Read Mousgoum Sdaɗi Apostelai 6 Bible Online

Sdaɗi Apostelai 6 - Mousgoum bible

Sdaɗi Apostelai 6

¹War mefeŋ ni, wan hlai na ɗai zi hitri e tiki piɗi e bindi viya ɗa, Yudeyakai n’e miɗi ɗa a grek ɗa e tiki piɗi e ŋûriyi siɗi nagai n’e miɗi Hebre ɗa, buri ɓa war ɓrawni wazagai zi simi ɗa, falakaiɗi na war greŋ ɗa e ɗa nivi wala pɗem kai.

²Nɵa na doogo pi sulu, e yikiɗi voɗi ɗai zi hiri ɗa, e miɗi: Mi hini seŋni Alaw a buri mi si simi miɗi ɗai ɗa a zuva kai.

³Arbaki par ɗa, tawalakai, a pɗem ɓa ki viri ɗai muguzak, na ɗai e zi zaida na pɗem midiɗi, n’e vi gaini Seze-sɗik gaini yel lai, kapai mu tukuɗumu midini sda hanɗa.

⁴Amma tiyi kapai mi si siyi kûreɗ-kûreɗ mini siiwa, mini ɓikini-seŋ lai.

⁵Seŋ hanɗa a sa firiyi wiiɗi ɗai paŋ, e viri Stefanus ɗif na yimini abai, na gaini vi gaini Seze-sɗik lai, gaini Filip gaini Prokor, gaini Nikanor, gaini Timon, gaini Parmanas, gaini Nikola ɗif na a Antiyokiya par na a yima pini yimi na wiiɗi Yudeyakai.

⁶E kiɗisi wuzaɗi Apostelai, asakal n’e siiwi midiɗi ya, e tiki tiɗi midiɗi lai.

⁷Seŋni Alaw a wa tini edi, piɵiɗi ɗai zi hitri ɗa a riya amai wuzani sek sek aha warɗi Yeruzalem, paakai zi ɓaka viya e yimi pini yimi na war Yesu.

⁸Stefanus ɗa a ɗif na Alaw a za pɗem sini gara, a ɗif zi spak gara lai, a za wazagai zi hila gaini wazagai zi siŋki arbaɗi ɗai.

⁹Ɗai zamai na war Sinagogne n’e yikiŋ ɓa: Sinagogne na wiiɗi nagai n’e bindi kempekai gaiɗi ɗai na Kirene par, gaiɗi ɗai na Alekzandriya par, gaiɗi na Silikiya par, gaiɗi na Aziya lai e yimi sispai gaini Stefanus.

¹⁰Gdaŋɗi a sɗa a ɗiya mini yelni na a miɗiɗisi gaini kai.

¹¹Nɵa e ziɗi piɗi ɗai aŋ miɗi maini nɵa: Tiyi mi niviŋ a na muɗa seŋ na meefeŋ sini Musus, sini Alaw lai.

¹²E tipiɗisi ɗai lai, n’abakai n’arbaɗi ɗai gaiɗi ɗai zi ɗû wazagai ɗa lai, e hilisi e yimiŋ, e kiŋ wuzaɗi ɗai zi kiti seŋ.

¹³E piyi zaidakai na jrekai kai e midini e miɗi: Ɗif hanɗa a yiva na aŋ muɗa seŋ na meefeŋ sini tempel gaini gadai zi ɗû ɵa.

¹⁴Tiyi mi ɵini mini par ɓa: Yesu na Nazaret hanɗa, aga a tuura tempel hanɗa edi, aga a bunda gadai zi ɗiyi na Musus a suŋmu ɗa lai.

¹⁵Won hlai na nagai n’e simni warni kitini-seŋ ɗa, e mili arɗi sini aŋ tiliŋ ɗa, wuzani arni a bunda arɗi maini wuzani arni ɗif zi ɵeŋ na war fuŋni Alaw nɵa.