Read Mousgoum Sdaɗi Apostelai 27 Bible Online

Sdaɗi Apostelai 27 - Mousgoum bible

Sdaɗi Apostelai 27

¹Won hlai na seŋ a ɗiya zaw ɓa aga mi hili war Italiya ɗa, e si Paulus gaiɗi ɗai zi daɓgai zamai lai war tini abaiɗi askarai na ɗai pini miya ɗaw, n’e yikiŋ ɓa Yuliyus, na war vokɗi askarai na pini pai.

²Won hlai na mi niyi li war hulum n’abai n’Adrimitiyum n’a haa war Aziya sek ɗa, mi tiki edi; Aristarkus, ɗif na Makedoniya na war Tesalonike par a nafu gaiyi.

³Dawaini ɗa, mi yimi amai war Sidon, Yuliyus a firya a zini meefeŋ wiini Paulus kai, nɵa a hinaŋ a hala siɗi marmakaini kapai a nava zinai tiɗi par.

⁴Woni par, mi niyi amlai miɗi Kiprus ɗaw, buri ɓa smer ɗa a pasi aryi tiɓ.

⁵Won hlai na mi vigi yem-ra n’abai n’a na ɵimaɗi Kiliya gaiɗi Paŋfiliya li ɗa, mi cû a Mira, war Likiya.

⁶Woni, abaiɗi askarai na ɗai pini miya ɗaw, a nava hulum n’abai n’a Aleksandriya par, n’a hala war Italiya sek, a miliyi amai warni.

⁷Mi zi mefeŋ yaw, buri hulum ɗa a hala gai hangal hangal. Mi cû war Knidos ɗa kaɓa kaɓa, smer ɗa a hiniyi aŋ yimi amai kai, mi niyi wuzaɗi Salmone ɗaw, mi vigisi ezini ga na Kreta par ɗaw.

⁸Won nlai na mi hinitisi Salmone piyi nɵa agwiya tar ɗa, mi cû war hlai n’e yikiŋ ɓa: "Min vor na pɗem" ɗa kaɓa kaɓa, gobi ɵimani fuŋ n’abai na Laseya.

⁹Won hlai na mefeŋ ɗa a za viya ta, morkoiyi na wuzayi sek te bunda gir pla lai, mefeŋ na wiini tikini-sai a vuga vug lai ɗa, Paulus a ziɗi zaida a muɗa:

¹⁰Mara, mu tala na ɗa, morkoi na wuzamu sek aga te za gaini gir, burini wazagai na warni hulum gaini hulum n’abai ɗa ktai kai, burimu tumu dama lai.

¹¹Amma abaiɗi askarai na ɗai pini miya ɗaw, a yima ɗa a seŋ na wiini epin-gezani hulum gaini ɗif n’a naka hulum ɗa, a dara a yima seŋ na wiini Paulus ɗa kai.

¹²Amma won hlai n’e tiliŋa min vor a woni ɗa, amsai ɗa pɗem kai ɗa, a baiɗi ɗai na war hulum ɗa paŋ ɓa marya e tiki edi e hili war Feniks, a mini vor ktai na Kreta, n’a na piɗi futi na koskoi sek gai zigi amai sek agwi, war gal n’azumai sek ɗa gai zigi amai sek agwi paŋ, kapai e ziti amsi ɗa woni.

¹³Smer ktai a tikasi war gal n’amai par, a kasi lef lef lef, aga a va hiini na wiiɗi ɗa amai, e yimisi wala na guma n’e ɗiyi hulum gaini ɗa amai, e niyi amlai ezini daŋ na Kreta ɗaw.

¹⁴Safai n’agwi asakal par, berber n’abai Erakilon a fakasi siɗi wudi par, a cikiɗi agoɗɗom.

¹⁵Smer a tika hulum n’abai ɗa, a fanaŋ, tiyi mi siɗi wala ktai na mi ziŋ kir kai.

¹⁶Won hlai na mi vigi azumai par piɗi wudi ktai n’agwi n’e yikiti ɓa Kloda ɗaw ɗa, mi fiɗi was haa kaɓa kaɓa, mi hini hulumyi ɗa a pa kai.

¹⁷Won hlai n’e yimisi hulum ɗa amai li ɗa, e mili sogom n’a hina amai piɗi ɗa, e rgi paɵani hulum ɗa gaini kapai a haɗa edi kai, e hiini ɓa smer ɗa aga a huguɗi haa a Sartis, nɵa e pli sapa n’e rgiŋ amai midini hulum aŋ kiŋ gaini ɗa azumai, mi hini yaw aŋ fini tini smer.

¹⁸Won hlai na berber a tikiyi miyi li ɗa, dawaini ɗai e pûki wazagai zamai agoɗɗom.

¹⁹War mefeŋ n’ag'aŋ hu, nagai gai tiɗi mal e pûki wazgai n’e zi sda war hulum gaini ɗa agoɗɗom.

²⁰Mefeŋ a za yaw, futi te yimasi edi kaalai, meeɵek kaalai. Berber n’abai ɗa a suwa gdaŋ gara, haa hiini na ɓa aga mi kûrɗi ɗa maa aŋ midiyi kir kai.

²¹E fini yaw, ɗif a suma wala kai. Nɵa Paulus a ɗiya amai arbaɗi zaw a muɗa: Ki ɵinifu ma ɗa, war Kreta par, mu kuɗumu mu tukumusi edi kai, nɵa wazagaimu a bafu kaalai, suŋfamu a ba kaalai.

