Read Mousgoum Sdaɗi Apostelai 28 Bible Online

Sdaɗi Apostelai 28 - Mousgoum bible

Sdaɗi Apostelai 28

¹Won hlai na mi cû amai jam jam ɗa, mi ɵini ɓa wudi ɗa yikiɗi ɓa Melita.

²Ɗai na woni ɗa e zi pɗem siyi abai gara. E piyi afu n’abai tiɓ, buri ɓa faŋ a tika pini a ɵa, hlai smer lai.

³Paulus a mulasi luwuŋ na huleŋ tini aŋ mulaŋ mini afu, amma pin yuvuguni afu ɗa, maakai te niyasi arni par, te ɵawa wulani tini.

⁴Won hlai na ɗai zi fuŋ e tili wala meefeŋ tini ɵew ɗa, e miɗi arbaɗi marɗi: Ɗif hanɗa fakat a ɗif zi ɵiɓi belek, a kurɗasi mini yem-ra n’abai par tiyana, Alaw na jre ɗa, a dara ɓa a hinaŋ karni kai.

⁵Amma Paulus a huditi tini, wala meefeŋ a poko arni afu, wala ktai na meefeŋ a za sini kaalai.

⁶Ɗai e biyi ɗa ɓa, sini aga a hitila, zaw a kɵa azumai gaini mri su, war hlai ni tizaw ɗi, amma e biyi haa ala na meefeŋ a za sini kai ɗa, e bindi hiiniɗi e tiki piɗi e miɗi ɓa: Ni a Alaw.

⁷Gobi ɵimaɗi wudi na ɗa, dalam ktai a nafu, a wiini ɗif n’abai na midiɗi wudi ɗa, yikini ɓa Publiyus. A yimiyi aha sini a zina piyi haa mefeŋ hu.

⁸Epini Publiyus a nafu azumai waŋ, sini a sawa lai, a ma fulai zi fel lai; Paulus a niya amlai sini, a siiwa, a tika tini midini, a zuulaŋ lai.

⁹Asakal hanɗa, ɗai zi veglek na miɗiŋ wudi ɗa e hilisi sini, e nivi zuuli lai.

¹⁰Nagai e siyi kol abai gara won hlai na mi firiyi ɓa mi hili ɗa, e zini piyi gaini wazaga na jaayi aŋ sini ɗa.

¹¹Tile hu asakal par, mi niyi war hulum n’abai, n’Aleksandriya par, na amsai te navaŋsi woni midiɗi wudi ɗa, na gaini foto zi yuri na wiini Kastor gaini Polukse edi giɗerni ta ɗa.

¹²Mi cû war sirakus, mi zi warni mefeŋ hu.

¹³Woni par, mi tiki wulani hlai ɗaw ɗaw, mi cû war Regio. Dawaini ɗa, smer na war gal n’amai par a fakasi, mi zi mefeŋ sulu mi cû war Puzules.

¹⁴Woni, mi niviɗi tawalakai n’e siiwiyi buri mi simni gaiɗi haa mefeŋ muguzak, asakal hanɗa par, mi cû war Rome.

¹⁵Tawalakai na war fuŋ n’abai hanɗa, e ɵini labaryi, e hilisi aryi sek, haa sini kosku n’abai na wiini Apiyus, gaini hlai zi morkoi na hu lai. Won hlai n’a tiliɗi, Paulus a sa tese sini Alaw, a nava gdaŋ lai.

¹⁶Won hlai na mi cû war Rome ɗa, futi te sa sini Paulus buri a sumna edi kiini, gaini askar n’a giɗimaŋ ɗa lai.

¹⁷Mefeŋ hu asakal par, a yikiɗisi n’abakai na wuzaɗi Yudeyakai, won hlai n’e diŋgisi li ɗa, a tika pini aŋ miɗiɗi mani nɵa: Tawalakaya, mu za wala ktai siɗi ɗaimu kai, sini gadai na wiiɗi tamaimu kaalai, amma m’aŋ war daŋgai haa a Yeruzalem par, won hlai na sa edi tiɗi Romekai.

