Read Mousgoum Sdaɗi Apostelai 7 Bible Online

Sdaɗi Apostelai 7 - Mousgoum bible

Sdaɗi Apostelai 7

¹Nɵa pai n’abai zi ɓaka a zilbaŋ: A na ɵa ɗi?

²Stefanus a waya seŋ a muɗa: Tiki tawalakaya, tiki tamaya, ɵini pɗem, Alaw na Epiɗi abai ɗa a siŋka sini arni Abraham na tiyimu wan hlai n’aŋsi war Mezopotamiya par, wuzani na a halasi a sumna war Haraŋ kai hai,

³a miɗini ɓa: Niyasi edi midini aftiku par, arbaɗi pini zibaku par, hala midini afti n’aga mu sunkuŋku.

⁴Nɵa Abraham a niyasi edi midini afti na wiiɗi ɗai na Babilon ɗa par a sumna war Haraŋ, woni par, asakal na epini a mra li ɗa, Alaw a kaŋsi midini afti na ki simni woni tiyana na ɗa.

⁵A sini afti ktai aŋ bulum woni kai, koo n’agwi na a tika ezini woni ta nɵa maa aŋ kai. Amma a za ha ɓa aga a sini afti aŋ bulum wiini ni gaini pinzibani na asakal par lai. Won hlai ni Abraham ahini aŋ kai.

⁶Alaw a muɗa maini nɵa: Pini zibani aga e simni aŋ zak midini afti zamai, aga e bindiɗi aŋ bagakai, aga e siɗi gir haa buza miya puɗu.

⁷Amma Alaw a muɗa pra: Pini ziba n’aga e ziɗi aŋ bagakai ɗa, aga mu ziɗi sariya Muta. Asakal par ɗa aga e niyi edi aŋ siwiŋa war hlai hanɗa.

⁸Asakal par Alaw a sini bonu na wiini ɵini gûrgûle, nɵa wan hlai na Abraham a wa Isaak ɗa a ɵini gûrgûle war mefeŋ n’ag'aŋ mitwis. Isaak a za gaini Yakob nɵa lai, Yakob a za gaiɗi tiyakaimu na doogo-pi-sulu nɵa lai.

⁹Tiyakaimu ɗa e zi sile sini Yosef, e wiriŋ edi kapai e kiŋ war Egipte, amma Alaw a za gaini,

¹⁰A plaŋ edi mini gir na a za sini paŋ, a hinaŋ aŋ nava pɗem gaini yel wuzani Farawon pai n’Egipte na a tikaŋ aŋ ɗif n’abai midiɗi Egipte gaini dalamni paŋ.

¹¹Nɵa wiyamai n’amai te za midini afti n’Egipte gaini na Kanaan ɗa lai, gir ni ɗa a nafu abai gara, haa tamaimu ɗa wala na e simiŋ aŋ kai.

¹²Yakob a ɵina ɓa algama a na war Egipte, a ɵiniɗi tamaimu warni azi n’avut.

¹³Azi n’ag'aŋ sulu ɗa Yosef a siŋka sini arɗi tawalakaini, pinzibani Yosef ɗa a siŋka edi arni Farawon lai.

¹⁴Asakal par Yosef a ɵina midini Yakob n’epini gaini pinzibani paŋ, piɵiɗi paŋ e zi ɗai doogo doogo muguzak pi ɵim.

¹⁵Yakob a halasi azumai war Egipte, a mra woni, tamaimu nɵa lai.

¹⁶E libiɗi a Sikem e miliɗi warni waŋ na Abraham a wuraŋ tiɗi alini Hamor war Sikem.

¹⁷Sarti na ɵinini-ha na Alaw a ziŋni wiini Abraham a ŋa aŋ va amai ɗa, ɗaimu e riyi, e bindi viya war Egipte.

¹⁸E riyi amai haa pai ktai pai ktai na a sɗa Yosef kai a sumna midiɗi Egipte,

¹⁹pai ni ɗa a za yel siɗi ɗaimu ɗa, a ziɗi gir wiiɗi tamaimu, a ziɗi dewele midiɗi buri e hiniɗi aliɗi n’e wi hahakai edi kapai e simni karɗi kai.

²⁰War sarti ni ɗa, Musus a wa, a nafu arni Alaw juf gara, tamaini e giɗimiŋ tile hu.

²¹Won hlai n’e kiŋ li edi ɗa, ahini Farawo te tikaŋ, te wulaŋ amai aŋ ahiɗi.

²²Musus a wula amai war yel na wiiɗi ɗai n’Egipte, spak gara war seŋ zi miɗi, war sdani lai.

