Read Mousgoum Sdaɗi Apostelai 4 Bible Online

Sdaɗi Apostelai 4 - Mousgoum bible

Sdaɗi Apostelai 4

¹Won hlai n’e ɗa miɗi gaiɗi ɗai ɗa, paakai zi ɓaka gaini abaiɗi ɗai zi giɗimi empel gaiɗi Sadusekai lai e liɓisi midiɗi,

²masuwarai kaŋ buri e tiliɗi e ɗa hitriɗi ɗai, e ɗa e miɗiɗi midini ɵiyi n’amai n’arbaɗi ɗai zi mri na war Yesu.

³E yimiɗi, e pûkûɗi haa e fini amlai buri hlai a za kuskoi ta.

⁴Amma, ɗai viya arbaɗi nagai n’e ɵini seŋ ɗa, e yimi. Pɵaɗi a za gobi ɗai na maɵagai dubu ɵim.

⁵Dawaini ɗa, abakaiɗi gaiɗi abakai n’arbaɗi ɗai, gaiɗi ɗai n’e ɗû wazagai ɗa lai e tipi a Yeruzalem.

⁶Pai n’abai zi ɓaka Anna gaini Kaifas, gaini Yohana, gaini Alekzandre, gaiɗi nagai na war pini zibaɗi paakai n’abakai zi ɓaka lai,

⁷e miliɗisi, e ɗiyiɗi arbaɗi e zilbiɗi miɗi, e miɗi: Ki zi hanɗa gaini spak na maɵa ɗa? War yikini a siya ɗa?

⁸Nɵa Peter na gaini vi gaini Seze-sɗik a miɗiɗi: Tiki abakai na wiiɗi ɗai gaiɗi n’abakai n’arbaɗi ɗai,

⁹tiyana ɗa, ki zilbiyi miyi girna na ɗa burini pɗem na mi ziŋ sini ɗif n’e zini gaini mri, gaini zûûli na a zuula gaini lai.

¹⁰Yimi midiki pɗem, gaiki tiki ɗai na Izrayel paŋ lai ɓa: A za na ɗa war yikini Yesu Kristu na Nazaret par, na tiki ki tûkûŋ amai, na Alaw a ɵiyaŋ amai arbaɗi ɗai zi mri, ɗif hanɗa a ɗiya wuzaki nga na ɗa gaini Ni.

¹¹Ni ɗa a ahi fuŋ na tiki ɗai zi rgi dalam ɗa ki tiliŋ maini wala na a nafa kai ɵa, amma tiyana a bunda aŋ ahini fuŋ na gaini futini, na a tika ɗa war koŋni dalam.

¹²Kûri aŋ warni ɗif zamai kai, buri ɓa azumai midiɗi yai ɗa, yiki ktai na a sasi arbaɗi ɗai na mu kuɗumu mu nuvumu kûri warni aŋ kai.

¹³Won hlai n’e tili ɗiyi na Peter gaini Yohana e ɗiyi pini seŋɗi ɗa, e bindi hiyak gara buri e siɗi ya ɓa e ɗi ɗai na waŋ ɵa, na siɗi miɗiɗi garea kaalai, pra e siɗi ɓa e ɗi ɗai n’e ɗika pini Yesu.

¹⁴Amma wan hlai n’e tili ɗif na a zuula a na gaiɗi gaini ɗiyi zaw ɗa, e siɗi seŋ n’e wiyiŋɗi karɗi kir kai.

¹⁵E miɗiɗi buri e niyisi anene arbaɗi par, e hini e kiti seŋ arbaɗi.

¹⁶E miɗi: Aga mu zumu siɗi ɗai hanɗa a maɗa? A na edi gaglai arɗi ɗai na Yeruzalem paŋ ɓa, siŋki ktai a za gaiɗi ɗai hanɗa ta, na tumu mu kuɗumu aŋ pumu mumu midini kai.

¹⁷Amma kapai hanɗa a suma hlai wuzani sek arbaɗi ɗai kai ɗa, ɗuluɗumu gaini gdaŋ buri e miɗi wiini ɗif war yiki hanɗa kir kai.

¹⁸Nɵa e yikiɗi e gidiɗi miɗi buri e miɗi, e hitri war yikini Yesu kir kai.

