Read Mousgoum Sdaɗi Apostelai 23 Bible Online

Sdaɗi Apostelai 23 - Mousgoum bible

Sdaɗi Apostelai 23

¹Paulus a mula arni siɗi ɗai zi kiti seŋ ɗa a muɗa: Tawalakaya, ta ɗa mu paya wuzani Alaw haa girna, hiiniŋa a pa seŋ ktai mada kai.

²Ananiyas pai n’abai a sa futi wiiɗi ɗai n’e ɗa ɵimani gobi ɗa buri e ɵiɓi mini.

³Nɵa Paulus a miɗini: Aga a ɵuɓuku ɗa a Alaw, tuku zilagay na gaini ɵirɓi muɗukwi, ku sumna azumai ɗa ɓa ku zaŋa sariya pini seŋ zi gadai ɗa kir kai, ku ɵiɓaŋa ɗa a ɵiɓi, gadai ɗa a muɗa ɵa ɗi?

⁴Nagai n’e ɗa ca ca e miɗini: Ku tirka na ɗa a pai n’abai zi ɓaka na wiini Alaw ɗa.

⁵Paulus a waya seŋ a muɗa: Tawalakaya, mu sɗa ɓa hanɗa a pai n’abai zi ɓaka ɗa, mu sɗa ɵa kai, buri aŋ gaini ɗû ɓa: Ku muɗa wala na meefeŋ sini abaiɗi ɗaiku kai.

⁶Won hlai na a sɗa ɓa ɗai n’e diŋgisi ɗa gailɗi ktai e ɗi Sadusekai, gaɗi na zamai ɗa e ɗi Farisekai lai ɗa, Paulus a tika pini a ɗuula wuzaɗi ɗai zi kiti seŋ maini nɵa: Tawalakaya, ta ɗa, mu Farise, m’ahiɗi Farisekai lai. Na ɓa m’aŋ warni sariya girna ɗa, a za na ɗa burini biyi na pini ɵeɗ gaini ɵiyi n’amai na wiiɗi ɗai zi mri ɗa.

⁷Won hlai na a muɗa hanɗa ya ɗa, sispai a faka arbaɗi Farisekai gaiɗi Sadusekai, ɓraw a za arbaɗi firi lai.

⁸Buri Sadusekai e yimi ɗa ɓa, ɵiyi n’amai aŋ kai, ɗai zi ɵeŋ na warni fuŋni Alaw e ɗi kaalai, Seze aŋ kaalai. Amma Yudeyakai e yimi ɗa ɓa wazagai hanɗa paŋ a na.

⁹Suura n’abai a faka amai, ɗai zamai arbaɗi ɗai zi ɗû wazagai war vok na wiiɗi Farisekai par e fikisi amai, e pi edi gdaŋ kaŋ, e miɗi: Tiyi mi tili wala ktai na meefeŋ sini ɗif hanɗa kai, ablaŋtaŋkai ɗa, ɗif zi ɵeŋ a kiɗa a muɗa gaini, hanɗa a kiɗa a za.

¹⁰Won hlai na abaiɗi askarai a tala sispai n’arbaɗi a na riya amai wuzani sek sek ɗa, a huna ɓa aga e ɗûkli Paulus edi daf daf, nɵa a ɵiniɗi askarai buri e niyi azumai arbaɗi, e yimiŋsi edi, e kiŋ amlai warɗi daŋgai.

¹¹Dawaini ɗa war duvuk, Epiɗ-ɗai a halasi a ɗiya wuzani a miɗini: Pa arku, zaida na ku zaŋ mada war Yeruzalem, ku hala ku zaŋ mada war Rome lai.

¹²Won hlai na hlai a sɗa li edi ɗa, Yudeyakai e rgi miɗi, e hi wala miɗi ɓa: E simi wala kaalai, e ci wala kaalai haa e fiɗi Paulus haw, ɵa kai ɗa tusa a sumna midiɗi.

¹³Ɗai na e hi wala miɗi ɗa, e sûwi ɗai doogo-doogo-puɗu.

¹⁴E hili siɗi paakai n’abakai zi ɓaka gaiɗi abakai n’arbaɗi ɗai lai aŋ ziɗi zaida ɓa: Tiyi mi hi wala miyi ɓa, mi simi wala kai haa mi fiɗi Paulus edi su haw, ɵa kai ɗa tusa a sumna midiyi.

¹⁵Nɵa tiyana ɗa, tiki gaiɗi ɗai zi kiti seŋ ɗa, ki kiti miki ta, ki ɵini sini abaiɗi askarai gaini miɗi na a kiɗa a hogoŋ aŋ ɵinasi Paulus wuzaki, maini na ɓa ki firiyi ki tili seŋni edi gaglai a suwa. Won hlai na a fakasi li aŋ hili ɗa, tiyi aga mi biyiŋka war futi mi fiɗiŋ edi, mi hiniŋ a kiɗaɗi siki kai.