²³Won hlai na buzani a va amai doogo doogo puɗu ɗa, hiini kai a cosi midini ɓa, a ha a ɗûgûliɗi tawalakaini, ɗai na Izrayel ɗa.

²⁴A navasi ktai tiɗi aŋ zini gir, a zna pini ɗif n’aŋ war gir ɗa, a fuɗa ɗif n’Egipte ɗa.

²⁵A hiina ɓa tawalakaini aga e siɗi ɓa Alaw a dara a siɗi pili n’edi gaini ni, amma e ɵiniŋ ɵa kai.

²⁶Dawaini ɗa a ɓlasi blaŋ, a niviɗisi Israyelekai sulu e ɗa dibi was, a paya aŋ tûyiɗi gaiɗi marɗi, aŋ za ɵeɗ arbaɗi lai, a muɗa: Tiki ki ɗi tawalakai, ki zi gir wiiɗi marki arbaɗi marki lai buri maɗa?

²⁷Amma ni n’aŋa zini gir wiini maini ɗa a hogoŋ a miɗini: Ni n’a tukutu midiyi aŋ abai, aŋ ziyi sariya lai ɗa a siya ɗa?

²⁸Tuku ɗa, ku firiya ku fuɗaŋa maini na ku fuɗa ɗif n’Egipte eɗibi ɵa zaw.

²⁹Won hlai na Musus a ɵina seŋ hanɗa a pra edi, a hala a ŋoya edi midini afti na Madiyan, woni a wa ali na maɵagai sulu.

³⁰Buza doogo doogo puɗu asakal par, ɗif zi ɵeŋ na war fuŋni Alaw a siŋka sini arni edi war basga na ɵemaɗi huwuŋ Sinai arni elesni afu na wiini kukuɓ n’a na ya.

³¹Won hlai na a tala hanɗa, Musus a bunda hiyak burini wala na a siŋka arni hanɗa, wan hlai n’aŋa torosi gobi aŋ talaŋ ɗa, wulani Epiɗ-ɗai a wasi, a muɗa:

³²Ta m’Alaw na wiiɗi tiyakaiku ɗa, Alaw na wiini Abraham, na wiini Isaak, na wiini Yakob lai. Musus a tika pini a ziriya, arni a yima amai kai.

³³Epiɗ-ɗai a miɗini: Wa harabak na azuku edi buri hlai na ku ɗiya woni ɗa a afti na sɗik.

³⁴Mu tala girɗi ɗaiŋa n’e ɗa war Egipte ɗa, mu ɵina nûmi n’e ɗa nûmi lai, mu niyasi azumai ya aŋ piliɗi edi, tiyana ku halasi, mu ɵunuku war Egipte.

³⁵Musus na nagai e miɗi ɓa e sɗiŋ kai ɗa, n’e miɗini ɓa a tukuku aŋ abai, aŋ ɗif zi ɗûkûliti sariya lai ɗa a siya ɗi ɗa? A ni na Alaw a ɵinaŋsi aŋ ɗif n’abai, aŋ ɗif na a piliɗisi edi lai gaini zinai na wiini ɗif zi ɵeŋ na a siŋka sini arni kukuɓ ɗa.

³⁶A miliɗisi edi ɗa a ni, a za wazagai zi hila, zi siŋki lai aha warɗi Egipte, a agoɗom war yem ra n’abai na mekele, edi war basga na kaɗataŋ lai haa buza doogo-doogo-puɗu.

³⁷Musus ni ɗa, a ni na a miɗiɗi wiiɗi aliɗi Izrayel ɗa ɓa: Alaw aga a ɵinikisi arbaɗi tawalakaiki par ɗif na mini Alaw ktai na maya ta ɵa,

³⁸a ni n’arbani vok na a naka edi warni basga na kaɗataŋ ɗa, a naka gaini ɗif zi ɵeŋ na a muɗa gaini amai midiɗi huwuŋ Sinai par lai, gaiɗi tamaimu lai, a ni na a navasi seŋ zi sunfa aŋ suŋmu lai.

³⁹Tamaimu e diri e ɵini mini kai, haa a hûgiŋ edi, warɗi agulɗi ɗa e bindi arɗi ɗa aha war Egipte sek.

⁴⁰E miɗini wiini Aaron ɓa: Ziziniyi alawai na kapai e ɵi wuzayi, buri ɓa Musus na a miliyisi edi war Egipte par ɗa mi siɗi wala na a za sini kai.

⁴¹War mefeŋ ni ɗa, e zizini ahi ɵeŋ, e kinisi ɓaka wiini Alaw n’e rgiŋ gaini tiɗi ɗa.

