Read Mousgoum Sdaɗi Apostelai 26 Bible Online

Sdaɗi Apostelai 26 - Mousgoum bible

Sdaɗi Apostelai 26

¹Agripa a miɗini wiini Paulus, futi t'aŋ suku buri ku muɗa. Nɵa Paulus a huwda tini a muɗa jreni edi maini nɵa:

²M'aŋ war firiyi gara, pai Agripa, buri mu nava futi aŋ muɗa jreŋa edi wuzaku girna, burini seŋ na Yudeyakai e ɗa piŋŋa mada ɗa.

³Buri ɓa tuku mal ku sɗa de na wiiɗi Yudeyakai edi gaglai gaini seŋ n’a faka sispai n’a na ta ta ɗa, nɵa mu siiwuku, ku za barka, ku ziɓira seŋŋa ɗa haw.

⁴Wiliŋa na mu wula blaŋ, gaini agwiya par haa tiyana, payaiŋa na mu tika pa gaini arbaɗi ɗaiŋa, aha war Yeruzalem, Yudeyakai paŋ e sɗiŋ paŋ.

⁵E sɗiŋa haa aɗipar, e kiɗi e zi zaida mada lai na ɓa e diri, mu naka mu ɗif na war vokɗi Farisekai, vok na spak a suwa paŋ na war yimi na wiyi.

⁶Tiyana e kiŋisi wuzaɗi sariya na ɗa, buri mu ɗiya yimiŋa midini ha n’Alaw a ziŋɗi wiiɗi tamaiyi ɗa.

⁷Ha hanɗa, pinzibaini na doogo pi sulu, n’a na siiwa Alaw gaini kurfuk, girvudi gaini duvuk paŋ e ɗa biyiŋ, ɓ'aga a va amai. Mbaŋ, Yudeyakai e piŋŋa seŋ mada na ɗa buri biyi na pin ɵeɗ hanɗa.

⁸Hiini na ɓa Alaw a kiɗa a ɵiyiɗi zi mri amai ɗa, a tala arki aŋ wala n’a za kai ɗa buri ma ɗa?

⁹Ta ɗa, mu naka mu hiina ɓa, mu hitima yikini Yesu na Nazaret ɗa gaini kurfuk.

¹⁰Hanɗa a wala na mu zaŋ war Yeruzalem ɗa, ta gaini mada dama mu mula ɗai zi yimi viya war daŋgai, pin spak n’a sa siɗi paakai n’abakai zi ɓaka par. Won hlai na ɗa e kiti miɗi li buri e fiɗiɗi edi ɗa, mu tapa ma gaiɗi lai.

¹¹War sinagogne paŋ, mu mula ɗai ca ca, kapai e zi gdaŋ midiɗi ɗai aŋ tirki yikini Alaw. Pin suwarŋa zi hiriyik na siɗi ɗa, mu ziɗi gir haa edi war fuŋ n’abakai n’edi ɗa kafa.

¹²Mu nafu war hili war Damaskus sek, piɗi letre na paakai n’abakai zi ɓaka e sitiŋa aŋ za gaiɗi ɗa, mu nafu gaini spak war ta gara.

¹³Mbaŋ, girvudi n’arba sek ɗa, mu tala gaglai zi ŋili n’a halasi amai war fuŋ n’Alaw par, a gunaŋa azumai, ta gaiɗi mara na pa paŋ, ŋilini a sûwiti futi.

¹⁴Tiyi paŋ mi yiki azumai, mu ɵina wule a muɗa sa war seŋɗi Hebrekai maini nɵa: Sawlus, Sawlus, ku zaŋa gir buri maɗa? Ku bla cok maini gari n’epin-gezani a ɵiɓaŋ gaini daɓala, amma a dara a hala kai ɵa ɗa, buri ma ɗa?

¹⁵Mu waya seŋ mu miɗini: Tuku ku siya ɗa, Epiɗ-ɗai? Epiɗ-ɗai a muɗa: Ta, ɗa mu Yesu na ku na zini gir na ɗa.

