Read Mousgoum Sdaɗi Apostelai 25 Bible Online

Sdaɗi Apostelai 25 - Mousgoum bible

Sdaɗi Apostelai 25

¹Won hlai n’a cosi aha midini aftini a za mefeŋ hu ɗa, Festus a hala a Sezareya par amai a Yeruzalem.

²Paakai n’abakai zi ɓaka gaiɗi n’e ɵi wuzaɗi Yudeyakai ɗa, e ɗûûli midini Paulus mini, e siiwiŋ gaini kurfuk,

³e zilbiŋ buri a zina piɗi ta, a ɵiniɗisi Paulus ɗa a Yeruzalem sek, e zizinisi siɗi buri e riɓtiŋ ka war futi kapai e fiɗiŋ edi.

⁴Festus a waya seŋ a miɗiɗi ɓa: Paulus aŋsi warɗi daŋgai war Sezareya, ni ɗe aŋ won na buri hlai n’agwi kadai, aga a waya lai.

⁵A muɗa: Na ɓa ɗai zamai arbaki par, n’e siɗi siɗi ɓa e kiɗi ta ɗa, e hiliɗi gaya a azumai a Sezareya, na ɓa ɗif hanɗa a za ka wala na meefeŋ ta ɗa, kapai e ɗûûli midini.

⁶Festus a zasi woni a suwa mefeŋ doogo kai, a waisi azumai a Sezareya. Dawaini a sumna azumai midiɗi paramaini zi pai aŋ sa sariya, a ɵina ɓa e kinisi Paulus.

⁷Won hlai na Paulus a cosi li ɗa, Yudeyakai n’e hilisi a Yeruzalem par, e guniŋ azumai, e pini seŋ mdini viya gaini seŋ zamai n’abakai na nagai e kiɗi e miɗi gaglaini edi kai lai.

⁸Paulus a tika seŋ a muɗa: Mu za tuwur war wala ktai kai, sini gadai zi ɗû na wiiɗi Yudeyakai kai, sini tempel ɗa kai, sini Sezar kaalai.

⁹Festus a firya a za pɗem wiiɗi Yudeyakai, a waya seŋ wiini Paulus a muɗa: Ku firya ku hala amai a Yeruzalem, kapai mu zutuku sariya woni ɗi?

¹⁰Paulus a muɗa: M'aŋ na wuzaɗi Paramai zi sariya na wiini Sezar, Sariyaŋa te za ɗa won na. Maini na tuku ku sɗaŋ na ɗa ɵa, mu za wala ktai n meefeŋ siɗi Yudeyakai kai.

¹¹Na ɓa mu za ka wala na meefeŋ ta, zaw mu za wala ktai na mu kiɗa mu nava mri burini ɗa, mu siiwa na ɗa ɓa, ki fiɗiŋa kai ɗa kai, amma na ɓa seŋ n’e piŋŋa mada na ɗa, jre ktai warni kai ɗa, ɗif ktai n’a yimaŋa aŋ saŋa war tiɗi aŋ kai. Marya mu kiti sariyaŋa wuzani Sezar.

¹²Nɵa, asakal n’e kiti seŋ ɗa gaiɗi ɗai na gaini yaaha ɗa, Festus a waya seŋ a muɗa: Na ɓa ku firya ɓa ku kiti sariyaku wuzani Sezar ɗa, hala wiiku wuzani Sezar.

¹³Mefeŋ agwi asakal par, pai Agripa gaiɗi Berenis e cûsi war Sezareya, e hili aŋ ɵiɓini wuti wiini Festus.

¹⁴Asakal n’e zi mefeŋ woni agwiya ɗa, Festus a miɗini wiini pai ɗa midini seŋ na wiini Paulus ɗa maini nɵa: Felikse a hina ka ɗif ktai gai niggi warɗi daŋgai,

¹⁵ɗif ni ɗa, won hlai na m’aŋsi a Yeruzalem ɗa, paakai n’abakai zi ɓaka gaiɗi abakai n’arbaɗi Yudeyakai e ɗûûli midini, e firyi ɓa mu kûti sariya midini.

¹⁶Mu wiyiɗi seŋ ɓa: Pin de na wiiɗi Romekai ɗa, e kiɗi e si ɗif edi tiɗi gawni, wuzani hlai kai, sai e zi sariya miɗi marɗi gaiɗi nagai n’e pi seŋ midini ɗa ta haw, sai a muɗa na mini ɗa edi ta haw.

¹⁷Nɵa, e hilisi won na, mu baiya kir kai, dawaini tar, mu sumna azumai warɗi Paramai zi sariya, mu sa miɗi buri e kisi ɗif hanɗa wuza.

¹⁸Won hlai na mi tipi li ɗa, ɗai n’e pi seŋ midini ɗa, e kisi seŋ ktai na meefeŋ midini maini na ta mu hiinaŋ ɗa ɵa kai;

¹⁹amma n’a na arbaɗi ɗa a sispai na burini yimi na wiiɗi, gaini ɗif ktai n’e yikiŋ ɓa Yesu, n’a mra su, amma Paulus a muɗa ɓa a na karni.

²⁰Ta ɗa, mu sɗa wala ktai na mu muɗaŋ pini sispai na mai hanɗa ɵa kai. Mu zilbaŋ ɓa, a firya a waya a Yeruzalem, kapai mu zini sariya pin seŋ hanɗa ɗi ɗa,

²¹Paulus a muɗa ɓa sai seŋni ɗa a hala gaini wuzani Ogustus, nɵa mu sa ka miɗi buri e wiyiŋ warɗi daŋgai haa sini mefeŋ na mu ɵinaŋ sini Sezar ta.

²²Agripa a miɗini wiini Festus: Ta lai mu firya mu ɵina na min ɗif hanɗa. Festus a waya seŋ a miɗini: Dawai aga ku ɵina seŋ na mini ɗa.

²³Nɵa, dawaini, Agripa gaiɗi Berenis e hilisi gaini suura n’abai piɗi, e niyi amlai warɗi dilimi n’e zi sariya woɗi ɗa, gaiɗi abakaiɗi askarai, gaiɗi ɗai n’abakai dam dam na war fuŋ n’abai ɗa. Pin miɗi na wiini Festus, e kisi Paulus wuzaɗi ɗai hanɗa.

²⁴Nɵa, Festus a muɗa, tuku pai Agripa, gaiki tiki paŋ na ki ɗa gaiyi won na, ɗif na ki tiliŋ na ɗa, abaiɗi Yudeyakai paŋ e hilisi sa burini a Yeruzalem, won na lai, e sûûri pini ɓa sai a nava fiɗi n’edi.

²⁵A yima mada ta ɓa a za wala ktai na meefeŋ n’a kiɗa a nava mri edi burini kai. Amma ni ɗa a firya ɓa sai a hala wuzani Ogustus, a tala ara pɗem ɓa mu ɵiniŋni lai.

²⁶Wala ktai nɵa, na mu ɗoŋ midini aŋ ɵinaŋ sini pai n’abai gaini a na ara kai, mu yikaŋsi wuzaki, a suwa paŋ wuzaku tuku pai Agripa na ɗa, ɓa kapai mu zulbuŋmu li paŋ ɗa, mu suɗumu wala na mu muɗuŋmu midini ɗa.

²⁷Buri ɓa, mu ɵina ɗif zi daŋgai wuzani pai, gaini seŋ ktai midini kai ɗa, a zuva ara kai.