¹⁶Amma ahiɗi tawalni pawlus a ɵina seŋ n’e kitiŋ ɗa ba, a hala warɗi daŋgai, a niya amlai sini Paulus a sini labar hanɗa.

¹⁷Paulus a yikasi ktai arbaɗi abakaiɗi askarai na ɗai piɗi miya ɗaw ɗaw ɗa a miɗiɗi: Kiini pini gawla hanɗa sini abaiɗi askarai buri labar ktai aŋ mini buri a miɗiŋni.

¹⁸Abaiɗi askarai na ɗai pini miya ɗaw ɗa, a yimaŋ a kiŋni wiini abaiɗi askarai a miɗini: Ɗif zi daŋgai n’e yikiŋ ɓa Paulus ɗa, a yikaŋa, a muɗaŋa ɓa mu kasi gawla hanɗa suku buri seŋ aŋ mini a dara a muɗuŋku.

¹⁹Abaiɗi askarai a yimaŋ tini kaai, a yima sini edi war baŋa gaini a zilbaŋ: Labar na ku dara ku muɗaŋa ɗa a na wata ɗa?

²⁰A waya seŋ a miɗini: Yudeyakai e kitisi miɗi ta, e firiyi ɓa dawai ɗa e hilisi e zilbuku ta ku ɵinaɗi Paulus wuzaɗi Paulus wuzaɗi ɗai zi kiti seŋ ɗa, maini na ɓa e firiyi e tili seŋni edi gaglai a suwa katawai pra ɵa.

²¹Nɵa, tuku ɗa, ku yima seŋɗi kai, buri ɓa arbaɗi par ɗa, ɗai e sûwi doogo-doogo-puɗu e kitisi miɗi ta aŋ riɓtiŋ, nagai e hi wala miɗi ɓa: E simi kaalai, e ci kaalai haa e fiɗiŋ edi su haw, ɵa kai ɗa tusa a sumna midiɗi. Tiyana par e ɗi na siɗi gaini zizini ta, e biyi na ɗa a ha na muku par ɗa.

²²Abaiɗi askarai a tikini pini gawla ɗa, a gidini mini buri a muɗa seŋ na a miɗiŋni na ɗa edi wiini ɗif kai.

²³Asakal par, abaiɗi askarai a yikiɗisi abakaiɗi askarai na ɗai piɗi miya ɗaw ɗaw sulu, a miɗiɗi: Ki mili askarai miya sulu, ɗai zi plasai doogo-doogo-mugzak, ɗai zi kawakai miya sulu lai, e zizini siɗi buri ɓa sa ɵeeŋe na duvuk ɗa, e hili war Sezare.

²⁴Ki zizini plasai kapai ki tiki Paulus duɓani aŋ kiŋ jam wuzani Lawan Feliks lai.

²⁵A ɗûti letre wiini Feliks, seŋ na warɗi a na maini nɵa:

²⁶Klodiyus Liziyas, a na ɵiɓini wuti wiini Lawan Feliks, ku na jam hek ɗi?

²⁷Ɗif hanɗa, Yudeyakai e yimiŋ kaai, e diri e fiɗiŋ edi, nɵa mu hala gaiɗi askarai pa lai mu plaŋsi edi tiɗi par su, mu ɵina ɓa a ɗif na Rome par,

²⁸mu firiya ɓa mu ɵina wala na e pi seŋ midini pini ɗa, nɵa mu ɵinaŋ wuzaɗi ɗai zi kiti seŋ na wiiɗi.

²⁹Mu navaŋ ɓa, seŋ na e piŋ midini ɗa, a sispai na a za burini gadai na wiiɗi, amma seŋ ktai na a kiɗa a suma daŋgai pini, zaw a nava fiɗi n’edi burini nɵa aŋ kai.

³⁰Mu ɵina labar ɓa ɗif hanɗa, ɗai e kitisi miɗi midini ta kapai e fiɗiŋ edi, nɵa mu na ɵunuŋkuɗi girna tar, mu miɗiɗi wiiɗi nagai n’e ɗa pi seŋ midini ɗa, buri e hiliɗi e ziti sariyaɗi ɗa wuzaku sek.

³¹Askarai pini gadai na e niviŋ ɗa, e tiki Paulus e hili gaini duvuk haa war Antipatris.

³²Dawaini ɗa, e hiniɗi ɗai zi plasai ɗa e hili gaini, amma nagai na zamai ɗa e wiyisi aha miɗi daŋgai ɗa.

³³Won hlai n’e cû war Sezare ɗa, ɗai n’e hili gaini e sitini letre ɗa wiini Lawan ɗa ta, e siŋkini Paulus ɗa ta lai.

³⁴Won hlai na a ŋiti letre ɗa ta ɗa, Lawan a zilba ɓa: A na midini afti na wata par ɗa? Won hlai na a ɵina ɓa a na a Kilikiya par par,

³⁵a muɗa: Aga mu zulbuku wan hlai na ɗai n’e pi seŋ muduku e cûsi li ɗa. A sa miɗi buri e giɗimiŋ aha war dalam na wiini pai Herod n’abai.