Read Mousgoum Sdaɗi Apostelai 3 Bible Online

Sdaɗi Apostelai 3 - Mousgoum bible

Sdaɗi Apostelai 3

¹Peter gaini Yohana e hili amai warni tempel war ler na wiini siiwa, a dara a muɗa, sah hu na wiini kuskoi.

²E niviɗi ɗai e ɗa libisi ɗif ktai na a wa ɗa ezini gaini mri ca, na mefeŋ paŋ e ɗa kiŋ mini magalani tempel n’e yikiŋ ɓa: Juf gara ɗa taaha taaha aŋ siiwa tiɗi nagai n’e zini piɗi na hurafai.

³Won hlai n’a tala Peter gaini Yohana e ɗa niyi amlai warni Tempel sek ɗa, a zilbiɗi buri e sini wala ktai na a zina pini agwi.

⁴Peter a mula arni sini gaini Yohana lai a muɗa: Mulasi arku siyi.

⁵Ni a mula arni siɗi war hiini na ɓa aga a nava wala tiɗi par.

⁶Amma Peter a muɗa: Arzaŋ ta kaalai, or ta kaalai, amma wala n’aŋ ta ɗa mu dara mu suŋku war yikini Yesu Kristu na Nazaret par, faka amai, hala.

⁷A yimaŋsi gaiɗi tini na wus a ɗiyaŋ amai, wan hlai ni tizaw, ezini gaini huhunaini-ezini a nava gdaŋ.

⁸Ɗif a fakasi azumai par kot, a ɗiya amai zaw, a tika pini aŋ hala, a niya amlai warni Tempel gaiɗi aŋ hili blaŋ, a pra lai, a kola Alaw lai.

⁹Ɗai paŋ e tiliŋ a na hala, a na kola Alaw lai.

¹⁰Ɗai e siɗiŋ ya, a ni na a naka azumai mini magalani Tempel n’e yikiŋ ɓa juf gara ɗa dam aŋ siiwa tiɗi nagai n’e zini piɗi ɗai na hurafai ɗa. Ɗai e bindi hiyak, e miliŋi burini wala na a za ɗa.

¹¹A dara a ɓurwa edi gaini Peter gaini Yohana kir kai, ɗai paŋ e bindi hiyak, e liwisi siɗi sek sek pini balak n’e yikiŋ ɓa, balak na wiini Salmun.

¹²Won hlai na tala hanɗa, Peter a miɗiɗi wiiɗi ɗai maini nɵa: Tiki ɗai na Izrayel, ki bindi hiyak buri hanɗa buri maɗa? Ki tiliyi maini na ɓa mi fiki ɗif hanɗa amai aŋ hili mi ɗi tiyi gaini gdaŋyi, gaini jreyi ɵa lai ɗa buri maɗa?

¹³Alaw na wiini Abraham, Alaw na wiini Isaak, Alaw na wiini Yakob, -Alaw na wiiɗi tamaimu, - a sitini abai wiini Yesu na ɵeŋni, na tiki ki siŋ edi na ki miɗi edi midini wuzani Pilatus ɓa ki siɗiŋ kai, paŋ ktai a tala arni Pilatus pɗem ɓa a ɵaŋ a ɵi.

¹⁴Tiki ɗa, ki bili edi sini na Sɗik, na Jre, amma ki zilbi ɓa e ɵikisi ɗa a ɗif zi ɵiɓi belek ɗa.

¹⁵Ki fiɗi Epini sunfa ɗa edi su, Alaw a ɵiyaŋsi amai arbaɗi zi mri par, tiyi mi ɗi zaidakaini.

¹⁶Pini yimi na war yikini, yikini ɗa a bunda ɗif na tiki ki tiliŋ, ki sɗiŋ lai na ɗa gdaŋ. A sini zûûli na marwai hanɗa a yimi, yimi na war Yesu ɗa.

¹⁷Tiyana ɗa, tawalakaya, mu sɗa ɓa, ki zi na ɗa war siɗi kai, maiɗi ɗaiki n’abakai nɵa lai,

¹⁸gaini hanɗa Alaw a va amai na ɗa a wala na a muɗasi edi midini avut par war miɗi ɗai na mini Alaw paŋ ɓa: Kristu na wiini aga a sɗa gir.

¹⁹Nɵa ki bindi payaiki gamai, ki bindisi arki gamai kapai tuwurki a sɗa aŋ girda edi.

²⁰Kapai hlai na pɗem a sɗa aŋ halasi sini Epiɗ-ɗai par, a sɗa aŋ ɵinasi Kristu na a varaŋsi edi buriki, a dara a muɗa ɓa: Yesu.

²¹Ni n’Alaw a yimaŋ jaaɓama haa sini mefeŋ na wazagai n’Alaw a muɗa gaini war miɗi ɗai na mini Alaw na Sɗik na ɗipar a zizina war balamni.

²²Musus a muɗa: Epiɗ-ɗai Alaw na wiiki ɗa, aga a fakasi ɗif na mini Alaw na maya ɵa arbaɗi tawalakaiki par amai buriki, tiki aga ki ɵini pini war wala paŋ n’aga a miɗiŋki ɗa.

²³Amma a siya ɗi paŋ n’aga a ɵina mini ɗif na mini Alaw hanɗa kai ɗa, aga e tûûriŋ edi, a vada edi arbaɗi ɗai par.

²⁴Ɗai na mini Alaw paŋ sini Samuwel par haa siɗi nagai n’e hilisi asakal ni par, nagai e miɗi midini mefeŋ hanɗa, e miɗisi edi midini lai.

²⁵Tiki ɗa ki ɗi aliɗi ɗai na mini Alaw, ki ɗi alini bonu n’Alaw a zaŋ gaiɗi tamaiki wan hlai na a miɗini wiini Abraham ɓa: Pini zibaɗi ɗai na midini afti paŋ aga e nivi ɓiki pini pin zibaku.

²⁶Tiyana ɗa, Alaw a ɵinasi ɵeŋni na ɗa siki tiki avut, a ɵinaŋsi buri a ɓikiki, a bindikisi arki edi sini sdaki na meefeŋ par lai.