¹⁹Peter gaini Yohana e wiyi seŋ e miɗi: Wuzani arni Alaw ɗa, mi ɵini piki tiki a suwa na pini Alaw ɗa war futini ɗi? Tiki ki tili hanɗa haw!

²⁰Buri tiyi ɗa, mi kiɗi mi bi miyi ba, wala na mi tiliŋ, na mi ɵiniŋ lai mi miɗi midini kai ɗa a sɗa aŋ za kai.

²¹E hiiɗi miɗi pra, asakal par e pûkûɗi, e nivi wala ktai n’e ziɗi gir pini kai, buriɗi ɗai ɗa, buri ɓa ɗai paŋ e si kol sini Alaw burini wala na a za ɗa.

²²Buri ɗif na wala zi siŋki hanɗa a za sini a zuula ɗa, buzani doogo doogo puɗu.

²³Won hlai n’e pûkûɗisi puk ɗa, Peter gaini Yohana e wiyisi e miɗiɗi seŋ na paakai n’abakai zi ɓaka gaiɗi n’abakai n’arbaɗi ɗai e miɗiŋɗi ɗa wiiɗi marɗi.

²⁴Won hlai na marɗi ɗa e ɵini hanɗa, gaini hlaiɗi paŋ war hiini na ktai e wi wulaɗi amai e miɗi: Epin-gezayi, tuku na ku za hlai n’amai gaiɗi yai, gaini yem ra n’abai, gaini wazagai na warɗi paŋ lai,

²⁵tuku na ku muɗa war Seze-sɗik war mini epiyi David na ɵeŋku ɓa: pini zibaɗi ɗai na zamai ɗa, e migizi nɵa ɗa buri maɗa? ɗai ɗa e hiini hiini na gomoŋ nɵa buri maɗa?

²⁶Paakai na midiɗi yai e hilisi e diŋgi, n’abakai e tipi miɗi ktai midini Epiɗ-ɗai, midini Kristu lai buri maɗa?

²⁷Buri ɓa, jre kai tiɓ ɗa, Herod gaini Pontus Pilatus e tipi miɗi war fuŋ n’abai hanɗa gaini pini ziba na zamai, gaiɗi ɗai na Izrayel ɗa lai, midini ɵeŋku na sɗik Yesu, na ku zaŋ aŋ Kristu.

²⁸Aŋ za wala paŋ na ku hiinaŋ, na ku ɗiyaŋ wuzani hlai par lai.

²⁹Tiyana ɗa, Epiɗ-ɗai, tika hangalku sini gir n’e firiyi e ziŋyi ta, siɗi gdaŋ wiiɗi bagakaiku aŋ miɗi seŋ ɗa edi gaini hunai warɗi kai.

³⁰Siŋka spakku edi kapai zûûli gaini wazagai zi siŋki, wazagai zi hila lai a za war yikini ɵeŋku na Sɗik ɗa.

³¹Won hlai n’e vidi gaini siiwiɗi li, hlai na e ɗi woni ɗa a ziriya, nagai paŋ e vi gaini Seze-sɗik, e miɗi seŋni Alaw edi gaini hunai piɗi kai.

³²Firiɗi ɗai n’e yimi ɗa, hiiniɗi ktai, sezeɗi ktai lai, ktai na a muɗa ɓa wazagai a wiini kiini aŋ kai, wazagaiɗi paŋ a nafu arbaɗi aŋ bonu.

³³Apostelai e zi zaida midini ɵiyi n’amai na wiini Epiɗ-ɗai Yesu gaini spak n’abai gara, ɓiki n’abai a nafu midiɗi paŋ.

³⁴Buri arbaɗi ɗa, ktai na walani aŋ kai ɗa aŋ kai, buri nagai na vuwaiɗi a na, na dalamɗi a na lai ɗa, e wiriŋ edi, e kisi farai na a sumaŋ ɗa,

³⁵e tikiŋ azumai wuzaɗi Apostelai, Apostelai e ɓûrwiŋ, e si sini a siya ɗi paŋ pini hazani hazani.

³⁶Nɵa, Yosef na Apostelai e ɵini zna ɓa Barnabas, a dara a muɗa: Ɗif na a sa arai-zi-pi, ɗif na Levi na war Kiprus par,

³⁷a wura vuwaini edi, a kasi faraini ɗa, a tikaŋ wuzaɗi Apostelai.