¹⁶Amma, faka amai, ɗiya amai midini azuku zaw. Wala na mu siŋka sa arku burini ɗa a na maini nɵa: Mu dara mu zuku aŋ ɵeŋ, aŋ zaida na wiini wazagai na ku talaŋ sa par, gaini n’aga mu siŋka sa arku burini asakal par ɗa lai.

¹⁷Aga mu pluku edi tiɗi ɗai par, tini pinziba hanɗa par, gaini pinziba na zamai ɗa lai, na ta mu na ɵunuku arbaɗi na ɗa.

¹⁸Kapai mu miliɗi arɗi edi, e bindisi edi war gegeŋ ɗa par sini gaglai ɗa sek, war spak na wiini satan par sini Alaw sek lai, e nivi ni burini tuwurɗi, e nivi bulum arbaɗi nagai n’e zi edi aŋ sɗik pin yimi na wara.

¹⁹Buri nɵa, pai Agripa, mu kiɗa buri mu bula edi sini wala n’a siŋka sini ara, amai war fuŋ n’Alaw par ɗa kai.

²⁰Amma, siɗi nagai na war Damaskus avut, asakal par siɗi na Yeruzalem, siɗi nagai na war Yudeya paŋ, gaini pinziba a zamai ɗa paŋ lai, mu miɗiɗi ɗa ɓa sai e bindi hiiniɗi gamai, e bindi rɗi sini alaw sek, e zi sda n’a siŋka bindiɗi na gamai edi ɗa lai.

²¹Yudeyakai e yimiŋa amlai warni tempel na ɗa ɗe buri seŋ hanɗa, e piyi aŋ fiɗiŋa edi lai.

²²Amma, barkani gɗam na wiini Alaw, mu na kara haa girna, mu na za zaida wuzaɗi n’abakai gai n’agogoi, mu na muɗa wala zamai kai, sai a wala na ɗai na min Alaw gaini Musus e miɗi edi midini ɗa.

²³A dara a muɗa, Kristu aga a siɗa gir, won hlai n’a ɵiyasi li amai avuti arbaɗi zi mri par ɗa, aga a muɗa edi midini gaglai sini pinzibaɗi Izaiaiel gaiɗi pinziba na zamai ɗa lai.

²⁴Won hlai n’a na muɗa jreni edi mai hanɗa ɵa ɗa, Festus a ɗuula a muɗa: Paulus ku rka bir ɗi? Siɗiku n’abai a firya a duuluku koo?

²⁵Paulus a waya seŋ a muɗa: M'aŋ gai rki kai, Festus, ɗif n’abai, na mu muɗaŋ war ma par na ɗa, a seŋ na jre, zi hiini lai.

²⁶Pai ɗa a ɵina labar hanɗa paŋ ya, mu dara mu miɗiŋni gaini hunai pa kaalai, buri mu sɗa ya ɓa wazagai hanɗa paŋ a za ɗa war ŋoyai kai.

²⁷Pai agripa, ku dara ku yima pin seŋɗi ɗai na min Alaw ɗa ɗi? Mu sɗa edi gaglai ɓa, ku yima pini ya.

²⁸Agripa a miɗni wiini Paulus, aŋ kai agwi kadai, kapai ku yima hiiniŋ gaini seŋku ɗa, kapai ku bundaŋa aŋ ɗi na wiini Kristu lai.

²⁹Paulus a waya seŋ a miɗini: Koo ɓa a hina agwi, a hina abai ɗi ɗa, a dara ɓa na ɓa Alaw a dara ɗa, ku tuku ktai kai, nagai paŋ n’e ɗa ɵini seŋ ŋa girna na ɗa lai, ki bindi maya ta nɵa, amma gaini jaɓ tiki kai.

³⁰Nɵa pai lai, Lawan ɗa lai, Berenis lai, nagai n’e simni azumai gaiɗi paŋ lai, e fiki amai.

³¹Won hlai n’e ɗa hili ɗa, e miɗi arbaɗi marɗi: Ɗif hanɗa a za wala ktai n’a kiɗa a nava mri pini zaw ɵi na war daŋgai burini kai.

³²Nɵa, Agripa lai a miɗini wiini Festus, kadai tiɓ, mu ɵumu ɗif hanɗa su, na ɓa a ɗuula fu sini Sezar kai ɗa.