɗi askarai pini lai ɗa, e ɵiɓi Paulus kir kai.

³³Nɵa abaiɗi askarai a halasi sini, a yimaŋ, a sa miɗi buri e rgiŋ gaini jaɓ sulu, asakal par a zilba ɓa ni ɗa a siya ɗa? A za ɗa a maɗa?

³⁴Arbani firi par ɗa, zamai e ɗûûli na zaw, zamai e ɗûûli na zaw lai, wala ktai na a yima midini nɵa aŋ kai burini dûgûzi ɗa. A sa miɗi ɓa, e kiŋ war daŋgai.

³⁵Won hlai n’e cûgobi mini azi n’e tiki eziɗi midini ɗa, askarai e tikiŋ gaini tiki amai ɗaw burini rimi na firiɗi ɗai e rimisi aŋ yimiŋ ɗa.

³⁶Buri firiɗi ɗai n’e firi pini ɗa, e ɗûûli maini nɵa: Fiɗiŋ edi.

³⁷Won hlai n’e diri e ɵi Paulus amlai warɗi daŋgai ɗa, e miɗini wiini abaiɗi askarai ɗa ɓa: Mu kiɗa aŋ muɗuku seŋ ktai ɗi? Ɗif n’abai a waya seŋ a miɗini: Ku muɗa grek lai ɗi?

³⁸Tuku ɗa ku ɗif na Egipte par, na gobi na a faka ɗa amai, na a mula askarai pini dubu puɗu a hala gaiɗi edi warni basga na kaɗataŋ kai ɗi?

³⁹Paulus a waya seŋ a miɗini: Ta ɗa mu ɗif na Yudeya, na Tarsis, na war Kilikiya par, ɗif na war fuŋ n’abai na yikini a wa gara ɗa par. Mu siiwuku buri ku saŋa futi aŋ miɗiɗi wiiɗi ɗai ɗa agwi.

⁴⁰Abaiɗi askarai a sini futi, Paulus a ɗiya amai midini azi n’e tiki eziɗi midini ɗa zaw, a huda tini wiiɗi ɗai, suura a tika azumai hiyak, nɵa a tika pini a muɗa siɗi war seŋɗi Hebrekai, a muɗa: