Read Mousgoum Sdaɗi Apostelai 22 Bible Online

Sdaɗi Apostelai 22 - Mousgoum bible

Sdaɗi Apostelai 22

¹Tawalakaya lai, tamaya lai, tiyana ɵini jreŋa na mu dara mu miɗiŋki edi ɗa,

²Won hlai n’e tili ɓa a miɗiɗi war seŋɗi Hebrekai ɗa, e simni hiyak e zibiri a suwa pra, a muɗa:

³Ta ɗa mu ɗif na Yudeya, mu wa war Tarsis na Kilikiya, amma mu wula amai war fuŋ n’abai hanɗa, mu hitra pini Gamaliyel war zi na pini gadai na gdaŋ na wiiɗi tamaimu. Mu dara Alaw abai gara maini na tiki ki diriŋ girna na ɗa ɵa.

⁴Mu ziɗi gir wiiɗi nagai n’e tikiti futi pini Yesu ɗa haa zamai e nivi mri n’edi, mu yimiɗisi maɵagai gaiɗi falakai, zamai mu pûkûɗi war daŋgai.

⁵Pai zi ɓaka n’abai gaiɗi n’abakai n’arbaɗi ɗai ɗa e kiɗi e zi zaida mada, maa e siŋa letre buri mu hala piɗi tawalakai na war Damaskus aŋ yimiɗisi; mu hala woni buri mu yimiɗisi nagai n’e ɗa woni, mu kiɗisi a Yeruzalem kapai e ziɗi gir arɗi.

⁶Mu nafu warɗi futi, mu ŋasi gobi aha miɗi Damaskus, wan hlai na tizaw, gobi gaini girvudi gaglai n’abai a halasi warni hlai n’amai par a gunaŋa gaini wilɗi.

⁷Mu kɵa azumai, mu ɵina wûle ktai a muɗaŋa maini nɵa: Sawlus, Sawlus, ku zaŋa gir ara buri maɗa?

⁸Mu waya seŋ mu miɗini: Tuku ku siya ɗa, Epiɗ-ɗai. A muɗaŋa: Ta ɗa, mu Yesu na Nazaret, na ku zini gir arni na ɗa.

⁹Nagai n’e ɗika gaya ɗa, e tili gaglai ɗa, amma e ɵini wulani Ni n’aŋa muɗa gaya kai.

¹⁰Nɵa mu muɗa, aga mu za ɗa a maɗa Epiɗ-ɗai? Epiɗ-ɗai a muɗaŋa: Faka amai ku hala war Damaskus, woni aga e muɗuku midini wala n’aga ku zaŋ ɗa.

¹¹Won hlai na ara a tala kir kai burini wilɗi na a wulɗa ɗa, nagai n’e ɗa gaya e yimiŋa ta, e gidiyiŋa, mu co war damaskus lai.

¹²Nɵa ɗif ktai yikini Ananiyas, a ɗif na jre pini gadai, Yudeyakai n’e ɗa woni e miɗi zaida na pɗem midini.

¹³A halasi sa a muɗaŋa: Sawlus tawala, nava tiliku. War hlai ni tizaw ara a mala edi, mu talaŋ lai.

¹⁴A muɗa: Alaw na wiiɗi tamaimu a vurukusi edi gamai par ɓa kapai ku za dirini, ku sɗa Yesu na jre, ku ɵina seŋ na a niyasi mini par lai,

¹⁵buri ku za aŋ zaida na wiini wuzaɗi pini zibaɗi ɗai paŋ midini wala na ku talaŋ, na ku ɵinaŋ lai.

¹⁶Tiyana ɗa, ba hlai edi kir kai, fakasi amai, tuwa sini Yesu ɗa, kapai ku nava baptisme, tuwurku ɗa a nava girdi n’edi lai.

¹⁷Won hlai na mu wayasi a Yeruzalem, mefeŋ ktai mu na siiwa amlai warni tempel ɗa, mu tala sa war seze,

¹⁸Epiɗ-ɗai a siŋka sini ara a muɗaŋa: Yima suku edi warɗi Yeruzalem par witaw, buri aga e yimi zaidaku na ku zaŋ mada ɗa kai.

¹⁹Ta mu miɗini: Epiɗ-ɗai, nagai e siɗi edi gaglai ɓa, mu naka mu hala war sinagogne blaŋ blaŋ, nagai n’e yimi warku ɗa, mu yimiɗi, mu ɵiɓiɗi, mu pûkûɗi war daŋgai lai.

²⁰Won hlai n’e mi felni Stefanus edi ɗa, ta mu nafu war hiini na wiiɗi lai, sapaɗi nagai n’e fiɗiŋ ɗa mu giɗimaŋ muta.

²¹Nɵa, a muɗaŋa: Hala ta aga mu ɵunuku gai gai siɗi pini zibaɗi ɗai na zamai.

²²E zibiri seŋni haa sini seŋ ni ta, amma asakal par e ɗûûli gaini wulaɗi amai e miɗi: Ɗif na maini hanɗa ɵa ɗa e hiniŋ karni kai.

²³E ɗûûli, e pûkû sapa na siɗi edi, e pûkû alogodo amai lai.

²⁴Abaiɗi askarai a sa miɗi buri e wiŋ amlai warɗi daŋgai, e ɵiɓiŋ lai kapai a muɗa, kapai e siɗi wala na ɗai e ɗûûli pini midini ɗa.

²⁵Won hlai n’e ɗa rgiŋ ɓa kapai e ɵiɓiŋ ɗa, Paulus a miɗini wiini abaiɗi askarai na ɗai pini miya ktai na a na zaw ɗa ɓa: Futi te sa siki buri ki ɵiɓi ɗif na Rome na sariya te ɗukla midini kai hai ɗa ɗi?,

²⁶Won hlai na a ɵina hanɗa, abaiɗi askaraina ɗai pini miya ɗaw a hala a miɗini wiini abaiɗi askarai ɓa: Kapai mu za maɵa ɗa, ɗif hanɗa a ɗif na Rome ɗa koo?

²⁷Nɵa, abaiɗi askarai a halasi a zilbaŋ a miɗini: Muɗaŋa haw, tuku ɗa ku ɗif na Rome fakat fakat ɗi? A waya seŋ a miɗini: Nkam.

²⁸Abaiɗi askarai a waya a miɗini: Ta ɗa, mu vurga farai viya haw kapai mu yika ɓa mu ɗif na Rome. Paulus a muɗa: Ta ɗa mu wa gaini wi.

²⁹Won hlai ni tizaw, nagai n’e zilbini mini ɗa e yimi siɗi edi, abaiɗi askarai hunai a yimaŋ buri a sɗa ɓa a milini jaɓ na ɗa tini ɗif na Rome.

³⁰Dawaini ɗa, wan hlai na a dara a sɗa wala na Yudeyakai e ɗa pini seŋ midini Paulus pini ɗa, abaiɗi askarai a sa miɗi buri e mili jaɓ na tini edi. A miɗiɗi wiiɗi paakai n’abakai zi ɓaka buri e zi dingi, asakal par a yikasi Paulus a kaŋsi arbaɗi zaw.