Read Mousgoum Sdaɗi Apostelai 5 Bible Online

Sdaɗi Apostelai 5 - Mousgoum bible

Sdaɗi Apostelai 5

¹Amma ɗif ktai yikini Ananiyas gaiɗi Safira na munini, e wûri vuwaiɗi ktai edi.

²A kata mini gaiɗi munini, a mula edi pini farai na a navaŋsi ɗa a ŋoyaŋ. Pini na a hina ɗa a kaŋsi a tikaŋ wuzaɗi Apostelai.

³Peter a miɗini: Ananiyas, Satan a va agulku ɵa buri maɗa? Na haa ku zini eles wiini Seze-sɗik, ku ŋoyasi pini farai na vuwaiku a sumaŋsi edi ɗa!

⁴Won hlai na a naka tuku su ɗa, ɗif a zuku dewele muduku aŋ wuraŋ edi ɗi? Won hlai na ku wuraŋsi edi kaai ɗa, faraini a nafu tuku paŋ, ku ŋa midini maini na ku dara ɵa kai ɗi? Ku hiina sda na maini hanɗa nɵa maɵa maɵa ɗa? Ku za eles na ɗa wiiɗi ɗai kai, amma wiini Alaw.

⁵Won hlai na Ananiyas a ɵina seŋ hanɗa, kɵa azumai, sunani a wa edi. Hunai n’amai te yimiɗi nagai paŋ n’e ɵini hanɗa.

⁶Gawlakai e fikisi e fiɗiŋ warni sapa, e tikiŋ e hili e piŋ.

⁷Gobi ler hu asakal par, munini te halasi, te niya amlai, te sɗa wala na a za wuzaɗi ɗa kai.

⁸Peter a zilbiti a muɗa: Muɗaŋa haw ɗa, ki wûri vuwaiki ɗa edi na ɗa burini farai hanɗa ɵa ta ɗi? Te wiyini seŋ, te miɗini: Nkam a na burini farai hanɗa ɵa ta.

⁹Nɵa Peter a miɗini: Ki kii miki gaini mofaku aŋ titimi Seze na wiini Epiɗ-ɗai ɵa maɵa maɵa ɗa? Nagai n’e pisi mofaku ɗa, e ɗa mini hlai ya, aga e libuku tuku lai.

¹⁰War hlai ni tizaw te kɵa azumai ezini, sunfaɗi a wa edi, wan hlai na gawlakai e niyisi amlai e nivitisi gaini mri su; e tikiti, e hili e piti ɵimani mafaɗi tiɓ.

¹¹Hunai n’amai te yimiɗi zi yimi paŋ, gaiɗi nagai n’e ɵini hanɗa paŋ lai.

¹²Apostelai e zi wazagai zi siŋki viya gaini zi hila viya lai arbaɗi ɗai. Nagai e simni miɗi ktai pini balak na wiini Samun.

¹³Ɗai na zamai ɗa, ktai na a tapasi gaiɗi aŋ kai, amma ɗai e kûliɗi gara.

¹⁴Ɗai e yimi pini Epiɗ-ɗai wuzaɗi sek sek, maɵagai gaiɗi falakai lai e piɵi kai.

¹⁵Ɗai ɗa e kiɗisi ɗai ɗi zi veglek edi warɗi futi, ɵimani futi n’abakai, e tikiɗi warni wala zi feŋ gaini n’e libiɗisi gaini lai kapai wan hlai na Peter a vudazi li ɗa, sezeni a tika midini ktai ta ɗi ɗa.

¹⁶Firiɗi ɗai e hilisi war fuŋ n’abakai na ɵemaɗi Yeruzalem ɗa par, e libisi zi veglek gaiɗi nagai na ksalai a na hûwiyiɗi ɗa.

¹⁷Nɵa pai n’abai zi ɓaka gaiɗi nagai n’e ɗa gaini paŋ, a dara a muɗa: Vok na wiiɗi Sadusekai, e vi gaini sile, e fikisi amai siɗi Apostelai,

¹⁸e yimiɗi, e dûgûɗi war daŋgai na gdeŋi.

¹⁹Amma war duvuk ɵeŋ na wiini Epiɗ-ɗai a mala miɗi daŋgai ɗa edi, a miliɗisi anene a miɗiɗi maini nɵa:

²⁰Hili, ki ɗiyi amlai warni tempel ɗa, ki miɗiɗi seŋ zi sunfa hanɗa wiiɗi ɗai ɗa.

²¹Won hlai n’e ɵini hanɗa, e hili amlai warni tempel, gorof par cup e ɗa hitri. Paakai n’abakai zi ɓaka gaiɗi nagai n’e ɗa gaini e cûsi, e yikiɗisi ɗai zi kiti seŋ ɗa, gaini vokɗi n’abakai n’arbaɗi ɗai na Izrayel ɗa paŋ lai, e ɵini aŋ yimiɗisi Apostelai amlai war daŋgai par.

