Read Mousgoum Sdaɗi Apostelai 24 Bible Online

Sdaɗi Apostelai 24 - Mousgoum bible

Sdaɗi Apostelai 24

¹Mefeŋ ɵim asakal par, Ananiyas pai n’abai zi ɓaka a cosi a Sezareya, gaiɗi n’abakai n’arbaɗi ɗai gaini avoka n’e yikiŋ ɓa Tertilus ɗa pini. E hilisi aŋ pi seŋ midini Paulus wuzani Lawan.

²E yikisi Paulus. Tertilus a tika pini aŋ muɗa wuzani Felikse ɗa maini nɵa: Ɗif n’abai, tiyi mi simni jam na ɗa pin barkaku, pin wazagai na hahakai na ku na kaŋsi arbaɗi ɗaimu ɗa.

³Ɗif n’abai, sda na pɗamai na ku na kaŋsi paŋ na ɗa, tiyi mi yimiŋ gaini firyi, mi zuku tese burini lai.

⁴Amma mu dara mu huwyuku viya kai, mi siiwuku ɓa pin pɗemku ɗa, ziɓiriyi buri hlai n’agwi.

⁵Tiyi mi tili haa ɗa, ɗif hanɗa a vlak, a kasi sispai arbaɗi Yudeyakai paŋ, n’e ɗa midini afti ɗa paŋ. A baini vok na wiiɗi Nazoreyakai.

⁶A za wazagai zamai n’a siŋka ɓa a na sa hormo wiini tempel na wiimu na sɗik ɗa kai, nɵa mi yimiŋsi.

⁷Tuku mal aga ku zilbaŋ aga a wuyuku seŋ midini wala na mi pini seŋ midini pini ɗa.

⁹Yudeyakai e miɗi seŋ na Tertulus a muɗaŋ ɗa a na ɗa ɵa.

¹⁰Asakal na Lawan a sini futi buri a muɗa ɗa, Paulus a muɗa maini nɵa: Mu sɗa ɓa ku na aŋ pai zi ɗûkliti sariya midini afti hanɗa a za buza yaw, nɵa mu muɗa seŋŋa ɗa gaini hunai kai.

¹¹M'aŋsi a Yeruzalem aŋ siiwa ɗa a suwa mefeŋ doogo pi sulu kai, na ɓa ku dara ku zilba ɗai zamai.

¹²E niviŋa aŋ sispa gaini ɗif ktai kaalai, aŋ faka dûrgûzi arbaɗi ɗai amlai war tempel kaalai, war sinagogne kaalai.

¹³Wala n’e pi seŋ mada pini na ɗa, e kiɗi e siŋki gaglaini edi kai.

¹⁴Amma mu siɗa aŋ muɗa wuzaku na ɓa: mu za na ɗa a ɵeŋ na wiini Alaw na wiiɗi tamaiyi, mu yima seŋ paŋ n’aŋ gai ɗû war Ɗû gaini nawiiɗi ɗai na min Alaw.

¹⁵Wala ktai na mu yimaŋ ɗa ɓa: Zliyi n’amai na wiiɗi na jrekai gaiɗi na jrekai kai aga a za. Nagai ɗe e yimi ɵa lai.

¹⁶Buri nɵa, mu na fuɗa was aŋ paya ɗikat wuzani arni Alaw, wuzani arɗi ɗai lai.

¹⁷Mu za buza viya mu na hala woni kai, nɵa mu hala aŋ ka zinai wiiɗi ɗaiŋa, aŋ za ɓaka lai. mu nafu amlai warni tempel, e niviŋasi woni.

¹⁸E niviŋasi mu z sa edi hilu ta, firiɗi ɗai gaya kaalai.

¹⁹Ɗai n’e ɗifu gaya ɗa e ɗi Yudeyakai na war Aziya par. Na ɓa seŋ na meefeŋ a nafu ɗa, e kiŋasi wuzaku ɗa e ɗi ɗai hanɗa.

²⁰E miɗi haw ɗa, hlai n’e kiŋa wuzani hlai zi sariya na wiiɗi ɗa, meefeŋ n’e niviŋ sa ɗa a na wata ɗa? Na ɓa a na ɗa e miɗiŋ.

²¹Mu sɗa kai, a fiɗiɗi li siɗi ɗa, a seŋ na mu muɗaŋ arbaɗi ɓa: Zliyi n’amai na wiiɗi ɗai zi mri a na ɗa. A wala n’e kiŋasi wuzaku miɗi sariya burini ɗa.

²²Felikse a sɗiti futi na wiini Epiɗ-ɗai ya. A pra mefeŋɗi sariya edi su. A miɗiɗi wiiɗi Yudeyakai ɓ'aga a ziti sariya hanɗa, won hlai na komanda Lisiyas a cosi li.

²³A sa futi wiini abaiɗi askarai na ɗai pini miya ɗaw, buri a ɵaŋ warɗi daŋgai, amma a rgaŋ kai, a hiniɗi ɗai e zini pini lai.

²⁴Mefeŋ agwi asakal par, Felikse a halasi gaiɗi Drusil na munini, na te pinziba na Yudeya, a ɵina pin Paulus. Paulus a miɗini midini yimi na war Yesu.

²⁵Amma won hlai n’a na muɗa midini jre-ɗikat, gaini ɗilini-si, gaiɗi sariya na wuzamu, Felikse hunai a yimaŋ a miɗini wiini Paulus maini nɵa: Girna ɗa, ɵa ta, hala wiiku, sai dawai zamai na mu yikuku li.

²⁶A hiina ɓa Paulus aga a sini farai, a ɵina pini gosa, gosa, aŋ haɗa kalaŋ gaini na buri hanɗa.

²⁷Buza a vuga sulu, asakal par e bindi felkse gaini Porsius Festus. Amma kapai a tuura hiiniɗi Yudeyakai kai ɗa, a hina Paulus warɗi daŋgai.