¹⁸Asakal n’e zilbiŋa maa yaaha, e firyi ɓa e ɵiŋa, buri e nivi wala ktai na mu kiɗa mu nava fiɗi n’edi pini nɵa sa kai.

¹⁹Amma Yudeyakai e bili edi cok, mu sɗa wala na mu zaŋ ɗa kai, a hina mada ɓa mu kiti sariyaŋa wuzani Sezar, amma war hiini zi pi seŋ midiɗi ɗaiŋa kai.

²⁰Mu paya futi aŋ nava gaiki aŋ haɗa kalaŋ gaiki lai na ɗa burini seŋ hanɗa, buri m’aŋ warni jaɓ na ɗa burini biyi-na-pin-ɵeɗ na wiiɗi Izrayel.

²¹E wiyi seŋ e miɗini, tiyi mi nivisi ɗû ktai war Yudeya par muduku kai, tawal ktai n’a halasi warni par, n’a kasi seŋ muduku zaw, n’a muɗa wala na meefeŋ muduku aŋ kaalai.

²²Amma tiyi mi firyi mi ɵini muku tuku dama, midini wala na ku n’a hiinaŋ, buriyi tiy mi siɗi ɓa hitrai na wiiku ɗa, war hlai paŋ ɗai e ɗa fiki amai sini.

²³E kiti mefeŋ ktai ta, e hilisi sini aha war dalam n’aŋ warni ɗa, viya e suwi. War hitrini ɗa, a muɗa midiɗi pai na wiini Alaw, war gadai zi ɗû na wiini Musus par gaiɗi ɗai na min Alaw, a fuɗa was aŋ yima hiiniɗi gaini seŋ paŋ n’a muɗa midini Yesu, a za hanɗa gorof par haa koskoi.

²⁴Na zamai ɗa, seŋni ɗa a yima hiiniɗi, na zamai ɗa e diri e yimi kaalai.

²⁵Won hlai n’e ɵiri siɗi marɗi par war ɓraw, Paulus a muɗa katawai pra maini nɵa: A jre ɓa Seze-sɗik a miɗiɗi wiiɗi tamaiki war mini ɗif na min Alaw Esaia,

²⁶Won hlai n’a muɗa ɓa: Hala sini pinziba hanɗa ku miɗini ɓa: Sleŋ ɗa aga ki ɵiniŋ sme, amma aga ki ɵini ezini edi duk kai, tel ɗa aga ki tili sme, amma aga ki tili wala edi gaglai duk kai;

²⁷buri ɓa agulɗi ɗai hanɗa a diŋra diŋir, ɵimaɗi a bunda a ɵina kai, e dûgi arɗi duk lai kapai e tili gaini arɗi kaalai, e ɵini gai ɵimaɗi kaalai, e ɵini ezini wala gaini yelɗi kaalai, kapai e bindisi arɗi sini Alaw sek kai, ɵa kai ɗa aga mu zuuliɗi.

²⁸Buri nɵa, yimiŋ midiki pɗem ɓa, kûri na wiini Alaw hanɗa a ɵina li edi sini pinziba na zamai ya: nagai ɗa, aga e ɵini.

²⁹Won hlai n’a muɗa hanɗa ya, Yudeyakai e hili wiiɗi, e sisipi arbaɗi marɗi gara.

³⁰Paulus a sumna war dalam z'akri, n’a yimaŋ ɗa haa buza sulu, nagai n’e hilisi sini paŋ ɗa, a yimiɗi sini.

³¹A muɗa edi midiɗi pai n’Alaw, a hitra edi midini Epiɗ-ɗai Yesu Kristu gaini kurfuk gara lai, ɗif a ɗalaŋ kai.