²²Won hlai na ɗai zi gɗam e cû ɗa, e niviɗi amlai warɗi daŋgai ɗa kai, e wiyisi e kisi miɗi maini hanɗa nɵa:

²³Tiyi mi niviti daŋgai ɗa, miɗi gaini ɵi gaini fuini, ɗai zi gɗam war balamɗi mini magala ca ca lai. Won hlai na mi mili mini hlai edi ɗa, mi nivi ɗif ktai maa amlai kai.

²⁴Won hlai n’e ɵini seŋ hanɗa, abaiɗi ɗai zi giɗimi tempel ɗa lai, paakai zi ɓaka lai e bindi hiyak e siɗi wala n’e miɗiŋ midiɗi kai. E zilbi siɗi lai ɓa: Seŋ ɗa a za fu na maɵa ɗa?

²⁵Ɗif ktai a halasi a miɗiɗi: Ɗai na ki pûkûɗi war daŋgai ɗa, e ɗisi amlai warni tempel aŋ hitriɗi ɗai.

²⁶Nɵa abaiɗi ɗai zi gɗam gaiɗi ɗai zi gɗam e hini e yimiɗisi, amma e ziɗi gir kai buri e hiini ɓa ɗai aga e fiɗiɗi edi gaini kriyit.

²⁷Won hlai n’e kiɗisi li, e ɗiyiɗi wuzaɗi ɗai zi kiti seŋ ɗa, paakai n’abakai zi ɓaka e zilbiɗi:

²⁸Mi gidiki miki buri ki hitri war yiki ni kai, ki ɵini kai ɗi? Tiyana ki viti Yeruzalem gaini hitri hanɗa ta, ki firiyi ɓa sai felni ɗif hanɗa, a kɵa midiyi koo!

²⁹Peter a waya seŋ, Apostelai na zamai e wiyi seŋ nɵa lai e miɗi: A pɗem ɓa mi ɵini pini Alaw, a suwa ɵeŋ na piɗi ɗai ɗa.

³⁰Alaw na wiiɗi tamaimu a ɵiyasi Yesu amai, Ni na tiki ki fiɗiŋ edi, ki tûkûŋ amai sini dagra,

³¹Alaw a sini rɗi n’amai war spakni aŋ pai, aŋ ɗif zi kûri lai, aŋ bunda payaiɗi ɗai na Izrayel ɗa gamai, aŋ hiniɗi tuwurɗi lai.

³²Tiyi mi ɗi zaidakaini wazagai hanɗa gaini Seze-sɗik na Alaw a siŋɗi wiiɗi nagai n’e ɵini mini lai.

³³Gaini hiy n’abai, ɗai hanɗa e rgi warɗi buri e fiɗiɗi edi.

³⁴Amma ɗif na Farise ktai yikini Gamaliyel, a ɗif na a sɗa gadai gara, na ɗai paŋ e firiyiŋ gara lai, a faka amai arbaɗi ɗai zi kiti seŋ, a miɗiɗi buri Apostelai e niyi anene buri hlai n’agwi haw.

³⁵Asakal par a muɗa: Tiki ɗai na Izrayel, zi hangal gaini wala na ki diri ki ziŋ siɗi ɗai hanɗa,

³⁶buri ɓa wuzani mefeŋ hanɗa par ɗa, ɗif ktai na yikini Teyodas a faka amai a yika sini aŋ ɗif, ɗai gobi miya puɗu e tipi pini lai, e fiɗiŋ edi, ɗai n’e tiɓi pini e ɵiri edi lai. Wala ktai maa a hina kai.

³⁷Asakal ni par ɗa, Yudas na Galeliya par a fakasi amai war sarti na wiini pɵi ɗa, a mula ɗai pini viya, ni lai a ba edi, nagai n’e tiɓi pini ɗe e ɵiri edi lai.

³⁸Tiyana ɗa, mu miɗiki ɓa, ki tiɓi piɗi ɗai hanɗa kir kai, hiniɗi e zi walaɗi. Na ɓa hiini na a rga warɗi gaini sda n’e ziŋ ɗa a na wiiɗi ɗai ɗa aga a vada edi.

³⁹Amma na ɓa hanɗa a na sini Alaw par ɗa, e kiɗi e vidi edi gaiki kai. Ki zi hangal kapai ki nivi siki war hatam gaini Alaw kai. Seŋni ɗa, a yima hiiniɗi.

⁴⁰E yikiɗisi Apostelai ɗa, e ɵiɓiɗi gaini daɓala, e gidiɗi miɗi buri e miɗi war yikini Yesu kir kai, e hiniɗi e hili.

⁴¹Apostelai e niyisi anene wuzaɗi ɗai zi kiti seŋ ɗa par gaini firiyi, buri a tala arni Alaw pɗem ɓa e kiɗi aŋ nivi miisi burini yiki hanɗa.

⁴²Mefeŋ paŋ, amlai warni tempel lai, aha war dalam lai, e hitri, e ɓiki labar na pɗem midini kristu Yesu lai.