⁴²Nɵa Alaw a bunda arni edi siɗi par, a hiniɗi aŋ siiwi ɗa tini wazagai zi rgi n’arbani hlai n’amai maini n’aŋ gaini ɗû warni maktuɓ na wiiɗi ɗai na mini Alaw nɵa ɓa: Tiki aliɗi Izrayel, buza doogo-doogo-puɗu edi war basga na kaɗataŋ ɗa ki fiɗi wazagai ɗa wiya ɗi? Ki ziŋa ɓaka ɗa wiya ɗi?

⁴³Tiki ɗa ki kiɗa ki libi ɗa a gumu na wiini Malok gaiɗi maɵiki na wiini alaw Refan lai, wazagai na hanɗa, ki ziziniŋ buri ki hûrgi azumai wuzani, nɵa ɗa, aga mu kiki edi duɓaɗi Babilon par.

⁴⁴Tamaimu ɗa, edi war basga ɗa, e ɗika gaini Tabernakel zi zaida tiɗi, maini na Ni n’a muɗa gaini Musus ɗa, a miɗini ɓa: a zaŋ ɗa nɵa kal kal maini na a siŋkiŋni arni ɗa ɵa.

⁴⁵Asakal na e yimiŋ ya ɗa, tamaimu gaini Yosva e kiŋ midini afti na wiiɗi pini zibaɗi ɗai na zamai na Alaw a birgiɗi edi wuzaɗi ɗa, hanɗa ɵa haa sini mefeŋ na wiini David ta.

⁴⁶Ni na a nava pɗem wuzani arni Alaw, na a zilba buri a sa hlai zi simni wiiɗi pinzibani Yakob ɗa lai.

⁴⁷Amma na a rgini dalam ɗa a Salmun.

⁴⁸Paŋ ktai Alaw n’amai ɗa a sumna war dalam na ɗai e rgiŋ gaini tiɗi kai, maini na ɗif na mini Alaw a muɗaŋ ɗa ɵa.

⁴⁹Hlai n’amai ɗa te paramay zi pay na wiya, afti ɗa a wala na mu tika aza midini. Epiɗ-ɗai a muɗa: Dalam n’aga ki rgiŋ ɗa a na maɵa ɗa? Hlai na sa amla woni ɗa a na maɵa ɗa?

⁵⁰Wazagai hanɗa paŋ ɗa mu rgaŋ muta kai ɗi?

⁵¹Ɗai na midiki gdaŋ, na agulki gaini dûgûduk, ɵemaki gaini tiki tek lai, ki ɵini wulani Alaw kai, tiki ɗa, kureɗ ki hitimi Seze-sɗik maiɗi tamaiki ɵa lai.

⁵²Ɗif na mini Alaw na tamaiki e zini gir kai ɗa a na wata ɗa? E fiɗiɗi nagai n’e miɗi edi wuzani hlai midini gizini na Jre, na tiki tiyana ki siŋ edi, ki fiɗiŋ edi lai na ɗa.

⁵³Tiki na ki nivi gadai na ɗai zi ɵeŋ na war fuŋni Alaw par e siŋki, amma ki zi pini kaalai.

⁵⁴Seŋ na e ɵiniŋ ɗa a limiɗi agulɗi gara, e hirɗi sesiyeŋɗi sini.

⁵⁵Amma Stefanus a va gaini Seze-sɗik, a mula arni amai war fuŋni Alaw, a tiliti abai na wiini Alaw, gaini Yesu gaini ɗiyi zaw war hlai zi hormo na wiini Alaw zaw lai.

⁵⁶A muɗa: Mu tala hlai n’amai gaini mili edi mal, Ahini ɗif gaini ɗiyi warni hlai zi hormo na wiini Alaw zaw lai.

⁵⁷Amma e ɗûûli gaini gdaŋɗi, e tiki ɵemaɗi tek tek, gaini hlaiɗi paŋ e fikisi midini,

⁵⁸e birgiŋ edi war fuŋ n’abai ɗa par, e fiɗiŋ edi gaini kriyit, zaidakai ɗa e hini ka sapaɗi tini gawla ktai n’e yikiŋ ɓa: Sawlus.

⁵⁹Won hlai n’e ɗa fiɗiŋ edi ɗa, Stefanus a siiwa a muɗa: Epiɗ-ɗai Yesu, yima sunfaŋa war tuku.

⁶⁰Asakal par a pa kurnaini azumai, a ɗuula a muɗa: Epiɗ-ɗai, ku pɵa tuwur hanɗa midiɗi kai. Asakal na a muɗa hanɗa ɗa ya, a niya warni weseŋ zi mri.