²²Amma tiyana ɗa, mu miɗiki ɓa, pumu armu, ɗif ktai maa aga a ba kai sme, amma hulum ɗa aga a ba.

²³Buri war duvuk hanɗa, ɗif zi ɵeŋ na war fuŋ n’Alaw na wiini Alaw na mu yima pini, na mu na siiwaŋ lai ɗa, a siŋka sini ara,

²⁴a muɗaŋa ɓa: ku huna kai Paulus, aga ku ɗiya wuzani Sezar aŋ zutuku sariya, Alaw aga a za yum siɗi nagai n’e ɗa gaiku war hulum ɗa paŋ.

²⁵Nɵa, mara, pi arki, buri mu yima ɓa n’Alaw a muɗaŋa ɗa, aga a za mai hanɗa ɵa.

²⁶Aga mu hugumu amai siɗi wudi ktai.

²⁷War duvuk n’ag'aŋ doogo pi puɗu, na mi ɗa yaw aŋ kiciwi war yem-ra n’abai n’Adriya ɗa, ɗai na pin hulum n’abai ɗa e hiini ɓa afti ktai a na gobi.

²⁸E rgi wala ktai min sogom ɓak, e biliŋ agoɗɗom. Hulumni yem ɗa a za metre doogo doogo hu pi ɵim, e fini wuzaɗi agwiya ɗa, e biliŋ ka zamai su, e nivi hulumni yem ɗa metre caaɓa pi ɵim.

²⁹E hiini ɓa aga e dibi sin ali-fuŋ ɗi, nɵa e mili wazagai na guma n’e ɗiyi hulum n’abai gaini ɗa puɗu agoɗɗom, edi giɗerni hulum ɗa par, kapai e biyi haa hlai a sɗasi edi haw.

³⁰Amma won hlai na ɗai na pini hulum ɗa e ɗa piyi futi aŋ pri edi warni hulum ɗa par, e ɗa hugi hulum n’abai ɗa agoɗɗom war yem ra n’abai sek gaini hiini na ɓa e ki wazagai na guma n’e ɗiyi hulum gaini edi gai gai agwi lai ɗa,

³¹Paulus a miɗini wiini abaiɗi askarai na ɗai pini miya ɗaw gaiɗi askarai ɗa lai ɓa: na ɓa ɗai hanɗa e simni azumai war hulum ɗa kai ɗa, tiki aga ki kûrɗi kai.

³²Nɵa, askarai e ɗukuli sogomni hulum ɗa, e hiniŋ a fana.

³³Won hlai n’e ɗa biyi ɓa, hlai a sɗasi edi ɗa, Paulus a miɗiɗi wiiɗi ɗai paŋ buri e simni, a muɗa: Girna ɗa a mefeŋ n’ag'aŋ doogo pi puɗu, na ki ɗa war bayai, war tikini sai, ki simi wala kaalai.

³⁴Tiyana mu miɗiki na ɗa ɓa, na ɓa ki firyi ki simni karki ɗa, simi wala, ayir na midini ktai arbaki maa, aga a ba edi kai.

³⁵Asakal n’a muɗa haɗa ya, a tika peŋ, a sa tese sini Alaw wuzani arɗi paŋ, asakal par a ɗukulaŋ, a tika pini a sumaŋ.

³⁶Nɵa, won hlai n’e nivi arai zi pi ya, gai hlaiɗi e simi.

³⁷Tiyi ɗai na war hulum n’abai ɗa paŋ ɗa, mi ɗa ɗai miya sulu gai doogo doogo muguzak pi ɵaara.

³⁸Won hlai n’e simi haa, e vi li ɗa, e pûki algama n’a hina ɗa agoɗɗom, kapai hulum n’abai ɗa a bunda kolek.

³⁹Amma war hlai na hlai a sɗasi edi li ɗa, e tili afti kir kai, amma e nivi meɵew ktai, e rgi warɗi sai e hugi hulum n’abai ɗa amlai warni sek, haa amai min daŋ ɗa ta, na ɓa a sɗa aŋ za ɗa.

⁴⁰E pili wazagai na guma n’e ɗiyi hulum n’abai gaini ɗa e hiniŋ agoɗom, sogom n’e rgi sapa n’e ki hulum n’abai gaini ɗa, e pliŋ su su lai; asakal par e rgi sapa n’e ki hulum n’abai gaini ɗa amai midini hulum ɗa ɓak, smer a huguɗi amlai ezini daŋ ɗa sek.

⁴¹Amma e ɓisisi midini hlai zi kaikai, n’a vurɗa amai, na galni sulu paŋ hulum paŋ, hulumɗi n’abai ɗa a haga woni. Midini hulum n’abai ɗa a hina pɗem ta, amma giɗerni, mayaw n’a ɵiɓa amai sini, a haɗaŋ edi.

⁴²Asakarai, e firyi ɓa e fiɗiɗi ɗai zi daŋgai ɗa edi, kapai e siɗi aŋ hiŋɵi amai gdaŋ an pri edi kai.

⁴³Amma abaiɗi askarai ɗa a firya ɓa sai a kurɗa Paulus, e hiniɗi e zi maini n’e hiiniŋ nɵa kai, sa futi wiiɗi nagai n’e siɗi hiŋɵi ya ɗa buri e pûki siɗi agoɗɗom avut, aŋ hiŋɵi amai gdaŋ.

⁴⁴Nagai n’e hini ɗa, e yimi tiɗi sini wazagai na war hulum n’abai, zaw sini peteni hulum na smer haɗaŋ ɗa, kapai gai hlaiɗi paŋ e gi amai ezini daŋ, wala na meefeŋ aza sini ɗif kai.